“Usa ka Saad sa Bunyag,” Higala, Mayo 2024, 8–9.
Usa ka Saad sa Bunyag
“Ngano man nga gusto nimo nga mabunyagan?” Nangutana si Papa.
Kini nga istorya nahitabo sa USA.
“Pa, pwede ba ko nga magpabunyag kon mag-otso na ko?” Nangutana si Keaton.
Si Papa mihangad gikan sa ilang gidulaan. “Dako kana nga pagpili. Mas maayo ba kaha nga maghulat hangtod nga ikaw mag-18?”
Naghunahuna si Keaton mahitungod niini. “Apan hapit na ko mag-otso karon. Ug ang 18 layo pa kaayo!”
Nahilom og kadiyot si Papa. Iyang giduso ang iyang piyesa sa dula. “Ngano man nga gusto nimo nga mabunyagan?”
“Gihigugma nako si Jesus,” miingon si Keaton. “Ug gusto ko nga mosunod Niya.”
“Kana mao ang usa ka dako kaayo nga rason aron magpabunyag,” miingon si Papa. Mipahiyom siya. “Suportahan ka nako kon kana mao ang imong gipili. Ma-otso ka man o ma-18.”
Gigakos ni Keaton si Papa. “Salamat!”
Si Papa dili miyembro sa Ang Simbahan ni Jesukristo sa mga Santos sa Ulahing mga Adlaw. Apan mosimba gihapon siya kauban ni Keaton ug ni Mama usahay. Ug kon si Keaton mohatag og mga pakigpulong o mokanta kauban sa ubang mga bata sa Primary diha sa miting sa sakramento, si Papa kanunay nga moadto.
Human nga natapos ang ilang dula, si Keaton nakakita ni Mama sa kusina.
“Si Papa miingon nga ako mahimong bunyagan kon ako mag-edad na og otso anyos,” siya miingon.
Mingisi si Mama. “Makapahinam kaayo kana! Nakahunahuna ka na ba kon kinsa ang mobunyag nimo?”
Si Keaton miandam sa mga plato sa lamesa. “Sa imong hunahuna makahimo ba si Lolo?” Si Lolo ug Lola nagserbisyo og misyon sa lain nga siyudad.
“Mahimo kitang mohangyo,” miingon si Mama.
Human sa panihapon, si Keaton mitawag pinaagi sa bidyo ni Lolo ug Lola sa selpon ni Mama. Human sa pipila ka pagbagting, ang ilang mapahiyomon nga mga nawong mipuno sa screen.
“Kumusta, Lola! Kumusta Lolo!” Miingon si Keaton. “Tag-ana kon unsa? Bunyagan ko sa akong bertdey karong tuiga.”
“Maanindot kana!” Miingon si Lola.
“Pwede ba nga ikaw ang mobunyag nako, Lolo?” Nangutana si Keaton.
Mas midako pa ang pahiyom ni Lolo. “Ganahan gayod ko.”
Sa dihang miabot ang iyang adlaw sa pagbunyag, andam na si Keaton. Si Mama ug Papa mibiyahe niya padulong sa usa ka gamay nga chapel diin si Lolo ug Lola nagserbisyo og misyon.
Si Keaton ug Lolo nagsul-ob og puti nga mga sapot. Nagtupad sila og lingkod samtang nanganta ang tanan. Dayon si Mama militok og pag-ampo.
Sunod, si Papa mihatag og pakigpulong. “Kon ikaw bunyagan, ikaw misaad sa pagsunod ni Jesukristo ug motuman sa Iyang mga sugo. Siya mitudlo nato nga mohigugma sa usag usa. Ang gugma mao ang labing maayo nga paagi sa pagpakabuhi,” miingon siya.
Si Keaton mitan-aw sa litrato ni Jesus nga gigunitan ni Papa.
“Kon kita mohigugma sa uban, kini makapabati nila nga giamumahan. Makatabang usab kini kanato nga mahimong malipayon ug maadunay kalinaw.” Si Papa mitutok ni Keaton. “Mapagarbohon ko nimo karon sa pagsaad nga mosunod ni Jesukristo. Nanghinaot ko nga ang imong bunyag kanunay nga mopahinumdom nimo sa paghigugma sa Dios ug paghigugma sa uban.”
Gigakos pag-ayo ni Keaton si Papa. Dayon misunod siya ni Lolo ngadto sa gamay nga bunyaganan. Si Keaton mibutang sa iyang usa ka kamot ngadto sa bukton ni Lolo ug ang usa sa kamot ni Lolo. Si Lolo militok sa mga pulong sa pag-ampo sa bunyag. Dayon mitabang siya nga ipaubos si Keaton ngadto sa tubig.
Sa dihang mihaw-as si Keaton gikan sa tubig, siya nagpahiyom. Nahimo niya kini! Siya nakasunod ni Jesukristo. Sa dili madugay, siya kompirmahan ug modawat sa gasa sa Espiritu Santo. Dayon siya mahimong miyembro sa Ang Simbahan ni Jesukristo sa mga Santos sa Ulahing mga Adlaw.
Si Keaton mahinamon sa pagtuman sa iyang saad nga mohinumdom ni Jesus ug motuman sa Iyang mga sugo.
Paghulagway pinaagi ni Alyssa Tallent