“Na Yalayala ni Papitaiso,” iTokani, Me 2024, 8–9.
Na Yalayala ni Papitaiso
“Na cava na vuna o via papitaiso kina?” A taroga o Ta.
Na italanoa oqo a yaco mai Amerika.
“Ta, e rawa beka ni‘u papitaiso ni‘u sa yabaki walu?” A taroga o Keaton.
A rai cake mai o Tamaqu mai na qito e ratou a qito taka tiko. “E sa dua na digidigi levu qori. Ena sega beka ni vinaka cake kevaka mo wawa me yacova ni o sa yabaki 18?”
A vakasamataka o Keaton. “Ia au sa voleka ni yabaki walu oqo. Ka se yawa sara na yabaki 18!”
A vakagagalu mada vakalailai o Ta. A tosoya na nona tiki ni qito. “Na cava na vuna o via papitaiso kina?”
“Au lomani Jisu,” a kaya o Keaton. “Au vinakata me”u muri Koya.”
“Oqori e dua na vuna cecere me da papitaiso kina,” a kaya o Ta. A dredre mai. “Au na tokoni iko kevaka oya na ka o digitaka. Ke o yabaki walu se 18.”
A mokoti Ta o Keaton. “Vinaka!”
E sega ni lewena o Ta na Lotu i Jisu Karisito ni Yalododonu Edaidai. Ia e dau lako ga i lotu vata kei Keaton kei Na ena so na gauna. Ena gauna a vosa se lagasere kina o Keaton kei ira na vo ni gone ena Lalai ena soqoni ni sakaramede, e dau lako mai o Ta.
Ni sa oti na nodrau qito, a kunei Na o Keaton e valenikuro.
“A kaya o Ta niu rawa ni papitaiso niu sa yabaki walu,” a kaya o koya.
E vakasukadredre o Na. “Sa ka bibi sara oya! O sa bau vakasamataka beka se o cei o vinakata me na papitaisotaki iko?”
A tuva o Keaton na peleti ena teveli. “O nanuma beka ni rawa ni o tukaqu?” E rau a veiqaravi voli vakadaukaulotu ena dua tale na siti o Tukaqu kei Bubu.
“E rawa ni daru taroga,” a kaya o Angel.
Ni oti na vakayakavi, a qiri ena vidio vei Tutu kei Bubu ena talevoni nei Na o Keaton. Ni oti e vica na taqiri, sa laurai mai ena sikirini na matadrau mamarau.
“Bula, Bubu! Bula Tutu!” E kaya o Keaton. “Kila na cava? Au na papitaiso ena noqu siganisucu ena yabaki oqo.”
“Sa totoka dina qori!” A kaya o Bubu.
“E rawa beka ni o papitaisotaki au, Tutu?” A taroga o Keaton.
Sa qai serau cake ga mai na matamamarau nei Tutu. “Au taleitaka sara ga!”
Ni sa yaco mai na nona siga ni papitaiso, sa vakarau tu o Keaton. E rau a draivataki koya o Na kei Ta ki na dua na valenilotu lailai volekata na vanua e rau a kaulotu tiko kina o Tutu kei Bubu.
E rau a vakaisulu vulavula tu o Keaton kei Tutu. E rau a dabe vata ni ra lagasere kece tiko. A qai cabora o Na e dua na masu.
Oti, a vosa o Ta. “Ni ko sa papitaiso, o sa yalataka mo muri Jisu Karisito ka muria na Nona ivakaro. A vakavulici keda o Koya me da dau veilomani. Na loloma sa sala vinaka duadua ni bula,” a kaya o koya.
E raica o Keaton na iyaloyalo kei Jisu a taura tu o Tamana.
“Ni da lomani ira na tani, ena vakavuna me ra vakila ni ra kauwaitaki. E vukei keda talega me da bula marau ka taqomaki.” A rai vakadodonu vei Keaton o Ta. “Au marautaki iko nikua ena nomu yalayala mo muri Jisu Karisito. Au nuitaka ni nomu papitaiso ena dau vakananuma vei iko mo lomana na Kalou ka lomani ira na tani.”
A mokoti Ta vakaukauwa sarao Keaton. A qai muri Tutu ki na tobu lailai. A biuta o Keaton e dua na ligana ena qeteqete ni ligai Tutu kei na ligana kadua ena tolo ni ligai Tutu. A cavuta o Tutu na vosa ni masu ni papitaiso. A qai vukei Keaton sobu i loma ni wai.
Ni sa mata cake mai wai o Keaton, a mata dredredre sara. Sa rawata! Sa muri Jisu Karisito. Sega ni dede sa na vakadeitaki talega ka ciqoma na isolisoli ni Yalo Tabu. Sa na dua kina na lewe ni Lotu i Jisu Karisito ni Yalododonu Edaidai.
A marautaka o Keaton ni na maroroya na nona yalayala me nanumi Jisu ka muria na Nona ivakaro.
Droini mai vei Alyssa Tallent