Wasea na Loloma ni Kalou

Mai vei Carolina Maldonado

(Yavutaki e na italanoa dina)

E sega ni kila o Thais na ka me tukuna se cakava, ia a vinakata me veivuke.

Na italanoa oqo a yaco mai Bolivia.

E a dua na mataka katakata. E rau veitalanoa ka veidredrevaki o Thais kei na nona itokani o Claudia ni rau taubale kosova tiko na rara ni soka. E rau se qai vakacavara ga na nodra kalasi ni vakaukauwa yago, ka oqo e rau sa lako tiko ki na kalasi ni fika.

Era sa vakacagicagi voli na gone sobu. E saravi ira o Thais ni ra qito tiko.

Ka qai raica e dua na goneyalewa lailai ni dabe duadua toka ga ena ikabakaba. Ni rau sa voleka yani, a raica o Thais ni tagi tiko.

A yalo yani o Thais vei Claudia me lako mai vua na goneyalewa lailai.

A matacudrucudru o Claudia ka kurea na uluna sega. “E daru na bera.”

Ni bera ni kaya o Thais e dua na ka, a sa tekivu daubale tani yani o Claudia.

A raici goneyalewa lailai o Thais. E rauta tiko ni yabaki lima o koya. E vuni tu na matana ena tadrua ni duruna, ka ubia na uluna ena ligana.

E dabe tikivi koya o Thais. A toso yani vakalailai na goneyalewa.

“O vinaka tiko?” A taroga vakamalua o Thais.

A sega ni sauma na goneyalewa. E sega ni kila o Thais na ka me cavuta se cakava.

“E rawa beka niu vukei iko?” a taroga tale.

A kurea na tabana na goneyalewa oqo.

Na yacaqu o Thais. O cei na yacamu?”

Sa qai rai cake na goneyalewa vei Thais. “Nicol.”

“Na cava o tagi tiko kina, a taroga o Nicol?’

“Era dau vakalialiai au na tamata kecega ni‘u levulevu,” e kaya o koya ena maliwa ni tagi.

A qusia na matai Nicol o Thais. “Vosota nira kaya na ka oqori. E sega ni dua na betena na ka era nanuma na tamata.”

“Era kaya ni‘u sega ni rairai vinaka.”

“Au vakabauta ni ra cala!” E tukuna yani ena matadredre o Thais. “O sa rui totoka ka talei sara. O kila tiko oya?”

A vakasamataka o Thais e dua na nona sere taleitaki ni Lalai. Sa qai kila o koya na ka me na kaya ena gauna oqo.

“O iko e dua na luve ni Kalou,” a kaya o Thais, ni taura tu na ligai goneyalewa lailai.

E rau veitalanoa vakalailai o Thais vata kei Nicol. A vakamacalataka o koya na bibi ni nona bula o Nicol i vua na Tamada Vakalomalagi, na nona matavuvale, kei na vuqa tale era lomani koya vakalevu. Vakalailai, sa tekivu matadredredre mai o Nicol.

Ni oti e vica na miniti, a tucake o Nicol ka mokoti Thais vakaukauwa. “Vinaka vakalevu,” a kaya o koya.

A saravi nona itokani vou o Thais ni sa cici yani ena matadredredre levu. E a vakila na yalo vinaka ena nona vukei Nicol me vinaka cake ka kila na levu ni nona lomani koya na Kalou.

Sa qai rika talega ki yavana o Thais. O au talega meu cici me vakataki Nicol de‘u na bera ki na kalasi ni fika! a vakasamataka, ena matadredredre ni vakusakusa yani ki na kalasi.

Droini mai vei Flavio Remontti