“Limpyo na Usab,” Higala, Mayo 2024, 18–19.
Limpyo na Usab
Dili gani ko makapili og matarong sa usa ka adlaw! Naghunahuna si Emily.
Kini nga istorya nahitabo sa USA.
Si Emily mibarog sa tubig uban ni Papa ug mipahiyom. Naghulat siya niini nga adlaw sa daghan nang semana! Ang iyang kasingkasing gikulbaan tungod kay wala pa gayod siya mahumol sa tubig kaniadto. Apan siya mahinamon kaayo nga mabunyagan sama ni Jesukristo.
Gipiyong niya ang iyang mga mata ug naminaw ni Papa nga militok sa pag-ampo sa bunyag. Dayon iyang gipislit ang iyang ilong, gipiyong ang iyang mga mata, ug gipiko ang iyang mga tuhod samtang si Papa mituslob niya ngadto sa tubig.
Si Papa dali nga mibira niya pabalik, ug ang tubig mitulo gikan niya. Si Emily kinahanglan nga motrapo niini gikan sa iyang mga mata, apan nagpahiyom siya. Lahi na ang iyang gibati karon. Siya mibati og kalipay sa bag-o nga paagi. Ganahan siya nga kanunay nga mobati niini!
Si Papa migakos og maayo niya. Nakahibalo ko unsaon nga magpabilin kini nga maayo nga pagbati, naghunahuna si Emily. Ang kinahanglan lang nako nga buhaton mao ang pagpili sa matarong ug mahimong sama ni Jesukristo! Mibati siya og kasegurohan nga mahimo niya kini.
Sa dihang naabot sila sa panimalay, si Emily midagan gikan sa sakyanan ngadto sa atubangan nga pultahan. Mao usab ang iyang upat ka tuig ang edad nga igsoong lalaki, si Jonah. Sa pag-abot gayod ni Emily sa pultahan ug nagsugod sa pag-abli niini, gikuptan ni Jonah ang iyang sayal ug gibira—og kusog kaayo.
“Ayaw!” Misiyagit si Emily. Iyang gibira ang iyang sayal gikan sa iyang mga kamot. Dayon iyang gibabagan ang iyang agianan aron dili siya makasulod og una. Mibati siya og tumang kasuko!
Sa kalit lang nahunong siya. Usa ka lain kaayo nga pagbati ang milukop kaniya. Mipadaplin siya ug gitugotan si Jonah nga modagan sa sulod.
“Pasaylo!” siya mitawag niya. Nakahimo siya karon lang gayod og sayop nga pagpili. Ang Manluluwas dili gayod mosiyagit ni Jonah. Giunsa man nga nakahimo man dayon siya og sayop? Ang iyang bag-o nga malipayong pagbati nahanaw.
Nasipyat gayod ko, naghunahuna siya. Dili gani ko makapili og matarong sa usa ka adlaw!
Pagkasunod adlaw mao ang Dominggo. Samtang si Emily nangandam aron mosimba, naghunahuna siya kon giunsa niya pagsiyagit si Jonah. Lain pa gihapon ang iyang gibati.
Atol sa miting sa sakramento, ang Bishop mihangyo ni Emily nga moadto sa atubangan. Siya kompirmahan. Kana nagpasabot nga iyang madawat ang gasa sa Espiritu Santo. Milingkod siya sa lingkoranan. Mainampingon nga gipatong ni Papa ang iyang mga kamot sa iyang ulo.
Gipiyong ni Emily ang iyang mga mata samtang nagsugod si Papa. Nadungog niya nga misulti siya sa mga pulong, “Dawata ang Espiritu Santo.”
Si Emily padayon nga naminaw.
“Emily, hinumdomi kanunay nga tungod ni Jesukristo, makahinulsol ka kon makahimo ka og sayop nga pagpili,” miingon si Papa. “Matag higayon nga moambit ka sa sakramento, mahimo ka nga maghunahuna sa pakigsaad nga imong gihimo sa dihang ikaw gibunyagan. Mahimo ka nga mosaad pag-usab nga mosunod Kaniya.”
Samtang si Papa mitapos sa panalangin, si Emily mibati og kalipay ug kamalinawon. Nakahibalo siya nga ang Espiritu Santo nagsulti kaniya nga mahimong maayo ra ang tanan. OK lang nga dili siya hingpit. Tungod ni Jesukristo ug sa Iyang Pag-ula, siya makahinulsol ug mapasaylo! Naguol siya nga iyang gisiyagitan si Jonah, ug ang Langitnong Amahan nakahibalo nga siya padayon nga maningkamot.
Mingisi si Emily samtang siya ug si Papa mibalik sa ilang mga lingkoranan. Ang sakramento mosunod, ug si Emily naghulat niini.
Mga paghulagway pinaagi ni Audrey Day