“Panaghigalaay sa Chess,” Higala, Mayo 2024, 14–15.

Panaghigalaay sa Chess

Ni Olivia Kitterman

(Gibase sa usa ka tinuod nga istorya)

Unsaon nila sa pagdula kon dili sila magkasinabot sa usag usa?

Kini nga istorya nahitabo sa Germany.

“Kalag ko may kasanag karon!” Mikanta si Matvii. Ang iyang mama ug igsoong lalaki, si Tymofii, mikanta uban niya. Ngitngit sa gawas sa bintana sa sakyanan. Apan ang kanta nakatabang nga ang tanan mobati nga may gamay nga paglaom.

Makahadlok nga higayon kadto alang ni Matvii ug sa iyang pamilya. Sila mobalhin sa Germany tungod kay ang ilang panimalay dili na luwas. Sila nagbiyahe og duha na ka adlaw, ug karon hapit na sila moabot. Usa ka bishop dinhi sa Germany ang nagdrayb nila ngadto sa usa ka dapit nga kapuy-an.

Nalipay si Matvii nga ang Langitnong Amahan mitabang nila nga maabot sa Germany nga luwas. Apan gimingaw siya ni Papa. Siya kinahanglan nga magpabilin sa ilang nasod tungod sa gubat. Si Matvii nabalaka og maayo mahitungod kaniya.

Ang bishop mi-parking sa sakyanan gawas sa usa ka balay. “Welcome sa akong panimalay.”

Gikuha ni Matvii ang iyang bag ug misunod sa iyang pamilya sa sulod. Hilom kadto. Ang pamilya sa bishop seguro natulog og sayo.

“Mahimo kamo nga mopuyo sa mga lawak ni Mat ug Lore samtang naa mo dinhi,” miingon ang bishop.

“Kadiyot lang,” miingon si Mama. “Dili nila kinahanglan nga mobiya sa ilang mga lawak tungod namo.”

Mipahiyom ang bishop. “Malipay silang mobuhat niini. Gusto namo nga mobati mo nga komportable.”

Mitando si Mama. “Salamat.”

Pagka buntag, si Matvii ug Tymofii miadto sa kusina aron mamahaw. Ang bishop naglingkod atubangan sa lamesa kauban ang usa ka batang lalaki ug batang babaye. Morag dili sila magkalagyo og edad ni Matvii.

“Kini mao ang akong mga anak nga si Mats ug Lore,” miingon ang bishop.

“Maayo nga pag-ila-ila ninyo,” miingon si Tymofii.

Si Mats ug Lore mora og naglibog og gamay.

“Dili sila makamao sa inyong pinulongan,” miingon ang bishop. “Apan segurado ko nga mahimo mo nga maayong managhigala.”

Mimug-ot ang nawong ni Matvii. Unsaon nila pagkahimong managhigala kon dili sila magkaistoryahanay sa usag usa? Gibati niya nga ang kasanag nga iyang gikanta kagabii kay nawala.

Human sila mokaon, si Mats ug Lore mipakita nila sa usa ka lawak nga dulaanan. Duha ka mas manghod nga mga bata ang nagdula og pipila ka dulaan. Gitag-an ni Matvii nga sila mga manghod ni Mats ug Lore.

Si Mats adunay gisulti nga usa ka butang. Mora kini og usa ka pangutana, apan si Matvii wala makahibalo unsay iyang gisulti. Si Mats milingkod ug giablihan ang usa ka kahon sa mga kard. Iya kining gihan-ay ngadto sa mga tapok. Dayon siya ug si Lore mipunit sa ilang mga kard. Si Matvii ganahan nga modula. Apan wala siya makahibalo kon unsaon!

Gibutang ni Mats ang usa ka kard ug mitan-aw kang Matvii. Aduna na usab siyay gisulti.

Gusto nga mohilak ni Matvii. Dili siya gusto nga mopuyo sa Germany kon dili siya makasabot ni bisan kinsa.

Si Lore misulti og usa ka butang ni Mats, dayon midagan ngadto sa aparador. Mibalik siya ug nagbutang og bag-o nga dulaan sa salog.

Nakahibalo si Matvii niini nga dula. Ang kahoy nga mga piyesa mora og parehas sa unsay anaa niya sa balay. Chess kadto! Nakadula siya og chess uban ni Papa sa daghang oras. Malipayong mitando si Matvii. Nakahibalo siya kon unsaon kini pagdula.

Dako ang pahiyom ni Lore ug gisugdan ang pagpahimutang sa mga piyesa.

Giduso ni Matvii ang iyang pawn sa duha ka kuwadrado ug gibantayan si Lore nga miduso sa iyang kabayo. Dayon giduso ni Matvii ang iyang bishop ngadto sa kabayo ni Lore. Siya ug si Tymofii miabiba. Si Lore mihimo og nadismaya nga tingog, apan nagpahiyom siya.

Nagdula sila sa taas nga panahon. Sa wala madugay nagkinataw-anay na sila. Dili sila magkasinabtanay sa mga pulong sa usag usa, apan nalingaw gihapon sila.

Sa misunod nga pipila ka semana, nakakita sila og uban pa nga mga dula nga nahibaloan nilang tanan. Nagdula sila og football sa gawas kauban ang uban nga mga batang German. Nakakat-on na usab si Matvii og pipila ka pulong nga German. Usahay masayop siya, apan nagpadayon siya sa pagpaningkamot.

Gimingaw gihapon si Matvii sa iyang papa ug sa iyang panimalay. Apan mapasalamaton siya nga ang Langitnong Amahan mitabang niya nga makahimo og bag-o nga mga higala.