Dali, Sunod Kanako nga mga Kalihokan

Alang sa home evening o pagtuon sa kasulatan—o alang sa kalingawan lamang!

Lakaw sa Iyang mga Tunob

Alang sa Mosiah 4–6

Si Hari Mosiah naghupot sa mga sugo ug “naglakaw diha sa mga pamaagi sa Ginoo” (Mosiah 6:6). Diha sa usa ka piraso nga papel, isubay ang imong tiil ug guntinga ang porma. Sulati ang imong tunob og paagi nga makasunod ka ni Jesus. Ibutang ang imong tunob kon diin ikaw makahinumdom sa pagsunod sa ehemplo ni Jesukristo.

Alang sa mas gagmay nga mga bata: Maglakaw-lakaw. Ipapraktis sa imong anak ang pagtunob sa imong tinumban. Hisgoti kon sa unsang paagi kita makasunod ni Jesukristo pinaagi sa pagbuhat sa mga butang nga Iyang gibuhat, sama sa pagtabang sa uban ug magpabunyag.

Sunda ang Propeta

Alang sa Mosiah 7–10

Si Ammon nagtudlo nga ang mga propeta makakita sa mga butang nga moabot (tan-awa sa Mosiah 8:16–17). Paklia sa pahina 2 aron basahon ang mensahe ni Presidente Nelson gikan sa kinatibuk-ang komperensiya. Unsa ang iyang gitudlo kanato? Drowinga ang hulagway bahin niini ug ipadala kini kanamo diha sa Higala.

Alang sa mas gagmay nga mga bata: Kantaha ang “Sunda ang Propeta” (Songbook sa mga Bata, 41) uban sa imong mga bata. Matag higayon nga kantahon ninyo ang pulong nga propeta, tudloa ang litrato sa propeta.

Usa ka Kahayag sa Kangitngit

Alang sa Mosiah 11–17

Si Abinadi nagtudlo nga si Jesukristo mao ang “usa ka kahayag nga walay kataposan, nga dili gayod mahimo nga mongitngit” (Mosiah 16:9). Pagtago og usa ka butang diha sa balay. Palonga ang mga suga ug ipasulay kini sa pagpangita sa matag usa diha sa ngitngit. Dayon tagoi ang butang ug sulayi kini sa pagpangita nga nagsiga ang mga suga o gamit ang mga ispat. Hain sa mga paagi ang mas sayon? Sa unsang paagi si Jesus motabang kanato sama sa kahayag nga mitabang kanimo?

Alang sa mas gagmay nga mga bata: Ipapraktis sa imong anak ang pagpasiga ug pagpalong sa ispat o lampara. Dayon hisgoti kon sa unsang paagi si Jesukristo usa ka kahayag nga dili gayod matago o mapalong.

Mga Kasingkasing Nabugkos diha sa Pagkahiusa

Alang sa Mosiah 18–24

Si Alma nagtudlo kanato sa pagbaton sa atong “mga kasingkasing nabugkos diha sa pagkahiusa ug diha sa gugma” (Mosiah 18:21). Kana nagpasabot nga kita kinahanglang magtambayayong ug mopakita og gugma ngadto sa uban. Paghimo og kutay sa mga kasingkasing aron sa pagpahinumdom kanimo! Guntinga ang ubang papel nga mga kasingkasing ug sulati og ngalan sa sakop sa pamilya ang matag usa. Busloti ang matag kasingkasing ug butangi kini og higot aron masumpay ang mga kasingkasing. Ibitay ang imong kutay sa mga kasingkasing sa dapit nga makita nimo kini kanunay!

Alang sa mas gagmay nga mga bata: Pangutan-a ang imong mga anak og usa ka butang nga ilang ganahan mahitungod sa matag tawo diha sa pamilya. Sultihi ang imong anak og butang nga ilang gibuhat nga nagpakita og gugma ngadto sa uban!

Mga paghulagway pinaagi ni Katy Dockrill