“Founga ʻe 5 ke Fakamālohia Ai Hoʻo Fakamoʻoní,” Ko e Kaumeʻá, ʻEpeleli 2024, 38.
Toʻo ʻa e 5
Founga ʻe 5 ke Fakamālohia Ai Hoʻo Fakamoʻoní
Kapau ʻokú ke fie fakamālohia hoʻo fakamoʻoní, ko e foʻi ongoongo lelei ʻeni—kuó ke ʻosi kamata fakahoko ia! Naʻe akoʻi ʻe ʻAlamā ko e maʻu ko ia ha holi ke tuí ʻa e ʻuluaki sitepú (vakai, ʻAlamā 32:27). Ko ia ai, ko e ngāue lelei ena! Ko e founga ʻeni ʻe nima te ke lava ai ʻo hokohoko atu hono fakamālohia hoʻo fakamoʻoní.
-
Lotua mo ʻeke ha ngaahi fehuʻi. Naʻe lotua ʻe Siosefa Sāmita ki he Tamai Hēvaní fekauʻaki mo ha ngaahi fehuʻi lahi. Naʻe fai pehē foki mo Nīfai. Pea naʻá na fakatou maʻu ha fakamoʻoni mālohi koeʻuhí ko e meʻa ko iá! ʻE lava ke tokoni hono fai ʻo e ngaahi fehuʻí ʻi he faʻa lotú ke tupulaki ai hoʻo fakamoʻoní.
-
Moʻui ʻaki ia. Naʻe folofola ʻa Sīsū ko e taimi ʻoku tau fili ai ke fai ki he finangalo o e Tamai Hēvaní, te tau “ʻilo ʻa e akonakí” (vakai, Sione 7:17). ʻA ia ko hono ʻuhingá, kapau te tau moʻui ʻaki ʻa e ongoongoleleí, te tau ʻilo ʻoku moʻoni ia!
-
Fanongo ki he Laumālie Māʻoniʻoní. Tokanga ki he ngaahi fakakaukau mo e ngaahi ongo ʻokú ke maʻu ʻi hoʻo lau ʻa e folofolá, hivaʻi ʻa e ngaahi hiva Palaimelí, mo fakafanongo ʻi he lotú. Ko e ngaahi pōpoaki ia mei he Tamai Hēvaní kiate koe, ʻoku fakafou mai ʻi he Laumālie Māʻoniʻoní.
-
Vahevahe ʻa e meʻa ʻokú ke tui ki aí. Naʻe pehē ʻe Palesiteni Tāleni H. ʻOakesi, “ʻOku tau maʻu pe fakamālohia e fakamoʻoní ʻi hono toutou fakahoko iá.” ʻI hoʻo lea ʻaki ʻa e meʻa ʻokú ke tui ʻoku moʻoní, ʻe fakamoʻoniʻi atu ʻe he Laumālie Māʻoniʻoní kiate koe.
-
Manatuʻi. Te ke lava ʻo tauhi haʻo kiʻi tohi pe lekooti hoʻo talanoa fekauʻaki mo e ngaahi aʻusia fakalaumālie kuó ke maʻú. ʻE tokoni haʻo toe foki mai ki he ngaahi manatu melie ko ʻení ke fakamālohia hoʻo fakamoʻoní.