“Yalo Loloma ena Gauna ni Vakasigalevu,” iTokani, Me 2024, 36–37.
Yalo Loloma ena Gauna ni Vakasigalevu
Era na veiwalitaki koya talega na vo ni gonetagane?
Na italanoa oqo a yaco mai Filipaini.
A rogoca o Dave ni tukituki tiko o tinana ena nona katuba ni rumu ni moce. Sa gauna ni yadra. A duri mai na idavodavo ka tavoi. A qai tomani Na, Ta, kei iratou na tacina ena rumu e liu.
“Yadra,” a kaya o tinana. A matadredredre o Dave. E ratou tekiduru na matavuvale, ka cavuta o Ta e dua na masu me tekivu na nodratou siga.
“Au via wasea e dua na ivolanikalou cecere ena mataka nikua,” a kaya o Na. A dolava na iVola i Momani. “Oqo na Moronai 7:45. “Sa dau vosota vakadede na loloma, sa yalovinaka.’”
A vakasamataka o Dave na ivolanikalou ni sa vakarau lako i vuli. Ni bera ni gole yani e katuba, a masu o koya. “Yalovinaka ni vukei au meu yalovinaka nikua,” a masuta o koya.
Ena kalasi, a vakila o Dave na marau ni qarava na nona cakacaka ni vuli. A vakarorogo matua sara ni sa solia vei ira o Qasenivuli Frida eso na vosa ni sipeli vou me ra vulica.
Sega ni dede sa gauna ni vakasigalevu. A volia o Dave eso na pateta kamica vajokeliti kei na so na wainimoli batabata. A dabe vata kei ira na nona itokani ka tekivu veitalanoa.
Sega ni dede sa rogoci ira eso na gone ena teveli ka tarava. E rua na gonetagane e rau a vakasaga tiko e dua na gonetagane vou na yacana o Jose. E lailai toka ga Jose ka veicalati kei na nona yabaki, ia e dau vinaka vei ira tale eso ka dau cakacaka vakaukauwa ena kalasi. A tiko na kedra vakasigalevu na vo ni gonetagane, ia a sega na kei Jose.
“Na cava o sa rui ka lailai kina? E sega beka ni tiko na kemu kakana e vale?” a taroga o Antonio.
A vuki yani o Dave vei rau na gonetagane ena gauna oya me raici Joaquin ni kauta na kato nei Jose ka kolotaka vei Antonio. A cici muri Antonio o Jose me laki kauta lesu mai na nona iyaya.
“Yalovinaka solia mai vei au na noqu kato,” a kaya o Jose.
Ia rau a sega ni vakarorogo o Antonio kei Joaquin. “Sa rui makawa ka rairai ca na nomu kato!” e kaya o Joaquin.
A rogoca o Dave na vosa kece ni veivakacacani oqo, ia a nuiqawaqawa ni vukei Jose. Na cava era na vakasamataka na vo ni gone? E rau na veiwalitaki koya beka o Joaquin kei Antonio?
A qai vakasamataka na ivolanikalou a wilika o Na ena mataka o ya. Sa dau vinaka na loloma. E vinakata o Jisu Karisito me dau yalo loloma. Sa ka dodonu me vakayacori.
A tucake o Dave ka qaravi rau na vo ni gonetagane. “Kakua ni vakasagai Jose. Yalovinaka solia lesu na nona kato.”
“Na cava na nomu leqa?” a taroga o Joaquin.
“Na cava na vuna o sa rui ca kina vei Jose? A sega ni cakava e dua na ka cala o koya,” a kaya o Dave. A mai cegulevu yani o koya. “E lomani keda kece o Jisu, ka vinakata o Koya me da dau yalo loloma. Yalovinaka kakua ni vakasagai Jose. E cala na veivakatotoganitaki. Kevaka o na cakava tikoga, au na kauti Qasenivuli Finda mai.”
A vakaraica sobu o Antonio na nona ivava. A qai solia lesu tale na kato nei Jose. “Vosota,” a vosakudrukudru. Rau a lesu tale kei Joaquin ki na nodrau idabedabe.
“Vinaka,” a kaya o Jose.
A tavia na tabai Jose o Dave. “Keidaru sa veitokani ena gauna oqo.”
A matadredredre o Jose.
E vale, a talanoataka ki na nona matavuvale o Dave na veika a yaco.
“E sega ni rawarawa oya, ia o cakava na ka dodonu,” a kaya o Ta.
“Au dokai iko ena nomu dau yalo loloma,” a kaya o Na.
Ena siga ka tarava ni veivuke o Na ena kena vakatawani na kena ivakasigalevu, a taroga o Dave, “E rawa beka ni daru cakava e rua na seniwiji?”
Baleta na cava? “Sa va sara ga ya na nomu viakana?” A taroga o Na.
A dredre o Dave. “Sega, ia e nanoa au raica ni sega na kakana kei Jose. Au vinakata meu wasea eso na kequ.”
“Sa dua sara na vakasama totoka oqori!” A taura mai o Na eso tale na madrai ka cakava tale e dua na seniwiji o Dave.
Ena gauna ni vakasigalevu, e rau a dabe vata o Dave kei Jose ka rau kania vata na kedrau seniwiji. E a taura na yaloqaqa me tarovi ira na vo ni gone mai na vakasagai Jose. Ia e lomana na nona itokani vou o Dave, ka kila ni sa marau na Tamada Vakalomalagi ni digitaka me dau yalo loloma.
Droini mai vei Mark Robison