« Te ’ohipari’i nō te ’ā’amu ’utuāfare, » Hoa, ’Ātete 2023, 30–31.
Te ’ohipari’i nō te ’ā’amu ’utuāfare
« E nehenehe ānei ’oe e fa’ati’a mai i te tahi atu ’ā’amu ’utuāfare ? » ’Ua ui atu Lorrain.
’Ua tupu teie ’ā’amu i Vanuatu.
’Ua ’ata’ata ’o Lorrain ’a hīmene ai ’oia i te mau parau hope’a o te hīmene. Nō fa’aoti noa a’e nei rātou i te hīmenera’a i te Paraimere. I teienei, ’ua tae te taime nō te haere i roto i te piha ha’api’ira’a.
Nā mua a’e rā, ’ua ti’a mai te tuahine Taleo i ni’a. « Tē hina’aro nei au e paraparau ia ’outou nō ni’a i te hō’ē ’ātivite a te Paraimere e fātata mai nei », ’ua parau ’oia. « Tē hina’aro nei mātou ia ’outou tāta’itahi ’ia ’ite rahi mai nō ni’a i tō ’outou ’utuāfare. ’A ani i tō ’outou nā metua nō ni’a i te mau ’ā’amu ’utuāfare. I muri iho, i roto i te ’ātivite, e nehenehe ’outou tāta’itahi e fa’a’ite mai i te mau mea tā ’outou i ’apo mai ».
I te ho’ira’a Lorrain i te fare na te fare purera’a mai, ’ua ’oa’oa roa ’oia. ’Ua rave mai ’oia i te hō’ē ’api parau rahi ’e ’ua ’āfa’i atu te reira i ni’a i te ’aira’amā’a. E hina’aro rahi tōna ’ia ’ite rahi mai nō ni’a i tōna ’utuāfare !
’Ua pāpa’i hōho’a Lorrain i te hō’ē tumu rā’au ’utuāfare i ni’a i te ’api parau. ’Ua tauturu māmā ’e ’o pāpā iāna ’ia fa’ahiti i te mau i’oa ato’a. I muri iho, ’ua tāpiripiri ’oia i te mau hōho’a o te mau melo ’o tōna ’utuāfare i ni’a i te parau pia.
« ’O Lorrain ato’a te i’oa ’o tō ’oe tupuna vahine », parau a’era māmā. « ’Ua pi’i māua ia ’oe i tōna i’oa ».
« Wow », ’ua parau Lorain.
« E ta’ata here roa ’o māmā rū’au Lorrain ». ’Ua ’ata’ata māmā « ’Ia pau ana’e te vahie a te tahi mau ta’ata nō tā rātou auahi i roto i te ’oire iti, e hōro’a māmā rū’au Lorrain i te vahie nā rātou ».
E mea ’ārearea roa ’ia ’ite rahi mai nō ni’a i tōna ’utuāfare ! « E nehenehe ānei ’oe e fa’ati’a mai i te tahi ’ā’amu ’utuāfare ? » ’Ua ui atu Lorrain.
« E nehenehe pāpā e fa’ati’a ia ’oe i te taime mātāmua ’a haere ai ’oia i te hiero », ’ua parau māmā. « E ono ana’e matahiti tōna. ’Ua tere ’oia ’e tōna nā metua i te hō’ē tere roa i te hiero nō Niu Terani ».
Mea au roa nā Lorrain ’ia fa’aro’o i te parau nō te hiero. « ’A fa’ati’a mai na iā’u i te ’ā’amu, e pāpā ! » tāna ïa i parau.
« ’A tahi, ’ua rave mātou i te manureva nō te reva i Niu Terani. I muri iho, ’ua rave mātou i te pere’o’o mata’eina’a. E tere ātea te reira ». ’Ua fa’a’ite atu pāpā ia Lorrain i te hō’ē hōho’a nō te hiero. « I te pae hope’a, ’ua tomo atu tō’u nā metua ’e ’o vau i roto. ’Ua tā’atihia mātou ’ei ’utuāfare. Te aura’a e nehenehe mātou e vai ’āmui noa e a muri noa atu ! »
’Ua tupu te māhanahana i roto ia Lorrain. ’Ua ’oa’oa ’oia i te fa’aro’ora’a i te mau ’ā’amu nō tōna ’utuāfare.
Tae mai nei te po’ipo’i nō te ’ātivite a te Paraimere. ’Ua tauturu Lorrain ia māmā ’e i te tuahine Taleo ’ia fa’aineine i te mau mea ato’a i te fare purera’a.
I muri iho, ’ua fa’aro’o rātou i te tahi mau parau ’āpī ’oa’oa. E patuhia te hō’ē hiero i ni’a i tō rātou motu !
E ’oa’oa rahi tō Lorrain. ’Ia pa’ari ’oia nō te haere i roto i te hiero, ’aita e tītauhia iāna ’ia rātere ātea !
I taua pō ra, ’ua tae ato’a mai tō Lorrain mau hoa i te ’ātivite a te Paraimere. ’Ua fa’a’ite mai te mau tamari’i, te tahi i muri mai i te tahi, i te mau mea tā rātou i ha’api’i mai nō ni’a i tō rātou ’utuāfare. ’A tae mai ai te taime ’o Lorrain, ’ua fa’a’ite atu ’oia i te parau pia o tōna tumu rā’au ’utuāfare.
« ’Ua au roa vau i te ha’api’i-rahi-ra’a mai nō ni’a i tō’u ’utuāfare », ’ua parau ’oia. « ’Ua ha’api’i mai au ē, ’ua pi’ihia vau i te i’oa o tō’u tupuna vahine. ’Ua ha’api’i ato’a mai au nō te taime mātāmua, ’ua haere tō’u ’utuāfare i te hiero. E tauturu te hiero i tō tātou ’utuāfare ’ia vai ’āmui noa e a muri noa atu ». ’Ua ho’i fa’ahou mai te mana’o māhanahana. « E ’oa’oa iti rahi tō’u i te mea ē, e ti’a mai te hō’ē hiero i Vanuatu nei ».
Pārahi iho ra Lorrain ma te mata ’ata’ata rahi. ’Ua māuruuru roa ’oia i te mea ē, e nehenehe tāna e tupu rahi atu ā mai ia Iesu. ’E ’ua māuruuru ’oia nō te hiero ! Hina’aro rahi tōna ’ia tomo i roto, i te hō’ē mahana.
Fa’ahōho’ara’a nā Emily Davis