Pagkamabination Panahon sa Tingpaniudto

Ni Alelie Coronel-Camitan

(Gibase sa usa ka tinuod nga istorya)

Ang uban bang mga batang lalaki modaog-daog usab kaniya?

Kini nga istorya nahitabo sa Pilipinas.

Nakadungog si Dave nga nanuktok ang iyang mama sa pultahan sa iyang lawak. Oras na aron mobangon. Mibangon siya sa iyang higdaanan ug nanghilam-os. Dayon miadto siya sa iyang Mama, Papa, ug mga igsoon nga naa sa atubangang lawak.

“Maayong buntag,” miingon si Mama. Nagduka nga mipahiyom si Dave. Nangluhod ang pamilya, ug si Papa ang nag-ampo sa pagsugod sa ilang adlaw.

“Gusto kong mopakigbahin og talagsaon nga kasulatan karong buntaga,” miingon si Mama. Giablihan niya ang Basahon ni Mormon. “Mao kini ang Moroni 7:45. ‘Ug ang gugma nga putli mainantoson, ug mabination.’”

Naghunahuna si Dave kabahin sa kasulatan samtang nangandam siya alang sa eskwelahan. Sa wala pa siya mogawas sa pultahan, nag-ampo siya. “Palihog tabangi ko nga mahimong mabination karong adlawa” nag-ampo siya.

Diha sa klase, gibati ni Dave nga malipayon samtang gihimo ang iyang buluhaton sa eskwelahan. Naminaw siya og maayo samtang si Titser Frida mihatag kanila og pipila ka bag-ong espeling sa mga pulong nga kat-onan.

Wala madugay tingpaniudto na. Mipalit si Dave og pipila ka kamote cue ug pipila ka bugnaw nga juice. Milingkod siya kauban ang iyang mga higala ug misugod pag-istoryahanay.

Wala madugay nakadungog siya og pipila ka mga bata sa sunod nga lamesa. Duha ka batang lalaki ang nagbugal-bugal sa bag-ong batang lalaki nga ginganlan og Jose. Si Jose mubo para sa iyang edad, apan buotan siya ngadto sa uban ug naningkamot og maayo sa klase. Ang ubang mga batang lalaki adunay mga paniudto, apan si Jose wala.

“Nganong mubo man ka kaayo? Wala ba kay pagkaon sa balay?” nangutana si Antonio.

Milingi si Dave ngadto sa mga batang lalaki sakto sab nga nakita si Joaquin nga mikuha sa bag ni Jose ug milabay niini ngadto ni Antonio. Midagan si Jose ngadto ni Antonio aron kuhaon og balik ang iyang gamit.

“Palihog ambi ang akong bag,” miingon si Jose.

Apan sila si Antonio ug Joaquin wala maminaw. “Ang imong bag kay karaan kaayo ug bati!” miingon si Joaquin.

Nakadungog si Dave sa tanan niining bati nga mga pulong, apan nakulbaan siya nga tabangan si Jose. Unsa kaha ang hunahunaon sa ubang mga bata? Sila si Joaquin ug Antonio mohimo ba usab niyang kataw-anan?

Dayon nakahunahuna siya kabahin sa kasulatan nga gibasa ni Mama nianang buntaga. Ang gugma nga putli mabination. Si Jesukristo gusto nga siya mahimong mabination. Mao kana ang sakto nga buhaton.

Mibarog si Dave ug miatubang sa mga batang lalaki. “Hunonga ang pagbugal-bugal kang Jose. Palihog iuli kaniya ang iyang bag.”

“Unsay imong problema?” nangutana si Joaquin.

“Nganong bati man kaayo ang pagtratar ninyo kang Jose? Wala siyay gibuhat nga sayop,” miingon si Dave. Unya miginhawa siya og lawom. “Si Jesus nahigugma kanatong tanan, ug gusto Niya nga kita magmabination. Palihog hunonga ang pagbugal-bugal kang Jose. Ang pagdaog-daog sayop. Kon permi ninyo kining buhaton, adtuon nako si Titser Frida.”

Gitan-aw ni Antonio ang iyang mga sapatos. Iyang giuli ang bag ni Jose. “Pasayloa,” nagbagulbol siya. Siya ug si Joaquin mibalik sa ilang lingkoranan.

“Salamat,” miingon si Jose.

Gipikpik ni Dave ang abaga ni Jose. “Managhigala na ta karon.”

Mipahiyom si Jose.

Sa balay, gisultihan ni Dave ang iyang pamilya kon unsay nahitabo.

“Dili kana sayon, apan gibuhat nimo ang sakto nga butang,” miingon si Papa.

“Mapasigarbohon ko sa imong pagkamabination,” miingon si Mama.

Pagka sunod adlaw samtang mitabang si Mama pagputos sa iyang paniudto, nangutana si Dave, “Pwede ba nga maghimo ta og duha ka sandwich?”

“Ngano man? Ana na gyod ka kagutom?” Nangutana si Mama.

Mikatawa si Dave. “Dili, apan gahapon nakamatikod ko nga si Jose walay pagkaon. Gusto kong mopakigbahin og pipila sa akoa.”

“Nindot kaayo kana nga ideya!” Mikuha si Mama og dugang pa nga pan ug naghimo si Dave og laing sandwich.

Sa tingpaniudto, sila si Dave ug Jose nanglingkod ug dungan nga mikaon sa ilang mga sandwich. Nagkinahanglan kini og kaisog aron mahunong ang ubang mga bata sa pagdaog-daog kang Jose. Apan si Dave ganahan sa iyang bag-o nga higala, ug siya nasayod nga ang Langitnong Amahan nalipay nga iyang gipili nga magmabination.

Mga paghulagway pinaagi ni Mark Robison