“Ko e Taimí ʻEni,” Ki Hono Fakamālohia ʻo e Toʻu Tupú, Mē 2022.
Fakataha ʻo e Hoʻatā Sāpaté
Ko e Taimí ʻEni
Ngaahi Konga Fakamatala
ʻOku taʻepau maʻu pē ʻa e kahaʻú. ʻOku feliliuaki ʻa e ʻeá. ʻOku fakaʻalongaua ʻa e ngaahi tuʻunga fakaʻekonōmiká. ʻE lava ke liliu vave e moʻuí ʻi he ngaahi fakatamaki fakaenatulá, fakatamaki fakatuʻupakeé mo e mahamahakí. ʻOku ope atu ʻa e ngaahi meʻá ni ʻi he meʻa ʻoku tau lava ʻo mapuleʻí. Ka ʻoku ʻi ai ha ngaahi meʻa te tau lava ʻo mapuleʻi, kau ai ʻetau fakaʻaongaʻi fakaʻaho hotau taimí. …
ʻIo, ʻoku totonu ke tau ako mei he kuohilí, pea ʻio, ʻoku totonu ke tau teuteu ki he kahaʻú. Ka ko e taimi pē ʻeni te tau lava aí. Ko e taimi ʻeni ke tau ako aí. Ko e taimi ʻeni ke tau fakatomala aí. Ko e taimi ʻeni ke tau tāpuekina ai ʻa e niʻihi kehé mo “hiki hake ʻa e ngaahi nima ʻoku tautau ki laló” [Hepelū 12:12]. …
… ʻOku ou toe fakaongo atu ʻeku tapou mei he pongipongí ni ke fakahoko ʻa e ngaahi meʻa ʻe fakalahi ai hoʻo tupulaki lelei fakalaumālié, ʻa e mahiki naʻe lave ki ai ʻa ʻEletā Tieta F. ʻUkitofá, ʻa ia te ne kei ueʻi ai pē koe ki muʻa neongo e ngaahi pole mo e faingamālie ʻe hoko maí.
ʻOku fakalahi ʻa e tupulaki lelei fakalaumālié ʻi heʻetau moihū ʻi he temipalé mo fakalakalaka ʻetau mahino ki he loloto mo e fakaofo ʻo e ngaahi tāpuaki ʻoku tau maʻu ʻi aí. ʻOku ou kōlenga atu ke mou fehangahangai mo e ngaahi founga ʻa e māmaní ʻaki homou nofotaha ʻi he ngaahi tāpuaki taʻengata ʻo e temipalé. …
ʻOku ou ʻofa atu, siʻoku ngaahi tokoua mo e tuofāfine ʻofeina. Kae mahulu hake aí, ʻoku ʻofeina kimoutolu ʻe he ʻEikí. Ko Ia homou Fakamoʻuí mo homou Huhuʻí. Ko Ia ʻokú Ne taki mo fakahinohino Hono Siasí. ʻOfa ke tau hoko ko ha kakai ʻoku taau mo e ʻEikí, ʻa ia naʻe folofola, “Te mou hoko ko hoku kakai, pea te u hoko ko homou ʻOtua” [Selemaia 30:22].