« E’ita roa e vai ’ōtahi noa », Hoa, ’Ātete 2023, 22–23.
E’ita roa e vai ’ōtahi noa
’E mai te mea e pēpē fa’ahou ’o Ethan, ’e ’aita e ta’ata i reira nō te tauturu iāna ?
’Ua tupu teie ’ā’amu i te fenua Marite.
’Ua tūra’i Ethan i tōna nā ’āvae i ni’a i te tāhoro (balançoire). ’Ua haere roa ’oia i te teiteira’a. Nō te mata’i, ’ua feruri ’oia ē, mai te huru ra ē, tē rere ra ’oia !
I muri iho, ta’i mai nei te oe. Mapu a’era Ethan i te aho. ’Aita ’oia i ineine nō te hopera’a o te taime fa’afa’aeara’a.
Tē ’āna’i ra te mau tamari’i nō te ho’i i roto te piha. ’Ua vaiiho ’o Ethan i tōna tāhoro ’ia haere marū. I muri iho, ’ua pou ’oia i raro i te tāhoro nō te ho’i i roto i te piha ha’api’ira’a.
I te ta’ahira’a rā ’o Ethan i tōna ’āva’e i ni’a i te repo, ’ua ’ite ’oia i te hō’ē māuiui rahi i roto i tōna ’āvae. Topa ihora ’oia i ni’a i te repo. ’Ua tāmata ’oia i te ti’a i ni’a, terā rā e au ra tōna ’āvae mai te auahi ra te huru. E māuiui rahi mau !
« Tauturu mai iā’u ! » ’Ua tuō ’o Ethan. ’Ua tahe a’era te roimata i ni’a i tōna pāpāri’a. ’Ua horo mai te mau tamari’i ’e te mau ’orometua ha’api’i nō te tauturu iāna.
« E aha te fifi ? », ui atu ra te hō’ē ’orometua.
« ’Ua fāti tō’u ’āvae ! »
E ’ere teie i te taime mātāmua ’a fāti ai te ivi ’o Ethan. E ’ere ato’a i te piti ’aore rā te toru o te taime ! E ma’i nō te mau ivi e fāti noa tō Ethan’oia ho’i, e ha’afāti ’ōhie noa tōna mau ivi. Noa atu te mau ’ohipa na’ina’i, mai te poura’a i raro i te ’ē’a ’aore rā te titora’a i ni’a i te ta’ata, e nehenehe te reira e ha’afāti i tōna mau ivi.
« E pi’i mātou i tō ’oe nā metua nō te ’āfa’i ia ’oe i te taote », parau a’era te ’orometua ha’api’i. « Eiaha e ha’ape’ape’a ».
’Ua ’oa’oa roa ’o Ethan, e ta’ata tō reira nō te tauturu iāna. Tē māuiui noa ra tōna ’āvae, ’ua ’ite rā ’oia e pāruruhia ’oia.
’Ua haere mai māmā ’e ’o pāpā i te fare ha’api’ira’a ’e ’ua ’āfa’i ia Ethan i te taote. E tīmā ninamu tō tōna ’āvae ’e ’ua ho’i atu ’oia i te fare nō te fa’afa’aea.
Nō te mea ’ua fāti tōna ’āvae, ’ua fa’aea maoro Ethan i ni’a i te ro’i. E rave rahi buka tāna e tai’o. I te tahi taime, ’ua haere mai tōna mau hoa nō te ha’uti nā muri iāna. Terā rā ’ua ha’umani noa ā ’oia.
I te hō’ē pō, ’ua ara mai ’o Ethan ’e ’aita i nehenehe fa’ahou e ta’oto. ’Ua tāmata ’oia i te tāmarū iāna, ’ua tāmau noa rā ’oia i te ha’ape’ape’a. ’Āhani pa’i ē, i te fatira’a tō’u ’āvae ’aita hō’ē ta’ata i reira, mai te tu’ira’a pō ? Mana’o a’era Ethan. Tupa’ipa’i iho ra tōna māfatu. Ri’ari’a a’era ’oia.
« Pāpā ! » ’Ua tuō Ethan.
Horo mai ra pāpā i te piha o Ethan. « E aha te fifi ? »
« ’Ua ri’ari’a vau », parau atu ra Ethan. « ’E mai te mea e fati te tahi atu ivi tō’u ’e ’aita e ta’ata i reira nō te tauturu iā’u ? »
Pārahi iho ra pāpā i pīha’i iho iāna i ni’a i te ro’i. « E mana’o ri’ari’a mau te reira », tāna i parau atu. « Noa atu e tāmata ana’e tātou i te ha’apa’o maita’i ’e i te pāruru, e nehenehe iho ā te mau ’ohipa ’ino e tupu mai. Terā rā, noa atu te ’ohipa e tupu mai, e ara noa te Metua i te ao ra i ni’a ia ’oe.
« Te aura’a ra, tei pīha’i iho noa ’oia iā’u ? » ’Ua parau Ethan.
« Pāpū maita’i ». ’Ua tauahi atu pāpā ia Ethan.
Feruri a’era Ethan i te vitiviti ’o pāpā i te haerera’a mai e tauturu iāna. ’Ua ’ite ’oia ē, ’ua here pāpā iāna ’e ’ua hina’aro noa e tauturu iāna. Penei a’e mai te reira ato’a te Metua i te ao ra.
’Ia po’ipo’i a’e, ’ua tai’o Ethan i te hō’ē ’īrava i roto i te ve’a Hoa. Tē nā ’ō ra, « ’a fa’aitoito ’e ’eiaha e mata’u, nō te mea tei pīha’i iho vau ’o te Fatu ia ’outou na, ’e e ti’a noa ho’i i pīha’i iho ia ’outou na ».*
’Ua fāri’i Ethan te marū ’e te pāruruhia i tōna tai’ora’a i te pāpa’ira’a mo’a, mai tāna i fāri’i ’a parauparau ai ’oia ia pāpā. ’Ua ’ite ’oia ’o te Vārua Maita’i tē tāmāhanahana ra iāna. Mai te huru ra tē tauahi fa’ahou ra ’oia ia pāpā.
Pāpū roa e fati fa’ahou te tahi atu mau ivi tō’u, feruri a’era Ethan, ’eiaha rā vau e ri’ari’a. ’Ua ’ite ’oia ē, e’ita ’oia e vai ’ōtahi noa.
Fa’ahōho’ara’a nā Simini Blocker