“Veitokani ena Chess,” iTokani, Me 2024, 14–15.
Veitokani ena Chess
Era na qito vakacava kevaka era sega ni veikilai vakavinaka?
A yaco na italanoa oqo mai Jamani.
“Rarama na yaloqu ga!” A lagata o Matvii. E rau a lagasere vata kei koya o tinana kei ganena, o Tymofii. Sa buto sara ena tautuba ni katuba ni motoka. Ia na sere e a vukea me ramase cake vakalailai na veika kecega.
Oqo e dua na gauna vakarerevaki vei Matvii kei na nona matavuvale. E ratou sa toki i Jamani baleta ni sa sega ni taqomaki vinaka na nodratou vale. E rauta ni rua na siga na nodratou lako voli, oqo e ratou sa voleka sara ni yaco. E dua na bisopi eke e Jamani a draivataki ratou tiko ki na dua na vanua me ratou tiko kina.
A marau o Matvii ni a vukei ratou na Tamada Vakalomalagi me ratou yaco bula ki Jamani. Ia a vakananumi Tamana sara vakalevu. A tiko ga yani e nodratou vanua ena vuku ni dua na ivalu. E lomaleqataki koya vakalevu o Matvii.
A vakelea na motoka o bisopi ena tautuba ni dua na vale. “Dou sa kidavaki mai ki na noqu vale.”
A dreta na nona kato o Matvii ka muria na nona matavuvale ki loma. E a vakadigagalu na vanua. E ratou sa moce beka na matavuvale nei Bisopi.
“E rawa ni dou tiko ena rumu nei Mats kei Lore ni dou tiko voli eke,” a kaya o bisopi.
“Wawa,” a kaya o Na. “Me rau kakua ni vakalala na nodrau rumu me baleti keitou.”
A matadredredre o bisopi. “E ka ni marau vei rau. Keitou vinakata ga mo dou yalo vakacegu.”
A deguvacu o Na. “Vinaka vakalevu.”
Ena matakalailai ka tarava, e rau a gole ki valenikuro o Matvii kei Tymofii me rau katalau. A dabe toka ena teveli o bisopi kei na dua na gonetagane kei na goneyalewa lailai. E rau sega soti ni rairai qase cake mai vei Matvii.
“Oqo o rau na luvequ o Mats kei Lore,” a kaya o bisopi.
“Drau bula vinaka,” e kaya o Tymofii.
E rau veilecayaki vakalailai o Mats kei Lore.
“E rau sega ni kila na nomudrau vosa,” a kaya o bisopi. “Ia au kila ni dou na veitokani vinaka.”
E veveku na matai Matvii. E rawa vakacava ni ratou veitokani kevaka e ratou sega ni rawa ni veitalanoa? A vakila ni vaka me sa yali na matanisiga a lagata voli ena bogi.
Ni rau kana oti, a vakaraitaka vei rau o Mats kei Lore e dua na rumu ni qito. E rau qitotaka tiko e so na ka ni vakatatalo e rua na gone sobu. A kila rawa o Matvii ni rau tacidrau gone sobu o Mats kei Lore.
A kaya o Mats e dua na ka. E rogorogo vaka e dua na taro, ia e sega ni kila o Matvii na ka e tukuna. A dabe sobu o Mats ka dolava e dua na pakete imau. A tuvai ira vaka binibini. Rau sa qai tomika cake o koya kei Lore na nodrau imau. A vinakata o Matvii me qito. Ia a sega ni kila na kena qitotaki.
A biuta sobu o Mats e dua na imau ka raici Matvii. A tukuna tale e dua na ka.
A vinakata o Matvii me tagi. E sega ni vinakata me vakaitikotiko e Jamani kevaka e sega ni kila na ka era tukuna.
A kaya o Lore e dua na ka vei Mats, qai cici yani ki na kovati. A lesu mai o koya ka mai tuva e dua na qito vou ena fuloa.
A kila o Matvii na qito oqo. Na veitiki ni kau e vaka na irairai ni kena ka tu mai vale. Na chess! A dau qito chess vata kei Ta me vica vata na auwa. A deguvacu ena marau o Matvii. E kila o koya na qitotaki ni kena oqo.
A matadredredre o Lore ka tekivu tuvanaka na veitikina.
A tosoya o Matvii na nona pawn ena rua na lomanibai ka sarava ni sa tosoya yani o Lore na nona sotia. E tokitaki bishop o Matvii vei ratou na Lore. E rau marau kei Tymofii. A kudru ena rarawa o Lore, ia a matadredredre.
E ratou a qito me dua na gauna balavu. Sega ni dede e ratou sa veidredrevaki. E ratou sega ni veikilai vosa, ia e ratou veimarautaki ga.
Ena vica na macawa ka tarava, e ratou a kunea eso tale na qito e ratou kila taucoko. E ratou a qito veicaqe e tautuba kei ira eso tale na gone ni Jamani. A vulica talega o Matvii e vica na vosa vaka-Jamani. Ena so na gauna a cala o koya, ia a tovolea tikoga.
Ia a vakananumi tamana kei na nodratou itikotiko tikoga o Matvii. Ia a vakavinavinakataka ni vukei koya na Tamada Vakalomalagi me vakaitokani vou.
Droini mai vei Hannah Li