Usa ka Pakighinabi uban ni Isabela mahitungod sa mga Pakigsaad

Si Isabela gikan sa Alajuela, Costa Rica. Gipangutana namo siya og pipila ka pangutana kabahin sa unsay ipasabot sa pagtuman sa iyang mga pakigsaad sa bunyag.

Sultihi kami bahin sa imong kaugalingon.

Ako 13 anyos ang panuigon. Ganahan ko magdula og football, magluto, manahi, molangoy, ug moserbisyo sa uban. Ang akong pangandoy mao ang mamahimong veterinarian tungod kay ganahan ko motabang og mga hayop. Ang paborito nako nga mga pagkaon mao ang spaghetti ug pizza, ug ang akong paborito nga kolor mao ang purple.

Sa unsang paagi nimo matuman ang imong mga pakigsaad sa bunyag?

Ako makahinulsol ug makaambit sa sakramento matag semana. Aduna koy calling sa akong klase sa Young Women, ug naningkamot ko nga mohimo niini sa seryoso nga paagi. Ako usab mituman sa akong mga pakigsaad pinaagi sa pagserbisyo sa uban.

Unsay imong buhaton aron makaserbisyo sa uban?

Ganahan ko nga motabang sa akong pamilya. Kanunay kong makigdula sa akong tres anyos nga ig-agaw, si Lina, samtang nagtrabaho ang iyang mga ginikanan. Gusto kong motabang sa akong mga apohan kon magkinahanglan sila kanako. Motabang usab ko sa akong klasmeyt nga magtuon sa iyang mga eksam sa French diha sa eskwelahan.

Sultihi pa kami mahitungod sa imong calling.

Ako ang unang magtatambag sa akong klase sa Young Women. Ang akong mga tulumanon naglakip sa pagpangalagad ngadto sa batan-ong mga babaye. Kini nagpasabot sa pagtabang kanila sa bisan unsa nga ilang gikinahanglan. Moadto ko sa klase ug mga kalihokan, ug naningkamot ko nga mahimong higala ngadto sa ubang mga batang babaye diha sa akong klase kinsa dili motambong.

Unsa nga tambag ang imong ihatag sa usa ka tawo kabahin sa ilang unang calling?

Ako silang sultihan nga dili sila kinahanglang makulbaan. Ang usa ka calling mao lang ang paagi nga ikaw makatabang sa buluhaton sa Langitnong Amahan. Ang labing maayong paagi sa pagtabang sa uban mao ang pinaagi sa imong ehemplo!

Mga paghulagway pinaagi ni Vivian Mineker