Pyetje dhe Përgjigje

“Nuk kam shumë gjëra të përbashkëta me njerëzit në grupin tim të të rinjve dhe të rejave. Si mund të ndihem më i/e lidhur me ta?”

“Ne jemi të gjithë fëmijë shpirtërorë të Atit tonë Qiellor dhe, si të tillë, jemi vëllezër e motra. Kur e mbajmë këtë të vërtetë në mendje, dashuria ndaj gjithë fëmijëve të Perëndisë do të bëhet më e lehtë.”

Presidenti Tomas S. Monson (1927–2018), “Dashuria – Thelbi i Ungjillit”, konferenca e përgjithshme e prillit 2014 (Ensign ose Liahona, maj 2014, f. 91).

Drejtojuni Individit

“Unë ndihem më e lidhur me të tjerët kur përpiqem vërtet të shpenzoj kohë me ta individualisht, jo thjesht në mjedise grupi. Nëse doni të gjeni dikë me të cilin ose të cilën të shkoni mirë, drejtojuni një personi që duket se ka nevojë për një shok ose shoqe. Mund të përfundoni duke përfituar më shumë se ata!”

Latiana P., 17 vjeçe, Singapor

Shprehini Interesat Tuaja

“Shumica e njerëzve në grupin tim të të rinjve dhe të rejave kanë gjëra të ndryshme për të cilat kanë interes. Më pëlqen t’i pyes për interesat e tyre, sepse kjo tregon që unë dua t’ia di për ta. Pastaj më jep mundësinë që të pyes edhe për interesat e mia. Krijimi i lidhjeve me njerëzit kërkon kohë – bëjeni vazhdimisht!”

Erin F., 18 vjeçe, Jutë, SHBA

Gjeni Gjëra të Përbashkëta

“Nëse doni të keni një marrëdhënie më të ngushtë me grupin tuaj të shokëve ose shoqeve, gjeni gjëra të mira, domethënëse që ju mund t’i bëni së bashku, edhe sikur të jenë shumë pak. Mund të gjeni një hobi ose diçka për të kaluar kohën që e pëlqeni të gjithë. Kërkoni ndihmë nga Ati Qiellor dhe Ai do t’ju japë frymëzim.”

Karla V., 12 vjeçe, Peru

Vlerësojini Dallimet Midis Jush

“Sa më shumë kohë që kaloj me njerëzit në grupin tim të të rinjve dhe të rejave, aq më shumë më pëlqejnë gjërat që janë unike rreth tyre. Mësoj se si t’u shërbej atyre më mirë, gjë që më ndihmon të afrohem më shumë me ta dhe me Jezu Krishtin. Ne jemi të gjithë fëmijë të Atit tonë Qiellor, kështu që kemi më shumë gjëra të përbashkëta nga sa mendojmë.”

Sara M., 16 vjeçe, Oregon, SHBA

Provoni Gjëra të Reja

“Thjesht jini miqësorë dhe vazhdoni të flisni me ta. Vazhdoni të provoni gjëra të reja që të jeni më përfshirës. Një djali në lagjen tonë të Kishës nuk i pëlqejnë sportet, por ai gjithmonë luan me ne. Më pas ne bëjmë gjëra që i interesojnë atij, si veprime magjike ose hedhje kartash si magjistarët. Të provuarit e gjërave të reja është një mënyrë e mirë që të ndihemi të lidhur.”

Xherën M., 17 vjeç, Nova-Skoshia, Kanada

Përgjigjet synojnë të japin ndihmë dhe këndvështrim, nuk jepen si deklarime zyrtare të doktrinës së Kishës.

Ndihmoni

“Afrojuni dhe ndihmojeni dikë në grupin tuaj të të rinjve dhe të rejave që është në një kohë nevoje. Kur përpiqemi të jemi një shembull i dashurisë së Shpëtimtarit, ajo do të na ndihmojë të bëhemi më të lidhur me njëri‑tjetrin.”

Xhoshua C., 20 vjeç, Faleniu, Samoa Amerikane

Jini Vetvetja

“Me kalimin e kohës ndoshta do të gjeni gjëra që i keni të përbashkëta, por mbase jo pikërisht tani. Ndërkohë, ju mund të krijoni lidhje me anë të veprimtarive dhe gjërave që ndodhin gjatë javës. Kënaquni me veprimtaritë. Zgjidhni të merrni pjesë dhe jini vetvetja!”

Hana W., 18 vjeçe, Nova-Skoshia, Kanada

Çfarë Mendoni?

“Nganjëherë ndiej se prindërit e mi më kritikojnë së tepërmi. Si mund t’u përgjigjem me respekt?”

Dërgojeni përgjigjen dhe fotografinë tuaj deri më 15 shkurt 2022.

Shkoni te ftsoy.ChurchofJesusChrist.org dhe klikoni te “Submit Your Work” [“Dorëzoni Punimin Tuaj”]. Nënshkruajeni hyrjen në Llogarinë tuaj të Kishës dhe më pas përzgjidhni “For the Strength of Youth” [“Për Forcën e Rinisë”] nën “Choose Magazine” [“Zgjidh Revistën”]. Klikoni tek “Add File” [“Shto një Material”] që të përzgjidhni materialin dhe fotografitë tuaja dhe më pas klikoni te “Submit” [“Dorëzo”] për ta ngarkuar dhe për të na e dërguar materialin tuaj. Ose na dërgoni mesazh me postë elektronike te [e-mail].

Përgjigjet mund të redaktohen lidhur me gjatësinë apo qartësinë.