“Si Elise ang Inhenyero,” Higala, Hunyo 2024, 30–31.
Si Elise ang Inhenyera
Tingali dili kaayo ko brayit, naghunahuna si Elise.
Kini nga istorya nahitabo didto sa Kenya.
“Elise, pagmata na,” miingon si Mama.
Elise miagulo ug miligid. Gusto siya nga mopadayon sa pagkatulog!
Iyang gipiyong ang iyang mga mata og hugot sulod sa usa ka minuto. Dayon naghunahuna siya sa iyang mga higala sa eskwelahan ug sa mga butang nga iyang makat-onan didto. Sa kataposan mibangon siya gikan sa higdaanan aron mag-ampo.
“Mahal nga Langitnong Amahan,” siya nag-ampo, “salamat Kanimo alang sa usa ka bag-ong adlaw. Palihog tabangi ko nga makaabot sa eskwelahan sa saktong oras. Tabangi ko nga makat-on ug magmabination sa uban. Sa ngalan ni Jesukristo, amen.”
Alas 4:00 pa sa buntag, ug ngitngit pa sa gawas. Ang eskwelahan ni Elise layo kaayo. Mao nga kinahanglan siya momata og sayo. Apan siya nasayod nga ang pagkat-on importante. Gawas pa, kinahanglan siya moadto sa eskwelahan kon siya gusto nga mahimong inhenyera sa umaabot!
Sa wala pa siya mobiya, si Elise mikuha sa iyang bag sa libro ug chapati alang sa pamahaw. Nahuman niya pagkaon ang pan samtang naghulat sa bus.
Sa dihang miabot ang bus didto, ang adlaw migimaw sa mga gambalay didto sa layo. Si Elise misakay ug nakakita sa iyang lingkoranan. Mitan-aw siya sa bintana ug naghunahuna mahitungod sa pagka-inhenyero. Sa umaabot, siya mohimo og mga makina aron tabangan ang mga tawo.
Sa dihang nanaog siya sa bus, si Elise kinahanglan gihapon nga molakaw og pipila ka bloke aron moabot sa eskwelahan. Iyang gitan-aw ang oras ug nagsugod sa pagdagan. Dili mahimong maulahi siya!
“Maayong pag-abot, class,” miingon si Auntie Claudia. “Auntie” ang ilang tawag sa ilang titser. “Karon magtuon kita mahitungod sa mga fraction.”
Si Elise tul-id nga naglingkod sa iyang lingkoranan. Ganahan siya og matematika!
Apan sa dihang gisulat ni Auntie Claudia ang equation sa pisara, si Elise mibati og kalibog. Siya mitan-aw og balik sa iyang libro sa matematika, dayon sa iyang mubo nga mga sulat. Ang mga numero dili man masabtan.
“Palihog taposa ang buluhaton sa pahina 42 inig ka ugma,” miingon si Auntie Claudia. “Mahimo ninyong gamiton ang nahibilin nga oras sa pagtrabaho niini.”
Si Elise misulat sa unang problema. Gisugdan niya ang pagsulbad niini, apan miungot siya. Nanghupaw siya. Tingali ang iyang higala nga si Jessie makatabang.
“Jessie,” mihunghong si Elise. “Makatabang ba ikaw nako sa unang problema?”
Milingo-lingo si Jesse sa iyang ulo. “Naningkamot ko nga mahuman ang akong gitrabaho sa dili pa mahuman ang klase.”
Nagmug-ot si Elise. Milingi siya ngadto sa iyang higala nga si Miguel. “Kahibalo ka ba unsaon sa pagsulbad ang unang problema?” nangutana siya.
Apan si Miguel nagkapuliki usab kaayo. “Pasensya,” miingon siya, ug nagpadayon sa pagtrabaho.
Naglain ang tiyan ni Elise. Kasagaran maayo siya sa matematika!
Sa dihang si Elise nakauli na, ngitngit na usab. Gikapoy siya. Ug kinahanglan gihapon nga humanon niya ang iyang homework.
Gisugdan pag-usab ni Elise ang problema. Apan dili gihapon siya makasulbad niini. Ang mga numero nakapasakit sa iyang ulo! Tingali siya dili gayod mahimong inhenyero.
Diha dayon, ang magulang nga igsuong babaye ni Elise si Emma milingkod tupad niya. “OK ra ka?” nangutana siya.
Miagulo si Elise. Dili ko makamao nga mosulbad niini nga mga problema! Ang tanan sa klase makamao. Dili lang gyod tingali ko brayit.”
Mikatawa si Emma. “Brayt ka !” miingon siya. “Kon dunay butang nga lisod, kana wala magpasabot nga ikaw dili brayit. Nagpasabot lang kana nga ikaw kinahanglan og dugang pagbansay. Diri, ipakita nako unsay imong gitrabaho. “Makatudlo ko nimo.”
Gipakita ni Elise kaniya ang equation, ug si Emma nagsugod sa pagsulat sa mga numero. Human sa pipila ka minuto, nagsugod nga masabtan na ang tanan. Gikuha ni Elise ang lapis gikan sa kamot ni Emma ug mihuman sa problema.
“Nahimo gyod nimo!” Miingon si Emma. “Padayon sa pagbansay. Kon moungot ka pag-usab, makatabang ko nimo.”
Gibati ni Elise ang kainit samtang gisugdan niya pagtrabaho ang sunod nga problema. Ang Langitnong Amahan mitubag sa iyang pag-ampo sa buntag ug mitabang kaniya nga makat-on! Siya mapasalamaton nga Siya mihatag niya og pasensyosa nga magulang nga igsuong babaye nga mopasabot sa mga problema ngadto kaniya. Uban sa tabang sa Langitnong Amahan ug sa pipila ka pagkugi, siya mahimong usa ka inhenyero sa umaabot!
Paghulagway pinaagi ni Simini Blocker