“Te Kantaninga inanon Kristo,” Ibukin Kakorakoraia Kairake, Meei 2021.
Te Tetere ni Bwakantain te Kaonobong
Te Kantaninga inanon Kristo
Anaaki
Tariu ao mwaneu, n tain te Itita aei ti kabanea ara iango iaon Mangautin ara Uea ao ara Tia Kamaiu, Iesu Kristo. Ti uringa Ana kakao n tangira “bane mai nako Iu, ngkami akana kam kua ao kam rawawata, ao N na motiki rawami.
“Amoa amou i aomi, ao reirei i Rou; ba I nimamanei ao I nanorinano: ao e na reke i roumi iai motikan rawaia tamneimi.
“Ba e aoraoi amou, ao e bebete uotau” [Mataio 11:28–30].
Ana kakao te Tia Kamaiu n Nakoina bon te kakao nakoira ni kabane n aki ti Nakoina ma n riki naba bwa kaain Ana Ekaretia naba. …
Iesu e tangiria bwa ti na ataia bwa te Atua bon te Tama i Karawa ae tangira.
Atakina bwa ti tangiraki iroun Tamara are i Karawa e na buokiira n ataia bwa antai ngaira ao n ataia bwa kaain Ana utu ae akea tokina. …
… Ma e ngae n anne, n aki tabe ma kangaanga aika ti kaitarai n te maiu aei, ti kona, n aron moaningabongin te Itita anne, n uti n te maiu ae boou iroun Kristo, ma ara konabwai aika boou ao koauaia aika boou ngkana ti rairaki nakon te Uea ibukin te kantaninga ao n riki bwa kaaina. …
I taetae ma te kantaninga iroun Kristo ma tiaki aongkoa e iangoaki. E ngae n anne, I taetae iaon te kantaninga bwa te kantaninga ae na koro bukina. Te kantaninga anne e kakawaki bwa ti na tokanikai iaon te kakaitara, karikirakean te konabwai ao te korakora n tamnei, ao atakina ae ti tangiraki iroun Tamara are i Karawa ao ngaira bon Natina, ao kaain Ana utu. …
Tai mwaninga ae ngkoe bon natin te Atua, Tamara ae Akea Tokina, ngkai ao n aki toki. E tangiriko, ao te Ekaretia e tangiriko ao e kainnanoiko. Eng, ti kainnanoiko! Ti kainnanoi bwanamwi, ami tarena, ami konabwai, tamaroami, ao raoiroimi.