5 ka Paagi

5 ka Paagi sa Pagpalig-on sa Inyong Pagpamatuod

Ni Charlotte Larcabal Speakman

Kon kamo gusto nga mopalig-on sa inyong pagpamatuod, maayong balita—kamo nagpaingon na didto! Si Alma nagtudlo nga ang pagbaton og tinguha sa pagtuo mao ang unang lakang (tan-awa sa Alma 32:27). Mao nga, padayon! Karon ania ang lima ka paagi nga kamo makapadayon sa pagpalig-on sa inyong pagpamtuod.

1. Pag-ampo ug pangutana. Si Joseph Smith nag-ampo ngadto sa Langitnong Amahan mahitungod sa daghang mga pangutana. Si Nephi usab. Ug silang duha nakaangkon og gamhanan nga mga pagpamatuod tungod niini! Ang pagpangutana sa mainampoong paagi makatabang nga motubo ang inyong pagpamatuod.

2. Sunda kini. Si Jesukristo miingon nga kon kita mopili sa pagbuhat sa kabubut-on sa Langitnong Amahan, kita “mahibalo sa gitudlo” (tan-awa sa Juan 7:17). Kana nagpasabot nga kon kita mosunod sa ebanghelyo, kita makahibalo nga kini tinuod!

3. Paminaw sa Espiritu Santo. Bantayi ang inyong mga hunahuna ug mga pagbati samtang magbasa kamo sa mga kasulatan, magkanta sa kanta sa Primary, ug maminaw diha sa simbahan. Mga mensahe kana gikan sa Langitnong Amahan nganha kaninyo, gipadala sa Espiritu Santo.

4. Ipakigbahin ang unsay inyong gituohan. Kita makaangkon o makapalig-on sa usa ka pagpamatuod pinaagi sa paghatag niini,” miingon ni Presidente Dallin H. Oaks. Sa higayon kamo moingon nga unsay inyong gituohan tinuod, ang Espiritu Santo mopamatuod kaninyo.

5. Hinumdomi. Kamo mahimong magtipig og notebook o rekord sa inyong kaugalingon mahitungod sa espirituwal nga mga kasinatian nga inyong nasinati. Ang paghinumdom niini nga mga handomanan makatabang sa pagpalig-on sa inyong pagpamatod.

• “Pagpamatuod,” Liahona, Mayo 2008, 27.