“Tuan Au Euangkerio,” Ibukin Kakorakoraia Te Roronrikirake, Meei 2021.
Te Tetere ni Bwakantain te Tabati
Tuan Au Euangkerio (Reirei ao Berita aika Tabu 42:12)
Anaaki
Tamnei iroun Getty Images
Reirein te euangkerio bon kainibaire aika anaki ni koaua are e na kaira aron kabonganaan inaomatara n rinerine n ae eti. Reirei ake a reke man koauan te euangkerio a katauraoi kaetieti ao kainibaire ngkai ti waaki nako iaon kawain te berita. …
Reiakinan, karekean te mataata, ao maiuakinan reirein te euangkerio e kamatoa ara onimaki iroun te Tia Kamaiu, e kamatoa ara kakaonimaki nako Ina, ao e kaoi kakabwaia aika mwaiti ao bwai n tituaroai n tamnei i nanon maiura. Tuan te raoiroi e buokiira naba ni katinanikui baika ti bon tangiri ao nano aika a ti boboto iaora man katuruan ara taratara aika tamaroa nakon koaua ae akea tokiia ngkai ti rinanon waaki aika kakaokoro, kakaewenako, rinerine, ao baika a riki ni maiura n te maiu aei. …
Ngke e kamatawarikaki Iotebwa Timiti n te o n kaikain i Liberty, e korei reta n anga kaetieti nakoia kaain te Ekaretia ao taan kairiiri ao e kauringia bwa “te kaibuke ae e rang bubura e rang korakora buokakina man te wiira ae e rang uarereke n tain te buaka, man kawakinna ni mwakuri ma te ang ao te nao” [Reirei ao Berita aika Tabu 123:16].
Te “wiira” bon te bwee ke te kai ae te bwai ni mwakuri are e kabonganaaki ni kaira kawain te kaibuke ke te booti. Ao “e uaia ni mwakuri ma te ang ao te nao” e kaota bwenakin te kaibuke bwa e na baeranti ao n aki baraaki n tain te buaka.
Tuan te euangkerio bon ibukiu ao ibukim ao te wiira bon ibukin te kaibuke. Tuua aika eti a anganira te kona ni kunea kawaira ao n tei n nene, ni kakaonimaki, ao n aki kamwaingaki bwa a na aki bua ara baeranti ao ni bwaka inanon buakan te rotongitong ao te nakokoraki ni boong aikai.