Ang Pagpangita sa Kasulatan

Ni Rebekah Jakeman

(Gibase sa usa ka tinuod nga istorya)

Ang Langitnong Amahan nahigugma ba gayod kaniya?

Kini nga istorya nahitabo sa USA.

“Good night, Ma.” Si Calan mikatkat sa higdaanan.

“Good night. Gihigugma ka nako, ug ang Langitnong Amahan nahigugma usab nimo.” Gigakos siya ni Mama ug gipalong ang suga.

Si Calan mitutok sa kisame. Si Mama ug si Papa kanunay nga mosulti niya nga ang Langitnong Amahan nahigugma kaniya. Apan tinuod ba kana? Si Calan dili perpekto, ug usahay makahimo siya og mga sayop. Ang Langitnong Amahan nahigugma ba gayod kaniya?

Nagligid-ligid siya sa iyang higdaanan. Ang iyang mga ginikanan mipakita niya og gugma sa daghang paagi, sama sa paggakos kaniya. Apan wala gayod siya magakos sa Langitnong Amahan. Mao nga unsaon man aron iyang mabati ang gugma sa Langitnong Amahan?

Pagkasunod adlaw mao ang Dominggo. Samtang nagsul-ob si Calan sa iyang sinina para sa simbahan, naghunahuna gihapon siya kon ang Langitnong Amahan nahigugma ba kaniya. Unsaon man niya sa pagkahibalo kon unsa gayod ang gibati sa Langitnong Amahan alang kaniya?

Sa simbahan, si Calan ug ang iyang igsoong lalaki ug mga igsoong babaye naningkamot sa paglingkod nga hilom ug naminaw sa mga mamumulong. Si Mama mihatag og mga crayon ug papel ni Sierra, ug gisabak ni Papa si Jonny.

Apan si Calan naghunahuna gihapon mahitungod sa iyang pangutana. Dayon naka-ideya siya.

Giablihan niya ang iyang mga kasulatan. Si Mama ug si Papa miingon nga ang Basahon ni Mormon naghisgot sa mga butang nga gusto sa Langitnong Amahan nga atong mahibaloan. Basin ang Basahon ni Mormon makatubag sa pangutana ni Calan.

Si Calan misugod sa pagpakli sa mga pahina. Iyang nakita ang mga bersikulo mahitungod ni Alma nga Batan-on ug ni Samuel nga Lamanite. Apan wala siyay makita nga mga pulong mahitungod sa gugma sa Langitnong Amahan.

Sa dihang oras na alang sa Primary, gidala ni Calan ang iyang Basahon ni Mormon. Nagbasa siya og dugang pa nga mga bersikulo. Sa luyo sa Basahon ni Mormon iyang nakita ang usa ka lista sa mga kasulatan mahitungod sa gugma. Gipangita niya ang pipila ka bersikulo, apan wala siyay nakita nga bisan unsa mahitungod kon sa unsang paagi nga ang Langitnong Amahan nahigugma niya.

Dayon oras na alang sa klase. Si Brother ug si Sister Walters mihatag og higayon sa klase sa pagpangita og bersikulo diha sa Basahon ni Mormon nga sa pamati importante sa matag usa nila.

Si Calan miabli pag-usab sa iyang mga kasulatan.

Sa kataposan nakit-an niya ang usa ka bersikulo nga wala pa niya mabasa. Mahitungod kini ni Nephi sa dihang nakakita siya og usa ka panan-awon ug nakigsulti ngadto sa usa ka anghel.

Mibati og kainit si Calan samtang nagbasa siya sa mga pulong ni Nephi mahitungod sa Langitnong Amahan. “Ako nasayod nga siya nahigugma sa iyang mga anak” (1 Nephi 11:17). Gibasa pag-usab ni Calan ang bersikulo. Gibati niya ang usa ka gamhanang pagbati sa iyang kasingkasing. Gibati nako nga morag gigakos. Ang Langitnong Amahan nahigugma gayod kaniya!

Human sa Primary, naghinamhinam si Calan nga mosulti sa iyang Mama sa unsay iyang nakat-onan. “Ang Langitnong Amahan nahigugma sa Iyang mga anak. Giingon dinhi sa Basahon ni Mormon,” si Calan miingon. “Ug kana nagpasabot nga Siya nahigugma nako!”

Gigakos ni Mama si Calan. “Tinuod kana. Ang Langitnong Amahan nahigugma nimo sa hilabihan gayod.”

Nalipay kaayo si Calan. Dili man siya magakos sa Langitnong Amahan, apan ang pagbati sa Espiritu Santo sama ra ka nindot.

Karon, si Calan nagserbisyo og misyon didto sa Brazil. Ganahan gihapon siya niini nga bersikulo gikan sa Basahon ni Mormon. Malipayon siya nga mopakigbahin sa gugma sa Langitnong Amahan ngadto sa uban!

Mga paghulagway pinaagi ni Josh Talbot