« សកម្មភាពដំណើររឿងគ្រួសារ » ប្រិយមិត្ត ខែ សីហា ឆ្នាំ ២០២៣ ទំព័រ ៣០–៣១ ។
សកម្មភាពដំណើររឿងគ្រួសារ
ឡូរ៉េន បានសួរថា « តើម៉ាក់អាចប្រាប់កូនអំពីដំណើររឿងគ្រួសារមួយទៀតបានទេ ? »
រឿងនេះបានកើតឡើងនៅ វ៉ានូអាទូ ។
ឡូរ៉េន ញញឹមពេលនាងច្រៀងពាក្យចុងក្រោយនៃបទចម្រៀង ។ ពួកគេទើបតែបានបញ្ចប់ពេលច្រៀងនៅក្នុងអង្គការបឋមសិក្សា ។ ឥឡូវនេះដល់ពេលចូលរៀនហើយ ។
តែដំបូងបងស្រី ថាឡេអូ បានក្រោកឈរ ។ គាត់បាននិយាយថា « ខ្ញុំចង់ប្រាប់ប្អូនៗអំពីសកម្មភាពអង្គការបឋមសិក្សា ដែលនឹងមកដល់ក្នុងពេលឆាប់ៗនេះ » ។ « យើងចង់ឲ្យប្អូនៗម្នាក់ៗរៀនអំពីគ្រួសាររបស់ប្អូនៗ » ។ សូមសួរឪពុកម្ដាយរបស់ប្អូនអំពីដំណើររឿងគ្រួសារ ។ បន្ទាប់មកនៅឯសកម្មភាព ប្អូនៗម្នាក់ៗអាចចែកចាយនូវអ្វីដែលប្អូនបានរៀន » ។
នៅពេល ឡូរ៉េន ចេញពីព្រះវិហារត្រឡប់មកផ្ទះវិញ នាងរំភើបចិត្តណាស់ ។ នាងបានរកឃើញក្រដាសធំមួយ ហើយដាក់វាលើតុ ។ នាងអន្ទះសាចង់រៀនអំពីគ្រួសាររបស់នាង !
ឡូរ៉េន បានគូរមែកធាងគ្រួសារនៅលើក្រដាសនោះ ។ ម៉ាក់ និងប៉ាបានជួយនាងឲ្យប្រកបឈ្មោះទាំងអស់ ។ បន្ទាប់មកនាងបានបិទរូបភាពរបស់សមាជិកគ្រួសាររបស់នាងនៅលើបដានោះ ។
ម៉ាក់នាងបាននិយាយថា « លោកយាយតួតរបស់កូនក៏ឈ្មោះ ឡូរ៉េន ដែរ » ។ « ប៉ាម៉ាក់បានដាក់ឈ្មោះកូនតាមគាត់ » ។
ឡូរ៉េន បានលាន់មាត់ថា « អស្ចារ្យណាស់ » ។
ម៉ាក់បាននិយាយទាំងញញឹមថា « លោកយាយឡូរ៉េន ជាមនុស្សគួរឲ្យស្រឡាញ់ខ្លាំងណាស់ » ។ « នៅពេលដែលមនុស្សដទៃទៀតនៅក្នុងភូមិអស់ឧសសម្រាប់ដុត លោកយាយឡូរ៉េនបានចែករំលែកជាមួយពួកគេ » ។
ការរៀនអំពីគ្រួសាររបស់នាងគឺសប្បាយណាស់ ! ឡូរ៉េន បានសួរថា « តើម៉ាក់អាចប្រាប់កូនអំពីដំណើររឿងគ្រួសារមួយទៀតបានទេ ? »
ម៉ាក់បានតបថា « ប៉ាអាចប្រាប់កូនអំពីការទៅព្រះវិហារបរិសុទ្ធលើកដំបូងរបស់គាត់ » ។ « កាលនោះគាត់មានអាយុត្រឹមតែប្រាំមួយឆ្នាំប៉ុណ្ណោះ ។ គាត់ និងឪពុកម្តាយរបស់គាត់បានធ្វើដំណើរយ៉ាងវែងឆ្ងាយទៅកាន់ព្រះវិហារបរិសុទ្ធនៅនូវែលសេឡង់ » ។
ឡូរ៉េន ចូលចិត្តស្តាប់អំពីព្រះវិហារបរិសុទ្ធ ។ នាងបាននិយាយថា « ប៉ាសូមប្រាប់កូនពីរឿងនោះផងប៉ា ! » ។
« ដំបូងយើងបានជិះយន្តហោះ ដើម្បីហោះទៅកាន់ប្រទេស នូវែលសេឡង់ ។ បន្ទាប់មកយើងជិះរថយន្តក្រុង ។ វាគឺជាដំណើរដ៏វែងឆ្ងាយមួយ » ។ ប៉ាបានបង្ហាញរូបភាពរបស់ព្រះវិហារបរិសុទ្ធដល់ ឡូរ៉េន ។ « នៅទីបំផុតប៉ាបានចូលទៅក្នុងជាមួយឪពុកម្ដាយប៉ា ។ យើងត្រូវបានផ្សារភ្ជាប់ជាគ្រួសារ ។ ដែលមានន័យថា យើងអាចរស់នៅជាមួយគ្នាជានិរន្តរ៍ ! »
រឿងនេះធ្វើឲ្យ ឡូរ៉េន មានអារម្មណ៍កក់ក្តៅក្នុងចិត្ត ។ នាងរីករាយណាស់ដែលនាងអាចឮដំណើររឿងអំពីគ្រួសាររបស់នាង ។
ទីបំផុតព្រឹកនៃសកម្មភាពអង្គការបឋមសិក្សាបានមកដល់ ។ ឡូរ៉េន បានជួយម៉ាក់ និងបងស្រី ថាឡេអូ ឲ្យរៀបចំអ្វីៗគ្រប់យ៉ាងនៅអគារព្រះវិហារ ។
បន្ទាប់មកពួកគេបានឮដំណឹងដ៏រំភើបមួយ ។ គឺព្រះវិហារបរិសុទ្ធនឹងសាងសង់នៅលើកោះរបស់ពួកគេ ។
ឡូរ៉េនសប្បាយចិត្តខ្លាំងណាស់ ។ នៅពេលនាងពេញវ័យល្មមដែលអាចចូលទៅខាងក្នុងព្រះវិហារបរិសុទ្ធ នោះនាងមិនបាច់ត្រូវធ្វើដំណើរឆ្ងាយទេ !
យប់នោះមិត្តភក្តិរបស់ ឡូរ៉េន ទាំងអស់បាននៅក្នុងសកម្មភាពអង្គការបឋមសិក្សា ។ កុមារៗបានផ្លាស់ប្ដូរវេនគ្នាចែកចាយនូវអ្វីដែលពួកគេបានរៀនអំពីគ្រួសាររបស់ពួកគេ ។ នៅពេលដែលដល់វេនរបស់ ឡូរ៉េន នាងបានកាន់បដាមែកធាងគ្រួសាររបស់នាង ។
នាងបាននិយាយថា « ខ្ញុំពិតជាចូលចិត្តរៀនអំពីគ្រួសាររបស់ខ្ញុំណាស់ » ។ « ខ្ញុំបានរៀនថា ឈ្មោះខ្ញុំត្រូវបានដាក់តាមលោកយាយតួតរបស់ខ្ញុំ ។ ខ្ញុំក៏បានរៀនអំពីលើកដំបូងដែលគ្រួសាររបស់ខ្ញុំបានទៅព្រះវិហារបរិសុទ្ធផងដែរ ។ ព្រះវិហារបរិសុទ្ធអាចជួយក្រុមគ្រួសារយើងឲ្យរស់នៅជាមួយគ្នាជានិរន្តរ៍ » ។ អារម្មណ៍កក់ក្ដៅនេះបានត្រឡប់មកវិញ ។ « ខ្ញុំរំភើបចិត្តខ្លាំងណាស់ដែលយើងនឹងមានព្រះវិហារបរិសុទ្ធមួយនៅទីនេះក្នុងប្រទេស វ៉ានូអាទូ » ។
ឡូរ៉េន បានអង្គុយចុះវិញ ទាំងមានទឹកមុខញញឹមពព្រាយ ។ នាងមានអំណរគុណដែលនាងអាចរីកចម្រើនកាន់តែដូចព្រះយេស៊ូវ ។ ហើយនាងមានអំណរគុណចំពោះព្រះវិហារបរិសុទ្ធ ! នាងអន្ទះសាចង់ចូលទៅខាងក្នុងនៅថ្ងៃណាមួយ ។
រចនារូបភាពដោយ អិមមីលី ដេវីស