“Pagserbisyo diha sa Balay Tipiganan,” Higala, Hunyo 2024, 4–5.
Pagserbisyo diha sa Balay Tipiganan
“Ang tanang miyembro sa Simbahan motabang sa usag usa, aron walay usa nato nga gutomon.”
Kini nga istorya nahitabo sa USA.
Misakay si Dominic sa sakyanan ug gitaod ang iyang seat belt. “Asa ta padulong?” nangutana siya ni Mama.
“Moserbisyo kita og usa ka tawo,” miingon si Mama. “May usa ka pamilya nagkinahanglan og tabang nga makakuha og pagkaon.”
Mipaingon sila ngadto sa dako abuhon nga gambalay. Si Dominic wala pa sukad makaadto didto.
“Unsa kining dapita?” nangutana siya. “Abi nako moadto ta sa tindahan aron magkuha og pagkaon.”
Gisirad-an ni Mama ang pultahan sa sakyanan. “Gitawag kini og balay tipiganan sa bishop. Mora kini og tindahan sa grocery, gawas nga dili ka mobayad sa pagkaon dinhi.”
Misiga ang mga mata ni Dominic. “Libre ang tanan?”
“Morag ingon ana,” miingon si Mama. “Kon magpuasa ta, mobayad ta og halad sa puasa, sama sa atong pagbayad sa ikapulo. Ang kwarta itabang sa pagpalit og pagkaon nga ibutang niini nga balay tipiganan. Dayon kon ang usa ka tawo gikan sa simbahan walay igong kwarta, sila makapangayo sa bishop og panabang ug moanhi dinhi aron magkuha sa unsay ilang gikinahanglan. Sa mga dapit nga walay balay tipiganan, ang bishop adunay laing mga paagi sa pagtabang.”
Si Dominic nagpaingon sa pultahan uban ni Mama. “Kon mao ang pamilya nga atong tabangan karon walay igong kwarta nga ipalit og pagkaon?”
“Dili karon dayon,” miingon si Mama. “Apan mao kana nganong motabang kita! Ang tanang miyembro sa Simbahan motabang sa usag usa, aron walay usa nato ang gutomon.”
Miyango si Dominic. “Nalipay ko nga makakuha sila og pagkaon.”
“Ako sab. “Karon, adto na ta! Akong ipakita nimo kon unsaon kini.”
Si Dominic ug si Mama milakaw paingon ngadto sa balay tipiganan. Kini adunay lumbay sa mga estante nga adunay lain-laing mga butang niini, sama sa usa ka tindahan.
Si Mama mikuha og papel gikan sa iyang bag. “Kini gitawag og ‘food order.’ Lista kini sa mga butang nga gikinahanglan sa pamilya. Ang atong bishop ug Presidente sa Relief Society nagtinabangay sa pagtabang nila sa paghimo og lista.”
“Mogamit usab ikaw kanunay og lista kon ikaw mamalit, Ma!” Miingon si Dominic.
“Husto kana! Siguroon nato nga makuha ang tanan nga anaa sa lista aron ang pamilya aduna sa ilang gikinahanglan.”
Si Mama mikuha og shopping karetilya. Dayon may usa ka boluntaryo nga mitabang nila a pagpangita sa mga butang diha sa lista. Si Dominic mitulod sa karetilya samtang si Mama mibutang sa mga butang diha niini.
“OK, tingali humana ta!” Si Mama mitan-aw pag-usab sa lista. “Atong siguroon nga nakuha nato ang tanan. Nakakuha ba kita og mga saging?”
“Oo!” Miingon si Dominic.
“Pan?”
“Oo!”
Sa dihang nahuman na sila, ang boluntaryo mitabang sa pagbutang sa pagkaon sa ilang sakyanan. Si Dominic miwara-wara sa pagpanamilit.
“Kumusta imong pamati?” Si Mama nangutana samtang sila namauli.
“Maayo kaayo!” Miingon si Dominic. “Apan usab … dili maayo.”
Nasorpresa si Mama. “Nganong ingon niana man ang imong gibati?”
“Tungod kay ang pagtan-aw nianang tanang pagkaon nakapagutom nako! Mahimo bang maniudto ta inig uli nato?”
Mipahiyom si Mama. “Siyempre! Ang usa ka kugihan nga trabahante sama nimo kinahanglan usab og pagkaon.”
Mibalos og pahiyom si Dominic. Nindot ang iyang gibati nga nakatabang og usa ka tawo karong adlawa.
Mga paghulagway pinaagi ni Dagmar Smith