Pakigbahin sa Gugma sa Dios

Ni Carolina Maldonado

(Gibase sa usa ka tinuod nga istorya)

Si Thais wala kahibalo kon unsay iistorya o buhaton, apan siya gustong motabang.

Kini nga istorya nahitabo sa Bolivia.

Init kadto nga kabuntagon. Si Thais ug ang iyang higala si Claudia nag-istoryahanay ug nagkataw-anay samtang sila naglakaw tabok sa soccer field. Bag-o lang sila nahuman sa klase didto sa gym, ug karon mopadulong na sila sa math.

Oras sa pag-break sa gagmayng mga bata. Si Thais nagtan-aw kanila nga nagdula.

Dayon nakakita siya og usa ka gamayng batang babaye nga nag-inusara sa may hagdanan. Dihang nagkaduol na sila, nakita ni Thais nga naghilak siya.

Gikamay ni Thais si Claudia aron moduol ngadto sa gamayng batang babaye.

Mikisdong si Claudia ug milingo-lingo sa iyang ulo nga dili. “Maulahi na ta.”

Sa wala pa makasulti si Thais, milakaw na si Claudia.

Si Thais mitan-aw sa gamayng batang babaye. Mga singko anyos pa siya. Ang iyang nawong nakatago tali sa iyang mga tuhod, ug gitabonan ang iyang ulo sa iyang mga kamot.

Milingkod si Thais tupad niya. Ang batang babaye miisbog og gamay.

“OK ra ka?” Gipangutana og hinay ni Thais.

Ang batang babaye wala motubag. Si Thais dili segurado kon unsay isulti o buhaton.

“Makatabang ba ko nimo?” sunod niyang pangutana.

Mikibo ang batang babaye.

“Akong ngalan si Thais. Unsay imong ngalan?”

Sa kataposan ang batang babaye mitan-aw ni Thais. “Nicol.”

“Nganong naghilak man ka, Nicol?”

“Ang tanan misungog nako nga tambok,” misulti siya nga nagbakho.

Gitrapohan ni Thais ang nawong ni Nicol. “Naguol ko nga gisulti na nila. Dili importante kon unsay gihunahuna sa mga tawo.”

“Ingon sila dili daw ko gwapa.”

“Dili oy, sayop sila!” Miingon si Thais nga nagpahiyom. “Gwapa kaayo ka ug espesyal usab kaayo. Kahibalo ka ana?”

Naghunahuna si Thais sa usa sa iyang paborito nga mga kanta sa Primary. Nasayod na siya kon unsay isulti.

“Ikaw anak sa Dios,” miingon si Thais, gigunitan ang mga kamot sa batang babaye.

Si Thais nakig-istorya og kadiyot kang Nicol. Mipasabot siya kon unsa ka importante si Nicol ngadto sa Langitnong Amahan, sa iyang pamilya, ug sa daghan pang uban nga nahigugma kaayo kaniya. Sa hinay-hinay, si Nicol misugod og pahiyom.

Human sa pipila ka minuto, mintindog si Nicol ug migakos og hugot kang Thais. “Salamat!” miingon siya.

Nagtan-aw si Thais sa iyang bag-o nga higala nga midagan nga dunay dakong pahiyom. Nindot ang pamati nga nakatabang kang Nicol nga mobati og mas maayo ug makahibalo kon unsa siya ka pinangga sa Dios.

Dayon milukso usab si Thais. Kinahanglan kong modagan sama ni Nicol o maulahi ko sa math! naghunahuna siya, nagpahiyom samtang nagdali paingon sa klase.

Mga paghulagway pinaagi ni Flavio Remontti