Higala ngadto sa Higala

Pahiyom uban sa Imong Kasingkasing

Ni Sister Amy A. Wright

Unang Magtatambag sa Kinatibuk-ang Kapangulohan sa Primary

Amy A. Wright

Gikan sa Facebook, Nob. 15, 2022, facebook.com/Primary1stCounselor.

Suga sa trapiko nga porma og kasingkasing

Kausa mibisita ko sa matahom nga lungsod sa Iceland. Dihadiha dayon, akong nabantayan nga ang mga suga sa trapiko porma og mga kasingkasing! Nangutana ko mahitungod niini ug nahibaloan ang istorya.

Pipila ka tuig ang milabay, ang mga tawo sa Iceland nagkalisod. Ang lungsod nakahukom nga maghimo og usa ka butang aron matabangan ang mga tawo nga magmalipayon pag-usab. Gitawag kini og “Pahiyom uban sa Imong Kasingkasing” nga proyekto. Giusab nila ang mga suga sa trapiko ug mihangyo sa mga tawo sa pagbitay og mga kasingkasing sa mga bintana. Ang mga kasingkasing nakatabang sa tanan nga mahinumdom sa paghigugma sa uban ug sa pagbaton og paglaom.

Ang usa ka tawo misulti nako nga ang proyekto motabang nila nga mapahinumdoman sila nga magmabination sa usag usa. Sila miingon usab nga kini nakatabang nila nga mohunong ug maghunahuna mahitungod sa unsay labing mahinungdanon sa kinabuhi.

Kini nagpakita nako nga walay buhat sa pagkamabination nga gamay ra kaayo. Ang usa ka butang nga sama ka yano sa porma og kasingkasing nga suga sa trapiko makapahinumdom sa usa ka tawo sa ilang bili, makahatag nila og paglaom, ug makatabang nila nga makasugakod sa laing adlaw.

Ako nag-ampo nga kita makakita og mga paagi sa pagpakigbahin sa gugma sa Dios niadtong naglibot kanato. Kay “pinaagi sa gagmay ug yano nga mga butang ang mga dagko nga butang ipahinabo” (Alma 37:6).

Mga Higot nga Giporma og Kasingkasing

Himoa kining kasingkasing nga hinimo sa kamot ug ibitay kini aron mapahinumdoman ka sa pagpakigbahin sa gugma ngadto sa uban.

1. Pagdrowing og usa ka kasingkasing diha sa usa ka papel nga plato o piraso sa baga nga papel. Paggamit og pintal o mga marker aron koloran ang plato kon ganahan ka.

2. Hinaya sa paggunting ang kasingkasing. Sugyot: Busloti ang tunga sa kasingkasing aron masulod ang imong gunting.

3. Paggamit og panglungag o lapis aron ibuslot libot sa kilid sa kasingkasing.

4. Paggunting og taas nga higot o yarn ug ibaligtos ang tumoy. Isulod ang higot sa usa sa mga lungag. Mahimo nimong ipapilit ang gibaligtos sa luyo sa plato aron dili kini matangtang.

5. Karon “itahi” ang higot ngadto sa laing lungag tabok sa dapit kon asa ka nagsugod. Ipadayon kini hangtod nga matahi na nimo ang tanang lungag libot sa kasingkasing.

6. Pagbutang og usa nga kataposang lungag diha sa kinaibabwan sa sirkulo. Pagbutang og higot aron imong mabitay ang imong kasingkasing!

Kalihokan nga naa sa PDF nga nagpakita og mga lakang sa hinimo sa kamot nga papel nga plato

Mga paghulagway pinaagi ni Tim Bradford; hinimo ni Anna Oldroyd