“Savasava Tale,” iTokani, Me 2024, 18–19.
Savasava Tale
Au sega ni digitaka rawa na dodonu me dua mada ga na siga! A vakasamataka o Emily.
Na italanoa oqo a yaco mai Amerika.
A tucake tu e lomani wai vata kei Ta o Emily ka matadredredre. A waraka tiko mai o koya na siga nikua me vica vata na macawa! E tavatukituki na utona baleta ni sa bera vakadua ni bau nunu i wai. Ia a marau vakalevu o koya me papitaiso me vakataki Jisu Karisito.
A bobo ka vakarogoci Ta ni cabora na masu ni papitaiso. A qai boboka na ucuna, bobo na matana, ka lokia na duruna ni toni koya e wai o Ta.
A dreti koya cake vakatotolo o Ta, ka tasova tani mai yagona na wai. A tavoya tani mai matana o Emily, ia a matadredredre. A duatani na ka e vakila o koya ena gauna oqo. A vakasinaiti na yalona ena dua na yalo mamarau vou. E a gadreva me dau vakila tikoga!
A mokoti koya vinaka sara o Ta. Au kila na sala me‘u maroroya kina na yalo vinaka oqo, a vakasamataka o Emily. Na ka ga me‘u cakava sai koya me‘u digitaka tikoga na dodonu ka me‘u vakataki Jisu Karisito! E kila o koya ni rawa ni cakava.
Ni rau yaco i vale, a cici o Emily mai na motoka ki na katuba e liu. Sa vakatalega kina o Jona na ganena yabaki va. Ni sa yacova yani na katuba o Emily ka tekivu dolava, a dreta o Jona na nona liku ka dreta lesu tale—vakaukauwa.
“Kakua” A kailavaka yani o Emily. A dreta tani mai ligana na liku. A qai vakalatia na nona sala me kakua kina ni curu i liu. A cudru sara vakalevu!
A qai tuvakadua vakasauri. A vakasinaiti koya e dua na yaloca. A kalawa tani mai na katuba ka me cici yani i loma o Jona.
“Vosoti au!” a kacivaka yani. E a sa qai vakayacora oti saraga e dua na digidigi cala. Ena sega ni kailavaki Jona na iVakabula. E rawa vakacava me sa mai cala tale? Na mai yali yani na nona marau vou.
Au sa vakacacana, a vakasamataka o koya. Au sega ni digitaka rawa na dodonu me dua mada ga na siga!
Na siga e tarava a Sigatabu. Ni vakavakarau tiko o Emily me lako i lotu, a vakasamataka o koya na nona a kailavaki Jona. E sega ni marautaka tiko ga o koya.
Ena gauna ni soqoni ni sakaramede, a kerei Emily o bisopi me gole cake yani ki liu. Sa na vakadeitaki tiko o koya. Sa kena ibalebale oya ni na rawata o koya na isolisoli ni Yalo Tabu. Ka qai mai dabe sobu yani ena idabedabe. A tabaka na buradelana o Ta.
E bobo na matana o Emily ni tekivu o Tamana. A rogoca o koya ni cavuta na vosa, “Ciqoma na Yalo Tabu.”
A vakarorogo tikoga o Emily.
“Emily, mo dau nanuma dei tiko, ni ena vukui Jisu Karisito, e rawa ni o veivutuni ni o cakava e dua na digidigi cala,” a kaya o Ta. “Ena veigauna kece o vakayagataka kina na sakaramede, e rawa ni o vakasamataka na veiyalayalati o a cakava ni o papitaiso. E rawa ni o yalataka tale mo muri Koya.”
Ni sa oti na nona veivakalougatataki o Ta, a vakila o Emily na marau kei na vakacegu. Sa kila o koya ni sa tukuna tiko vua na Yalo Tabu ni sa vinaka na veika kece. Sa donu tiko ni na sega ni uasivi sara. Ena vukui Jisu Karisito kei na Nona Veisorovaki, sa rawa kina vua me veivutuni ka vosoti! A yalo rarawa ni a kailavaki Jona, ka kila na Tamada Vakalomalagi ni na tovolea tikoga.
E vakasukadredre o Emily ni rau sa lesu kei Ta ki na nodrau idabedabe. E tarava mai na sakaramede, ka sa nanamaki tiko kina o Emily.
iTaba mai vei Audrey Day