“Mga Itlog ug mga Sentabo,” Higala, Hunyo 2024, 14–15.
Mga Itlog ug mga Sentabo
Ang nawong ni Izzy namula. Ihatag ang usa sa iyang mga sentabo? Dili siya makahimo!
Kini nga istorya nahitabo sa USA.
Walo … siyam … napulo!
Si Izzy mainampingon nga mibutang sa ika-10 nga itlog diha sa iyang basket. Si Grandpa mibayad niya og usa ka sentabo kada itlog. Kay adunay 10 ka itlog, si Izzy makakuha og 10 ka sentabo karon.
Ang mga manok mikapakapa ug nanagsaba samtang gisabwag ni Izzy ang ilang pagkaon. Mainampingon siya aron magpabiling limpyo ang iyang pang-Dominggo nga sinina. Ang mga manok kinahanglang pakan-on matag adlaw, bisan sa Dominggo. Ug ang mga itlog kinahanglang kolektahon.
“Salamat sa mga itlog, mga himongaan!” Si Izzy miingon. “Ug salamat sa 10 ka sentabo!”
Si Izzy nagtan-aw sa iyang nindot nga mga itlog diha sa iyang basket. Si Lolo dili magkinahanglan sa tanang 10. Ang daghan niini iyang ihatag sa pamilya ni Izzy. Apan ganahan siya nga adunay itlog sa iyang pamahaw. Milakaw siya tabok sa tugkaran ug paingon sa kusina ni Lolo.
“Espesyal nga paghatod!” Si Izzy mitawag.
“Salamat!” Mipahiyom si Lolo. “Malipayon kaayo ko sa higayon nga dad-an ko nimo og itlog.”
Si Izzy mitunol niya sa kinadak-ang itlog gikan sa basket. “Nahigugma ko nimo, Lolo,” siya miingon.
Gidukdok ni Lolo ang itlog sa ngilit sa init nga kalaha ug gibuak kini. Ang dalag sa itlog nagpiti-piti sa kalaha.
“Kuhaa na ang imong 10 ka sentabo gikan sa akong garapon.” Si Lolo migakos ni Izzy. “Unya magkita ta sa simbahan!”
Si Izzy midagan pauli sa balay dala ang siyam ka itlog sulod sa iyang basket ug 10 ka sinaw nga mga sentabo nga nagkagilkil sa iyang bulsa.
Sa pag-adto niya sa Primary, anaa pa gihapon ni Izzy ang iyang mga sentabo. Gisulod niya ang iyang kamot sa iyang bulsa aron kuptan kini samtang naminaw sa leksiyon.
“Ang pagbayad sa ikapulo mao ang higayon nga kita mohatag og balik sa atong ikapulo sa unsay atong kinitaan ngadto sa Langitnong Amahan,” si Sister Ayala miingon. “Mao nga kon kamo adunay 10 ka sentabo, inyong ihatag ang usa ka sentabo isip ikapulo.”
Ang nawong ni Izzy namula. Ihatag ang usa sa iyang mga sentabo? Dili siya makahimo! Hugot niyang gikuptan ang iyang kwarta.
“Nganong nagkinahanglan man ang Dios sa atong kwarta?” nangutana ang higala ni Izzy nga si Jaime. “Dili man gani siya mogamit og kwarta.”
Mipahiyom si Sister Ayala. “Apan ang Dios nahibalo nga gikinahanglan ang kwarta nga pambayad sa mga butang sama niining nindot nga gambalay sa simbahan,” siya miingon. “Siya mihangyo nato sa pagbayad sa ikapulo aron atong matubag ang mga panginahanglan sa Simbahan. Apan ang mas importante, Siya gusto nga mopanalangin kanato. Kon kita mobayad sa atong ikapulo, ang Dios nagsaad kanato og mga panalangin gikan sa langit.”
Gikuptan ni Izzy ang iyang mga sentabo sa iyang bulsa ug naghunahuna mahitungod sa itlog sa manok ni Lolo.
Ang mga itlog gikan sa iyang mga manok, apan usa lang ang iyang pangayoon. Malipay kaayo si Lolo nga hatagan og usa ka itlog matag buntag nga si Izzy gustong mohatag niya sa pinakanindot. Gawas pa niana, gihigugma niya si Lolo labaw pa sa mga itlog. Mao kana ang labing importante nga butang.
“Mao nga,” si Izzy hinay nga misulti, “atong ihatag og balik sa Langitnong Amahan ang diyotay sa unsay Iyang gihatag nato. Tungod kay gusto nato nga ipakita Kaniya nga kita nahigugma Kaniya.”
“Eksakto.” Si Sister Ayala mihatag sa matag bata og usa ka sobre sa ikapulo.
Si Izzy mipagawas sa iyang 10 ka sinaw nga mga sentabo ug miihap niini sa iyang paa.
Walo … siyam … napulo.
Mibati og kainit, gikuha ni Izzy ang labing sinaw nga sentabo ug gisulod kini sa iyang sobre aron ihatag sa Langitnong Amahan. “Salamat sa mga sentabo,” siya mihunghong. “Ug salamat sa mga panalangin gikan sa langit.”
Mga paghulagway pinaagi ni Alyssa Petersen