“Panahon sa Istorya sa Kasulatan,” Higala, Mayo 2024, 30–31.
Panahon sa Istorya sa Kasulatan
“Kinsay dunay libro nga gusto nila nga akong basahon karon?” Si Mr. Otoo nangutana.
Kini nga istorya nahitabo didto sa Ghana.
“Oras na sa pagbasa,” miingon si Mr. Otoo.
Milingkod og tarong si Nyameye. Ang oras sa pagbasa makalingaw!
Kada adlaw sa eskwelahan, ang ilang magtutudlo magbasa og kusog nganha sa klase. Usahay magbasa siya kabahin sa mga hayop. Usahay magbasa siya kabahin sa mga tawo sa laing mga nasod. Ug usahay mangutana siya sa klase kon aduna ba silay libro nga gusto nila nga iyang basahon.
“Kinsay dunay libro nga gusto nila nga akong basahon karon?” Si Mr. Otoo nangutana.
Si Nyameye miisa sa iyang kamot. “Duna ko!” Giablihan niya ang iyang bag ug gikuha ang iyang paborito nga libro. Usa kadto ka libro sa istorya sa Basahon ni Mormon! Gidala niya kini aron basahon human sa eskwela samtang maghulat sa iyang inahan nga mokuha kaniya. Ang pagtan-aw sa mga hulagway nakatabang kaniya nga makasabot sa mga istorya sa kasulatan.
Si Mr. Otoo mipahiyom dihang iyang nakita ang dako nga libro. “Wala tay oras nga basahon ang tanan niini. Duna bay piho nga bahin nga gusto nimo nga akong basahon?”
“Oo,” miingon si Nyameye. Iyang gipakli ang mga pahina hangtod nakit-an niya ang iyang paborito nga istorya. “Mahimo ba nimong basahon kini, palihog? Gitawag kini og ‘Ang Damgo ni Lehi.’”
“Unsa mahitungod kini nga istorya?” Si Mr. Otoo nangutana.
“Mahitungod kini sa usa ka propeta nga dunay panan-awon. Nakakita siya og matahom nga kahoy nga dunay lamian nga bunga.” Si Nyameye mitudlo ngadto sa usa ka hulagway sa kahoy. “Gusto niya nga ang iyang pamilya mokaon sa bunga uban niya. Pwede ba nimo kining basahon?” Gidunol ni Nyameye ang libro ngadto sa iyang magtutudlo.
“Siyempre,” miingon si Mr. Otoo. Dayon misugod siya pagbasa og kusog. Gibasa niya ang mahitungod sa pig-ot nga agianan paingon ngadto sa kahoy. Gibasa niya ang mahitungod sa gunitanan nga puthaw. Ug gibasa niya ang mahitungod sa pagsunod sa mga sugo.
Ang higala ni Nyameye si Selorm miisa sa iyang kamot. “Unsa nga klase sa kahoy kana?” nangutana siya ni Nyameye.
“Wala ko kahibalo,” miingon si Nyameye. “Apan ang bunga lami kaayo. Mas maayo pa kini kaysa punoan sa mangga!” Dayon si Nyameye mihunong aron maghunahuna. “Sa simbahan, akong nakat-onan nga ang bunga nagsimbolo sa gugma sa Dios. Busa makataronganon nga kini lamian ug espesyal!”
Pagkahuman sa klase, si Nyameye milingkod sa gawas aron maghulat sa iyang inahan. Iyang gikuha ang iyang libro sa istorya sa Basahon ni Mormon aron magbasa pa og dugang.
“Nindot kana nga istorya,” miingon si Selorm. Milingkod siya tupad ni Nyameye. “Pwede ba ko magbasa og lain uban nimo?”
“Oo!” Gipakli ni Nyameye ang laing istorya. Gibasa nila ang mahitungod nila ni Abinadi ug Hari Noah.
Daghan pa sa ilang mga klasmeyt miabot aron maminaw. Kon duna silay mga pangutana, tubangon sila ni Nyameye. Gipangutana pa gani niya sila aron masulayan sila bahin sa mga istorya nga ilang gibasa!
Dayon nakita ni Nyameye ang iyang inahan nga naglakaw padulong nila. “Salamat sa pagbasa uban kanako,” miingon siya ngadto sa ubang mga bata. Iyang gisirado ang libro ug mipahiyom. Malipayon siya nga ang iyang mga higala ganahan sa iyang paborito nga mga istorya sama sa iyang gibuhat.
Paghulagway pinaagi ni Zhen Liu