“Tampeļ Eo im Pedped Eo Am Ilo Jetōb,” N̄an Kōkajoorļo̧k Jodikdik ro, Nob. 2022.
M̧wen̄an eo an Jibbon̄ in Jabōt
Tampeļ Eo im Pedped Eo Am Ilo Jetōb
Mōttan ko rekadu
Ijamin Kōņaan, jān Yongsung Kim
Jikin ekkal eo an Salt Lake Tampeļ
Āinwōt ami jeļā, jej kōm̧m̧ane kōkāāl ko reļļap n̄an Salt Lake Temple eo. …
Jejjab kajejtokjen kijejeto eo n̄an kōm̧m̧an bwe tampeļ in jej kautieje, eo ekar jino ļapļo̧k an pidodo an jorrāān, juon pedped eo me enaaj jutak wōt ņae kajoor ko an laļ in ilo Millenium eo. Ilo ejja jekjek in, ej kiiō iien bwe kōj kajjojo jen kōjerbal jon̄ak ko reļļapļo̧k—bōlen jon̄ak ko jej jan̄in kar būki m̧okta—n̄an kōkajoorļo̧k pedped eo ad make ilo jetōb. Iien ko jekar jab jeļā kaki rej kūr jon̄ak ko jekar jab jeļā kaki.
Ro jeiū im jatū rejitōn bōro, iien kein rej raan ko āliktata. Eļan̄n̄e kwe im n̄a aikuj in jutak ņae kauwōtata ko im kareel ko, elukkuun aorōk bwe kōj kajjojo eaikuj wōr juon ad pedped eo epen kar kalōke ioon ejm̧aan an ad Rilo̧mo̧o̧r, Jisōs Kraist.
Kōn menin, ij kajjitōk ippemi kajjojo, epen ke pedped eo ami? Im ta kein kōkajoor ko n̄an naan in kam̧ool eo ami im meļeļe eo ami kōn gospel eo kom̧ij aikuji?
Tampeļ eo ej pād ilo ioļapļap in kōkajoorļo̧k eo an tōmak eo ad im kajoor in jetōb eo ad kōnke Rilo̧mo̧o̧r eo im katak ko An rej lukkuun mour eo an tampeļ eo. …
Eļan̄n̄e kwoj jan̄in de iakwe etal n̄an tampeļ eo, en emakijkij am̧ etal—en jab dik. Kōtļo̧k bwe Irooj, jān Jetōb eo An, en katakin im im̧we eok ijeņ. …
Jouj tōmak eō n̄e ij ba bwe n̄e pedped eo am̧ ilo jetōb ej ekkal pen ilo Jisōs Kraist, kwojjab aikuj in mijak. Ilo am̧ m̧ool wōt n̄an bujen ko kwaar kōm̧m̧ani ilo tampeļ eo, kwonaaj kajoorļo̧k kōn kajoor eo An. Innām, n̄e m̧akūtkūt in laļ ilo jetōb rej waļo̧k, kwonaaj maron̄ jutak pen kōnke pedped eo am̧ ilo jetōb epen im eban em̧m̧akūtkūt.