Kaumeʻa ki he Kaumeʻa

Malimali ʻaki Ho Lotó

Fai ʻe Sisitā Amy A. Wright

Tokoni ʻUluaki ʻi he Kau Palesitenisī Lahi ʻo e Palaimelí

Mei he Facebook, 15 Nōvema 2022, facebook.com/Primary1stCounselor.

Naʻá ku ʻaʻahi tuʻo taha ki ha kolo fakaʻofoʻofa ʻi ʻAisileni. ʻI he taimi pē ko iá, naʻá ku fakatokangaʻi naʻe fuo tatau pē ʻa e ngaahi foʻi maama halá mo ha ngaahi foʻi hātí! Naʻá ku fehuʻi fekauʻaki mo ia peá u ʻilo ʻa e talanoá.

ʻI he ngaahi taʻu kuohilí, naʻe faingataʻaʻia ʻa e kakai ʻi ʻAisilení. Naʻe fakakaukau ʻa e koló ke fai ha meʻa ke tokoniʻi ʻa e kakaí ke nau toe fiefia. Naʻa nau ui ia ko ha ngāue ko e “Malimali ʻaki Ho Lotó.” Naʻa nau liliu ʻa e ngaahi foʻi maama ʻo e halá pea kole ki he kakaí ke nau tautau ha ngaahi foʻi haati mei he matapā sioʻatá. Naʻe tokoniʻi ʻe he ngaahi foʻi hātí ʻa e tokotaha kotoa pē ke ne manatuʻi ke ʻofa ki he niʻihi kehé mo maʻu ha ʻamanaki lelei.

Naʻe talamai ʻe ha tokotaha kiate au ko e ngāué ke tokoni ke fakamanatu ange ke nau feangaʻofaʻaki. Naʻa nau toe pehē foki naʻe tokoni ia ke nau tuʻu ʻo fakakaukau ki he ngaahi meʻa ʻoku mahuʻinga taha ʻi he moʻuí.

Naʻe fakahā mai ʻe he meʻá ni kiate au ʻoku ʻikai ha ngāue angaʻofa ia ʻe fuʻu siʻisiʻi. ʻE lava ke fakamanatu ʻe ha kiʻi meʻa faingofua hangē ko ha maama hala ʻoku fuo hangē ha hātí ki ha taha honau mahuʻingá, ʻoange ha ʻamanaki lelei, mo tokoniʻi kinautolu ke nau ikunaʻi ha ʻaho ʻe taha.

ʻOku ou lotua te tau maʻu ha ngaahi founga ke vahevahe ai ʻa e ʻofa ʻa e ʻOtuá mo kinautolu ʻoku tau feohí. He “ʻoku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6

Ngaahi Afo Hātí

Ngaohi ʻa e ngāue haati ko ʻení pea tautau ia ke tokoni ke ke manatuʻi ke vahevahe ʻa e ʻofá mo e niʻihi kehé.

1. Tā ha foʻi haati ʻi ha peleti pepa pe laʻipepa fefeka. Fakaʻaongaʻi ha vali pe peni fakaʻilonga ke valivali ʻa e peletí kapau ʻokú ke loto ki ai.

2. Kosi ʻo toʻo fakalelei ʻa e foʻi hātí. Kiʻi tokoni: Hokaʻi ha foʻi ava ʻi lotomālie ʻi he foʻi hātí ke tokoni ke hao ai hoʻo helekosí.

3. Fakaʻaongaʻi ha meʻangāue fakaavaava pe peni vahevahe ke fakaavaava ʻaki takatakai ʻi he ngatangataʻanga ʻo e foʻi hātí.

4. Kosiʻi ha konga afo lōloa pe kulasi pea nonoʻo ha fakapona ʻi he ngataʻangá. Fakahū ʻa e afó ʻi he taha ʻo e ngaahi foʻi avá. Te ke lava ʻo fakapipiki ʻa e fakaponá ki he tafaʻaki ki mui ʻo e peletí ke tokoni ke tuʻu maʻu.

5. Taimi ní, “tui” ʻa e afó ki ha foʻi ava ʻe taha ʻi he feituʻu naʻá ke kamata aí. Hokohoko atu hoʻo fai ʻení kae ʻoua kuó ke tui takai ʻi he ngaahi foʻi ava kotoa takatakai ʻi he foʻi hātí.

6. ʻAi ha foʻi ava fakaʻosi ʻe taha ʻi ʻolunga ʻi he siakalé. Tānaki atu ha afo pelu fakafuopotopoto koeʻuhí ke ke lava ʻo tautau hoʻo foʻi hātí!

Ngaahi tā fakatātā ʻa Tim Bradford; ngāue fakameaʻa ʻa Anna Oldroyd