Եկ, հետևիր ինձ

Վարդապետություն և Ուխտեր․ Համառոտ ակնարկ

Էնելիզ Գարդիներ

Եկեղեցու ամսագրեր

Վարդապետություն և Ուխտեր․ Համառոտ ակնարկ

Ջոզեֆ Սմիթ և Սիդնի Ռիգդոն

Ջոզեֆը և Սիդնին, Էննի Հենրի Նեյդեր

Արագ փաստեր

• Ամենաերկար բաժինը․ բաժին 124 (145 հատված)

• Ամենակարճ բաժինները․ բաժիններ 13, 116 և 120 (յուրաքանչյուրը՝ 1 հատված)

• 138 բաժին և 2 պաշտոնական հայտարարություն։

• Վարդապետություն և Ուխտերում մեծամասամբ Հիսուս Քրիստոսի ձայնն է։

• Ի տարբերություն մյուս սուրբ գրությունների՝ այն չի թարգմանվել հին փաստաթղթերից։

• Գրքում զետեղված հայտնությունների մեծ մասը ստացել է Մարգարե Ջոզեֆ Սմիթը, մյուսները ստացել են Բրիգամ Յանգը (բաժին 136), Ջոզեֆ Ֆ. Սմիթը (բաժին 138), ինչպես նաև Վիլֆորդ Վուդրուֆը (Պաշտոնական հայտարարություն-1) և Սպենսեր Վ․ Քիմբալը (Պաշտոնական հայտարարություն-2)։

Ի՞նչ է դա:

Վարդապետություն և Ուխտերը ժամանակակից հայտնությունների ժողովածու է, որոնք Աստված տվել է հիմնականում Մարգարե Ջոզեֆ Սմիթի միջոցով։ Այս հայտնություններից շատերը տրվել են ի պատասխան այն հարցերի, որոնք Ջոզեֆը և Եկեղեցու մյուս վաղ օրերի անդամները հարցրել էին Աստծուց:

Ինչո՞ւ կազմվեց Վարդապետություն և Ուխտերը։

Եկեղեցու վաղ օրերում այդ հայտնությունների ընդամենը մի քանի ձեռագիր օրինակ կար: 1831 թվականին Եկեղեցու ղեկավարները որոշեցին տպել և հրատարակել հայտնությունները Պատվիրանների Գրքում: 1831 թվականի նոյեմբերի համաժողովում, քննարկելով Պատվիրանների Գիրքը, Ջոզեֆը ստացավ հայտնություն, որն այժմ 1-ին բաժինն է՝ Վարդապետություն և Ուխտերի նախաբանը:

Ժամանակացույց․

• 1823 թ. Գրանցվել է առաջին հայտնությունը․ Բաժին 2։

• 1833 թ. Հրատարակվել է Պատվիրանների Գիրքը։ Մի քանի օրինակ էր փրկվել այն բանից հետո, երբ ամբոխը հարձակվել էր տպարանի վրա։ Երկու դեռահասներ՝ Մերի Էլիզաբեթը և Քերոլայն Ամելիա Ռոլինսը, փրկեցին այնքան էջեր, որքան կարողացան, և թաքցրին դրանք ամբոխից եգիպտացորենի դաշտում։

• 1835 թ. Կայացավ առաջին լայնածավալ հրատարակությունը։ Այն ընդգրկեց լրացուցիչ հայտնություններ և փոխեց անվանումը Վարդապետություն և Ուխտերի։

• 1844 թ. Ջոզեֆ Սմիթի նահատակությունից անմիջապես հետո տպագրվել է այս հրատարակությունը, որն ընդգրկել է նոր հայտնություններ և բաժին 135-ը:

• 1847 թ. Բրիգամ Յանգը հրահանգներ է ստացել այն մասին, թե ինչպես տեղափոխել Սրբերին դեպի արևմուտք. Բաժին 136:

• 1876 թ. Այս հրատարակությունն ավելացրել է 26 նոր բաժիններ և առաջին հրատարակությունն էր, որը բաժանում էր բաժինները հատվածների:

• 1890 թ. Վիլֆորդ Վուդրուֆը թողարկում է Մանիֆեստը, որը վերջ է դնում Եկեղեցում կատարվող բազմամուսնություններին (տես Պաշտոնական Հայտարարություն 1):

• 1918 թ․ Ջոզեֆ Ֆ․ Սմիթը հայտնում է հոգևոր աշխարհի մասին իր տեսիլքը․ բաժին 138

• 1921 թ. Այս հրատարակությունից սկսած՝ «Հավատի մասին» դասախոսություններն այլևս չէին ընդգրկվում:

• 1978 թ. Սպենսեր Վ. Քիմբալը ստացավ քահանայության մասին հայտնությունը, որը դարձավ Պաշտոնական հայտարարություն 2-ը։

• 1981 թ. Այս հրատարակությունը համաչափության բերեց վերնագրերը, ավելացրեց խաչաձև հղումները, ինչպես նաև ավելացան մի քանի հայտնություններ։

• 2013 թ. Այս հրատարակությունը թարմացրեց վերնագրերի պատմական տեղեկությունները։

Բաժիններից մի քանիսը, մինչև դրանց ընդգրկվելը Վարդապետություն և Ուխտերի կազմում, հայտնի էին հատուկ վերնագրերով.

• Բաժին 1 - Նախաբան

• Բաժին 20 - Հոդվածներ և Ուխտեր

• Բաժին 88 - Ձիթենու տերև

• Բաժին 133 - Հավելված

• Բաժին 134 - Հայտարարություն Կառավարությունների և օրենքների վերաբերյալ

Վարդապետություն

Հայտնությունների առաջին ժողովածուն կոչվում էր Պատվիրանների Գիրք։ Հետագայում ժողովածուները վերանվանվեցին Վարդապետություն և Ուխտեր, քանի որ դրանց ավելացան մի շարք դասախոսություններ «եկեղեցու վարդապետության վերաբերյալ», որոնք հայտնի էին «վարդապետություն» կարճ անվամբ (այժմ՝ «Դասախոսություններ հավատքի վերաբերյալ»)։ 1921 թվականի հրատարակությունից սկսած, «Դասախոսություններ հավատքի վերաբերյալ» նյութն այլևս ներառված չէ, բայց Վարդապետություն և Ուխտեր վերնագիրը պահպանվել է։¹

Ուխտեր

Գրքի մնացած մասը պարունակում է Ջոզեֆ Սմիթի ստացած հայտնությունները: Այդ մասը հայտնի էր որպես «Տիրոջ ուխտեր և պատվիրաններ», կամ կարճ՝ «ուխտեր»: Վաղեմի Սրբերը օգտագործում էին «ուխտեր» կամ «պատվիրաններ» անվանումները՝ Մարգարեի կողմից ստացած այդ հայտնությունների մասին խոսելիս, որպեսզի առանձնացնեին դրանք Ջոզեֆ Սմիթի մյուս աշխատություններից, ինչպիսիք են՝ ոգեշնչված քարոզները և Աստվածաշնչի Ջոզեֆ Սմիթի թարգմանությունները:²

Ինչո՞ւ է Վարդապետություն և Ուխտերը կարևորվում այսօր։

Վարդապետություն և Ուխտերը պարունակում է Հիսուս Քրիստոսի տված հայտնությունները Իր ժողովրդին։ Այն մեզ ուսուցանում է, որ Աստված յուրաքանչյուրիս անունով գիտի, որ Նա լսում է մեր աղոթքները և պատասխանում է մեր հարցերին, և որ Աստված խոսում է այսօր: Այն նաև ուսուցանում է արժեքավոր վարդապետություն փրկության ծրագրի վերաբերյալ և մեզ լրացուցիչ պատկերացում է տալիս Հիսուս Քրիստոսի Քավության մասին: Այն մխիթարում է՝ ցույց տալով, թե ինչպես է Աստված սիրում մեզ, և կոչ է անում գալ Իր մոտ, նույնիսկ, երբ մենք սխալներ ենք թույլ տալիս:

Հղումներ

1. See Church History Topics, “Lectures on Theology (‘Lectures on Faith’),” ChurchofJesusChrist.org.

2. See Church History Topics, “Doctrine and Covenants” and “Revelations of Joseph Smith,” ChurchofJesusChrist.org.