Mālō e Lelei mei Pelisiume!

Ako fekauʻaki mo e fānau ʻa e Tamai Hēvaní ʻi he funga ʻo e māmaní kotoa.

Ko Pelisiumé ko ha fonua ia ʻi ʻIulope. ʻOku laka hake ʻi he kakai ʻe toko 11 miliona ʻoku nofo ʻi aí!

Ngaahi Lea Fakafonuá

Ko e ngaahi lea fakafonua totonú ko e lea faka-Hōlani, faka-Falanisē, mo e faka-Siamane.

Mākou: Hoe gaat het?

Paolo: ʻOku ʻuhinga ia ki he “ʻOkú ke fēfē hake?” ʻi he lea faka-Hōlaní.

ʻE Langa ʻa e Temipale Foʻou

ʻI he 2021, naʻe fanongonongo ai ʻe Palesiteni Lāsolo M. Nalesoni ʻe langa ha temipale ʻi Palāsolo, ko e kolomuʻa ʻo Pelisiumé. ʻOku ʻalu ʻa e kakai ʻi Pelisiumé ki he Temipale Heiki Netalení (ʻoku hā atu ʻi ʻolungá) kae ʻoua kuo langa ia.

Sitepu Lahi

ʻOku ʻi ai ha sitepu lahi ʻi he kolo ko Lisí ʻoku ui ko e “Montagne de Bueren.” ʻOku ʻi ai ha ngaahi sitepu ʻe 374! ʻOku fuʻu māʻolunga pea ʻoku ʻuhinga ʻa e konga hono hingoá ki he moʻungá. Fakakaukauloto ʻokú ke lue ʻi he sitepu ko iá ke aʻu ki ʻapi!

Lahi ʻa e Sokoletí!

ʻOku ʻiloa ʻa Pelisiume ʻi hono sokoletí. ʻOku fakafuofua ki ha toni sokoleti ʻe 200,000 nai ʻoku ngaohi ʻi ai ʻi he taʻu takitaha. ʻOku tatau pē ia mo e mamafa ʻo ha ngaahi kā ʻe 100,000!

ʻEkitivitī

Teka Pulú (Rolle Bolle)

Fakahoko ha tatau ʻo e vaʻinga ko ʻení ʻi tuʻa. Kumi ha meʻa ke fakaʻaongaʻi ko ha tāketi mo ha kiʻi foʻi pulu ki he tokotaha vaʻinga takitaha. Fokotuʻu ʻa e tāketí ʻi he kelekelé ʻi ha feituʻu mamaʻo pea vahevahe ʻa e kau vaʻingá ki ha timi ʻe ua. ʻE taufetongi ʻa e ongo timí ʻi hono tekaʻi ʻo e ngaahi foʻi pulú ki he tāketí. ʻE lava foki ke feinga ʻa e kau vaʻingá ke taaʻi ʻa e ngaahi foʻi pulu ʻa e timi ʻe tahá ke mamaʻo mei he feituʻu ʻoku tāketi ki aí. ʻE ʻosi ʻa e vaʻingá hili ʻa e taimi vaʻinga ʻo e tokotaha kotoa pē. ʻE mālohi ʻa e timi ʻoku ofi taha ʻenau foʻi pulú ki he tāketí!

Founga Feimeʻatokoní

Uotasuoi (Waterzooi)

Ko ha sitiu tukufakaholo ʻeni mei Pelisiume. Ko ha founga ʻeni te ke lava ʻo ʻahiʻahiʻi!

1. Fakavaiaʻi ha sēpuni lahi (tablespoon) ʻe 2 ʻo e patá ʻi ha kiʻi kulo. Haka ha foʻi onioni ʻe 1 kuo ʻosi tongitongi, foʻi kāloti lalahi ʻe 2 kuo ʻosi tongitongi, mo e kauʻi selelī ʻe 2 kuo ʻosi tongitongi ʻi ha miniti ʻe 10. Tānaki atu ha supo moa (chicken broth) ki he vesitapoló pea haka ke lili.

2. Tānaki atu ha pāuni ʻe 2 (kilo ʻe 1) moa kuo tongitongi pea tāpuniʻi miniti ʻe 20.

3. ʻI ha poulu mavahe, tā fakataha ha ipu kilimi ʻe 1, 2 tablespoons cornstarch, mo e 1 egg yolk. Heu ki he kuló. Tānaki atu ha supo (broth) lahi ange ʻo ka fiemaʻu.

4. ʻAi ke ulo siʻi ʻa e sitoú, pea haka ʻi ha toe miniti ʻe 2, ʻo ʻoua ʻe tuku ke lili ʻa e kuló.

Fakapapauʻi ʻoku tokoni atu ha taha lahi!

Ngaahi tā fakatātā ‘a Chrisanne Serafin