« Te fifi arapo’a purapura », Hoa, ’Ātete 2023, 42–43.
Te fifi arapo’a purapura
’Ua hina’aro noa Carolina e tāpe’a iāna ra te fifi arapo’a ma’a taime iti.
’Ua tupu teie ’ā’amu i te fenua Rāparata.
’Ua haere Carolina nā roto i te ’āua. Tei rāpae tōna hoa ’o Isabella.
Tārape mai ra Isabella. « Haere mai e ha’uti ! »
’Ua haere atu Carolina nā roto i te ’āua i te fare o Isabella.
Pātia a’era Isabella i tōna rima i roto i tōna pūtē. « Tē hina’aro nei au e fa’a’ite ia ’oe i te hō’ē mea », ’ua parau ’oia. I muri iho, huti mai ra ’oia i te fifi ’arapo’a nehenehe roa a’e tā Carolina i ’ite a’enei ! E mea purapura ’e te ’ana’ana te mau piru na’ina’i.
« Nō tō’u māmā », ’ua parau Isabella. « ’Ua parau mai ’oia ē, e nehenehe au e ha’uti i te reira i teie mahana. ’A hi’o na i te reira i roto i te mahana ».
’Ua tāpe’a Isabella i te fifi ’arapo’a i ni’a i te māramarama. E rave rahi hānere ānuanua e ’ana’ana ra i ni’a i te mau piru. E mea nehenehe mau !
« I teienei e ha’uti ana’e i te ha’uti tāpuni ’e e ’imi ! » ’Ua parau Isabella.
« Nā reira », parau atu ra Carolina. « E nehenehe au e tauturu ’ia ha’apa’o maita’i i te fifi ’arapo’a ».
« Māuruuru roa ! ». Hōro’a atu ra Isabella i te fifi arapo’a ia Carolina ra, ’e tu’u atu ra Carolina i te reira i roto i tōna pūtē.
Tē tae ra te taime nō Carolina e ho’i i te fare. I tōna paraura’a ’a parahi, ’aita Isabella i ui mai nō ni’a i te fifi ’arapo’a. ’Ua mo’ehia iāna. ’E ’aita Carolina i fa’aha’amana’o iāna.
’Ua ’oto ri’i Carolina i te ’āfa’ira’a i te fifi ’arapo’a i te fare. ’Ua hina’aro noa ’oia e tāpe’a iāna ra ma’a taime iti. ’Ua tau’a ’ore ’oia i te mana’o ’oto ’e ’ua tu’u i te fifi arapo’a i raro a’e i tōna tūru’a.
E mahana mā’a te mahana i muri iho. ’Ua rave Carolina i tāna mau ’ohipa nō te fare ’e ’ua haere i rāpae nō te ha’uti. ’Ua mo’ehia iāna te parau nō te fifi ’arapo’a.
« Carolina ! » ’Ua pi’i mai ra pāpā. « ’A haere mai na i’ō nei ? »
’Ua horo atu Carolina i roto. « ’Ē ? »
Tē tāpe’a ra pāpā i te fifi ’arapo’a i roto i tōna rima. « ’Ua ’ite mai māmā i teie mea i raro a’e i tō ’oe tūru’a. « ’Nā vai teie mea ? »
« Nā Isabella ». Tahe a’era te roimata o Carolina. « ’Ua tāpe’a vau i te reira i roto i tō’u pūtē nō te ha’apa’o maita’i, ’a ha’uti ai māua i nanahi ra. I muri iho rā, ’ua fa’aoti au e ’āfa’i mai i te fare nei ».
Pārahi iho ra māmā i pīha’i iho ia Carolina i ni’a i te pārahira’a marū. « Māuruuru i tō ’oe fa’a’itera’a mai i te parau mau. « I tō ’oe mana’o, e aha te ti’a ia ’oe ’ia rave i teienei ?
’Aita Carolina i parau a’e hō’ē parau. ’Ua feruri ’oia ia Iesu. E hina’aro ’oia ’ia vai ha’avare ’ore noa Carolina ’e ’ia fa’aho’i i te fifi ’arapo’a.
« E ti’a iā’u e fa’aho’i i te reira ia Isabella ra ’e ’ia parau atu iāna ē, ’ua hape au », ’ua parau Carolina. I te taime iho ā ’a parau ai ’oia i te reira, ’ua mo’e iāna te mana’o ’oto. ’Ua fāri’i ’oia te māhanahana ’ōroto iāna.
’Ua haere atu Carolina i te fare ’o Isabella.
« ’Ia ora na », ’ua parau atu Carolina. Hōro’a atu ra ’oia i te fifi ’arapo’a ia Isabella ra. « Fa’a’ore mai i tā’u hape i te tāpe’ara’a i te reira iā’u ra. E fa’a’ore mai ānei ’oe i tā’u hapa ? »
« ’Ē », ’ua parau atu Isabella. « Māuruuru nō te fa’aho’ira’a mai i te reira ». I muri iho, ’ata mai ra Isabella. « E hina’aro ’oe e ha’uti fa’ahou e tāpuni ’e e ’imi ? »
« ’Ē ! E tai’o ’oe nā mua—e haere au e tāpuni ! »
I taua pō ra, ’ua fa’aoti Carolina i te hō’ē pure. « E te Metua here i te ao ra, ’a fa’a’ore mai na i tā’u hapa nō te tāpe’ara’a mai i te fifi ’arapo’a. ’E māuruuru nō tō ’oe tauturura’a iā’u ’ia rave i te ’ohipa ma te maita’i ».
’Ua fāri’i fa’ahou Carolina i te mana’o māhanahana. ’Ua ’oa’oa ’oia, ’ua ti’a iāna ’ia rave i te mea tā Iesu e hina’aro ’ia rave ’oia.
Fa’ahōho’ara’a nā Sue Teodoro