« ជេនីលីនឈប់អូសអេក្រង់ទូរស័ព្ទហើយ » ទស្សនាវដ្តី ប្រិយមិត្ត ខែ មីនា ឆ្នាំ ២០២៤ ទំព័រ ៣៦-៣៧ ។
ជេនីលីនឈប់អូសអេក្រង់ទូរស័ព្ទហើយ
នាងពិតជាចង់មើលវីដេអូបន្ទាប់ខ្លាំងណាស់ ។ ហើយវីដេអូបន្ទាប់ទៀត ។ ហើយវីដេអូបន្ទាប់ទៀត ។
ដំណើររឿងនេះបានកើតឡើងនៅប្រទេសម៉ាឡេស៊ី ។
ជេនីលីនបានអូសម្រាមដៃរបស់នាងកាត់អេក្រង់ទូរស័ព្ទ ។ វីដេអូបានលោតបង្ហាញ ។ នាងបានឈប់ដើម្បីមើលរឿងមួយ បន្ទាប់មកអូសតទៅទៀត ។ បន្ទាប់មកនាងបានបន្តមើលវីដេអូមួយផ្សេងទៀត ។ វាមានភាសាអាក្រក់ជាច្រើន ប៉ុន្តែវាគួរឲ្យអស់សំណើច ដូច្នេះនាងបានបន្តមើល ។ ហើយបន្ទាប់មកបានបន្តអូសទៅទៀត ។
« ជេនីលីន ! ចង់មកគូររូបទេ ? » ប្អូនស្រីរបស់នាង ចូចូបានលើកក្រដាសមួយសន្លឹកគ្រវី ។
ជេនីលីនបានសម្លឹងមើល ។ « ចាំបន្តិចទៀត » ។
« ចាស » ។ ចូចូ មានមុខស្រពោន ហើយបានដាក់ក្រដាសចុះ ។
អូស ។ អូស ។ អូស ។ វីដេអូរបស់សត្វគួរឲ្យស្រឡាញ់ ។ វីដេអូរបស់មនុស្សល្បីៗ ។ វីដេអូរបស់កុមាររាំ ។ ហើយជេនីលីនបានដឹងថាមានវីដេអូពីរបីមិនគួរមើលទេ ។ ការពិតទៅប្រហែលជាច្រើនជាងពីរបីវីដេអូ ។ ជេនីលីនបានចាប់ផ្តើមមានអារម្មណ៍ថានាងគួរតែឈប់មើលវីដេអូទាំងនោះ ។
នាងបានគិតថា ប៉ុន្តែ មនុស្សក៏ចុះផ្សាយរឿងល្អៗផងដែរ ។ នាងថែមទាំងបានរៀនពីរបៀបគូរថ្មីៗមកពីវីដេអូមួយចំនួនផងដែរ ។
« ជេនីលីន » ម៉ាក់ហៅ ។
« អឹមម ? » ជេនីលីនមិនខ្ចីសូម្បីតែសម្លឹងមើលលើកនេះ ។
ម្តាយបាននិយាយថា « យើងមានបាយឆាគ្រឿងសមុទ្រនៅយប់នេះ » ។ តើកូនអាចជួយម៉ាក់ធ្វើវាបានទេ ?
ជេនីលីនចូលចិត្តបាយឆាគ្រឿងសមុទ្រណាស់ ។ ប៉ុន្តែ នាងមិនចង់ក្រោកឡើងទេឥឡូវនេះ ។
នាងបានសួរថា « តើកូនគ្រាន់តែរៀបតុបានទេ ? » « កូនក៏អាចជួយលាងចានក្រោយញ៉ាំហើយផងដែរ » ។
ម៉ាក់បានឆ្លើយថា « អ៊ីចឹងក៏បាន »។ « ប៉ុន្តែកូនត្រូវរៀបវាឲ្យបានត្រឹមត្រូវនៅពេលម៉ាក់ប្រើ ។ បន្ទាប់មកវាដល់ពេលហុចទូរស័ព្ទមកវិញ ។ ព្រមទេ ? »
ជេនីលីន បាននិយាយថា « ព្រម » ។
ជេនេលីនបានបន្តមើលវីដេអូតទៅទៀត ។ ជាថ្មីម្តងទៀត នាងមានអារម្មណ៍ថានាងមិនគួរមើលវាទេ ។ ប៉ុន្តែនាងពិតជាចង់មើលវីដេអូមួយទៀតណាស់ ។ ហើយវីដេអូបន្ទាប់ទៀត ។ ហើយវីដេអូបន្ទាប់ទៀត ។ អូស ។ អូស ។ វាពិបាកបញ្ឈប់ណាស់ !
ចុងក្រោយជេនីលីនបានដាក់ទូរស័ព្ទចុះ ។ ប្រហែលជានាងអាចមើលវីដេអូមួយចុងក្រោយឲ្យចប់សិន . . . .
អត់ទេ ជេនីលីន ប្រាប់ខ្លួនឯងយ៉ាងម៉ឺងម៉ាត់ ។ ព្រះវិញ្ញាណបរិសុទ្ធបានបំផុសគំនិតដល់នាង ហើយនាងចង់ស្តាប់តាម ។ ដៃរបស់នាងនៅតែក្បែរទូរស័ព្ទ ។ វាល្បួងខ្លាំងណាស់ ! ជេនីលីនបានប្រឹងបិទភ្នែករបស់នាង ។
ព្រះវរបិតាសួគ៌ដ៏ជាទីស្រឡាញ់ នាងបានអធិស្ឋានដោយស្ងៀមស្ងាត់ ។ កូនខំព្យាយាមស្តាប់តាមព្រះវិញ្ញាណបរិសុទ្ធ កូនត្រូវការជំនួយ ។ កូនចង់ឈប់មើលវីដេអូទាំងអស់នេះ តែកូនមិនប្រាកដថាត្រូវធ្វើយ៉ាងម៉េចទេ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។
ភ្លាមនោះ ម៉ាក់ក៏បានហៅនាងឲ្យរៀបតុ ។ ជេនីលីនបានក្រោកឡើងហើយញញឹម ។ នេះគឺជាវិធីមួយដើម្បីជួយនាងឲ្យឈប់មើលទូរសព្ទ ។
ជេនីលីនបានរៀបចាននៅលើតុ ។ « ម៉ាក់ ខ្ញុំបានឃើញរឿងអាក្រក់ខ្លះនៅលើទូរស័ព្ទ » នាងបានភ្លាត់មាត់និយាយចេញមក ។
ម៉ាក់ងើបមុខឡើងពីការធ្វើម្ហូបរបស់គាត់ ។ « តើរឿងបែបណា ? »
« ដូចជាពាក្យអាក្រក់ៗ និងវីដេអូមិនល្អអីណឹង » ។ ជេនីលីនបានញាក់ស្មា ។ « ប៉ុន្តែវាមិនមែនជារឿងអាក្រក់ ទាំងអស់ នោះទេ » ។
« តើកូនបានធ្វើអ្វីនៅពេលឃើញរឿងអាក្រក់អ៊ីចឹង ? » ម៉ាក់បានសួរ ។
ជេនីលីនបាននៅស្ងៀមមួយសន្ទុះ ។ នាងបានដាក់ពែងមួយនៅកន្លែងនីមួយៗ ។
នាងបាននិយាយថា « ខ្ញុំបានបន្តមើលវា » ។ ខ្ញុំអត់ដឹងថាហេតុអីទេ ។ ប៉ុន្តែព្រះវិញ្ញាណបរិសុទ្ធបានប្រាប់ខ្ញុំឲ្យឈប់ ដូច្នេះខ្ញុំបានពោលពាក្យអធិស្ឋានសុំជំនួយ » ។
ម្តាយបានដាក់ចានបាយឆាគ្រឿងសមុទ្រដែលក្តៅហុយនៅលើតុ ។ ម៉ាក់បាននិយាយថា « ពេលខ្លះវាពិតជាពិបាកណាស់ក្នុងការឈប់ធ្វើអ្វីមួយ ទោះបីជាយើងដឹងថាវាមិនល្អក៏ដោយ » ។ « ហើយនៅពេលដែលរឿងនោះកើតឡើង ការណ៍ដែលល្អបំផុតដែលយើងអាចធ្វើបាននោះគឺអធិស្ឋាន » ។
ជេនីលីនបានញញឹម ។ « អ៊ីចឹងខ្ញុំបានធ្វើអ្វីមួយត្រឹមត្រូវ » ។
« កូនពិតជាធ្វើបានល្អណាស់ » ។ ម៉ាក់បានហុចស្លាបព្រាទៅឲ្យជេនីលីនដាក់នៅលើតុ ។ « ហើយអ៊ីនធឺណែតមិនអាក្រក់ទាំងអស់ទេ ។ វាអាចជួយយើងឲ្យទាក់ទងជាមួយមិត្តភក្តិ និងចែកចាយគំនិតយោបល់ ។ ប៉ុន្តែវាអាចពិបាកនៅក្នុងការនៅឲ្យឆ្ងាយពីរឿងអាក្រក់ទាំងអស់ផងដែរ ។ ពីពេលនេះទៅបើកូនមើលវីដេអូ យើងមើលវាជាមួយគ្នា ។ ធ្វើបែបនេះប៉ា និងម៉ាក់អាចជួយបាន ប្រសិនបើកូនឃើញអ្វីមួយមិនល្អ » ។
ជេនីលីនបានងក់ក្បាល ។ លើកក្រោយមកនាងបានមើលវីដេអូជាមួយម៉ាក់ និងប៉ា ។ ប៉ុន្តែទំរាំដល់ពេលនោះ មានរឿងសប្បាយជាច្រើនដែលនាងអាចធ្វើបានដោយគ្មានទូរស័ព្ទ ។
« តើកូនប្រាប់អ្នករាល់គ្នាថាវាដល់ពេលញ៉ាំអាហារពេលល្ងាចហើយ បានទេ ? » ម៉ាក់បានសួរ ។
« ចាស ! ពេលញ៉ាំអាហារពេលល្ងាចហើយ ខ្ញុំនឹងគូររូបជាមួយចូចូ ! »
រចនារូបភាពដោយ មិជ មីលល័រ