Ngaahi ʻEkitivitī ʻo e Haʻu, ʻo Muimui ʻIate Aú

Maʻá e efiafi ʻi ʻapí pe ako folofolá—pe ke maʻu pē ha fiefia!

27 Mē–2 Sune

Tā Valivali ʻo e Angalelei ʻa e ʻOtuá

Ki he Mōsaia 25–28

Ko e tamasiʻi ʻoku tangutu mo ha fefine toulekeleka mo faitohi

Naʻe lau ʻe he Tuʻi ko Mōsaiá ʻa e ngaahi talanoa ki hono kakaí fekauʻaki mo hono tāpuekina ʻe he ʻOtuá ʻa e kakai ʻo ʻAlamaá. ʻI heʻenau fanongo ki he ngaahi talanoá, naʻa nau fakakaukau ki he “angalelei vave ʻa e ʻOtuá” (Mōsaia 25:10). Fehuʻi ki hoʻo mātuʻá mo hoʻo ngaahi kuí fekauʻaki mo e angalelei ʻa e ʻOtuá ki hoʻo fāmilí. Tā ha ngaahi fakatātā ʻo e ngaahi talanoa manakoa ʻokú ke fanongo ki aí.

Maʻá e fānau iiki angé: Fai ʻa e peesi valivali ʻi he peesi 48. Lolotonga hoʻo valivalí, talanoa ki he ngaahi founga ʻe lava ke tau ongoʻi ai ʻa e ʻofa ʻa e Tamai Hēvaní mo Sīsū Kalaisí.

3–9 Sune

Fakaʻilonga Tohi ʻo e Papitaisó

Ki he Mōsaia 29–ʻAlamā 4

Fakaʻilonga tohi mo e tā fakatātā ʻa e kiʻi tamasiʻi/taʻahine ʻoku papitaiso

Naʻe papitaiso ʻe ʻAlamā ha kakai tokolahi ʻI he taimi naʻe papitaiso ai kinautolú, naʻa nau kau ki he Siasi ʻo e ʻOtuá (ʻAlamā 4:5). Faʻu ha fakaʻilonga tohi ʻo e papitaisó! Kosi ʻo toʻo ha kiʻi laʻipepa lekitengikale. Tā ha taha ʻoku papitaiso ʻi he tafaʻaki ʻe taha. ʻI he tafaʻaki ʻe tahá, hiki hifo ha ngaahi veesi folofola ʻokú ke maʻu ʻoku akoʻi ai fekauʻaki mo e papitaisó. Fakaʻaongaʻi hoʻo fakaʻilonga tohi papitaisó ki hoʻo lau folofolá.

Maʻá e fānau iiki angé: Hivaʻi pe fanongo ki he foʻi hiva “Ko Hoku Papitaisó” (Tohi Hiva ʻa e Fānaú, 54). Ko e taimi kotoa pē ʻokú ke fanongo ai ki he ongo foʻi lea “papitaiso” pe “Sīsū,” tuʻu ki ʻolunga.

10–16 Sune

Fakaʻilonga Tauhisipí (Shepherd Tag)

Ki he ʻAlamā 5–7

Fānau ʻoku lele

Ko Sīsū Kalaisi ʻa e Tauhisipi Leleí, pea ʻokú Ne finangalo ke tau haʻu kiate Ia (vakai, ʻAlamā 5:38). Fai ha kiʻi vaʻinga ʻo e fakaʻilonga tauhisipí! Ko e tokotaha ʻoku “fakaʻilongaʻí (it)” ko e tauhisipi ia ʻokú ne tānaki ʻa e fanga sipí. ʻI he taimi ʻoku fakaʻilongaʻi (tag) ai ʻe he tauhisipí ha tahá, ʻoku nau muimui ki he tauhisipí. Ko ʻene kakato kotoa pē hono fakaʻilongaʻí, toe vaʻinga pē mo ha tauhisipi foʻou!

Maʻá e fānau iiki angé: ʻOku hangē ʻa Sīsū ko ha tauhisipí, pea ʻokú Ne ui kitautolu ke tau haʻu kiate Ia. ʻAi ha taha ke ne toitoi pea ui ʻa e hingoa hoʻo kiʻi tamasiʻí/taʻahiné. Hili iá pea fekau leva hoʻo kiʻi tamasiʻí/taʻahiné ke kumi kinautolu.

17–23 Sune

Hiva Fakavavevavé

Ki he ʻAlamā 8–12

Hiva ʻa e fānaú

ʻI he taimi naʻe talaange ai ʻe ha ʻāngelo kia ʻAlamā ke ʻalu ʻo akoʻi ʻa e kakaí, naʻe ʻalu “fakavavevave” ʻa ʻAlamā (ʻAlamā 8:18). Talanoa kau ki he founga te mou lava ʻo muimui fakavavevave ai ki he ngaahi fekau ʻa e ʻOtuá. Hivaʻi leva ʻa e “Fili e Hala Totonú” (Tohi Hiva ʻa e Fānaú, 82). ʻI he fuofua taimí, hivaʻi māmālie ʻa e foʻi hivá. Pea toe hivaʻi, ʻo vave ange pea toe vave ange. Ko e hā ʻa e vave hoʻo hivaʻi iá?

Maʻá e fānau iiki angé: ʻOange ki hoʻomou fānau īkí ha kiʻi ngāue faingofua ke fai, hangē ko e puná, ala ki honau louhiʻi vaʻé, pe vilo takai holo. Fakaafeʻi kinautolu ke nau ʻahiʻahi fakahoko vave mo toe vave ange ʻa e ngāué. Talanoa leva kau ki he founga ʻe lava ke vave ai ʻetau muimui ki he ʻOtuá.

24–30 Sune

Ngaahi Talanoa mei he Folofolá

Ki he ʻAlamā 13–16

ongo kiʻi tamaiki ʻokú na laukonga fakataha

Naʻe akoʻi ʻe ʻAlamā mo ʻAmuleki ʻa e kakaí ke nau sio kia Sīsū Kalaisi pea fakatomala (ʻAlamā 13:16). Lau ʻa e talanoa ʻi he peesi 26ke ako lahi ange kau kia ʻAlamā mo ʻAmuleki. Naʻe tokoniʻi fēfē nai kinaua ʻe he ʻOtuá? ʻOkú Ne tokoniʻi fēfē nai koe?

Maʻá e fānau iiki angé: Sio ki he tā valivali ʻo Sīsū Kalaisí ʻi he peesi 49. Talanoa fekauʻaki mo e ongo ʻe maʻu ʻi he sio kiate Iá!

Talanoa ʻi he PDF

ʻŪ tā fakatātā ʻa Katy Dockrill