“Ka Naʻe ʻIkai Te Mau Tokanga Kiate Kinautolu,” Ki Hono Fakamālohia ʻo e Toʻu Tupú, Mē 2022.
Fakataha ʻo e Pongipongi Tokonakí
Ka naʻe ʻikai te mau tokanga kiate kinautolu (1 Nīfai 8:33)
Ngaahi Konga Fakamatala
ʻOku fokotuʻu mai ʻe he foʻi lea tokangá ʻa hono siofi lelei pe matuʻaki fakatokangaʻi ha taha pe ko ha meʻá. …
ʻOku fakatupulaki ʻe he tokāteline ʻo Kalaisi ʻa ia ʻoku tohi “ʻaki e Laumālie ʻo e ʻOtua moʻuí … ʻi he kakano ʻo [hotau ngaahi lotó]” [2 Kolinitō 3:3] ʻa ʻetau malava ke “ʻoua ʻe tokanga” ki he ngaahi fakafeʻātungia, manuki, mo e fakahē lahi ʻo hotau māmani hingá. …
ʻOku fokotuʻu ʻe hono moʻui ʻaki mo ʻofeina e ngaahi tukupā ʻo e fuakavá ha fehokotaki mo e ʻEikí ʻa ia ʻoku fuʻu matuʻaki fakataautaha mo mālohi fakalaumālie. …
Ko ʻetau fehokotaki he fuakavá mo e ʻOtuá mo Sīsū Kalaisí, ko e founga ia ʻe lava ai ke tau maʻu e ivi malava mo e mālohi ke “ʻoua ʻe tokanga ki ai.” Pea oku fakamālohia e fehokotaki ko ʻení ʻi he hokohoko atu ʻetau piki maʻu maʻu ai pē ki he vaʻa ukameá. …
Tuku ke u fokotuʻu atu ʻoku kau ʻi he piki maʻu ki he folofola ʻa e ʻOtuá ʻa hono (1) manatua, fakaʻapaʻapaʻi, mo fakamālohia e fehokotaki fakataautaha ʻoku tau maʻu mo e Fakamoʻuí mo ʻEne Tamaí ʻi he ngaahi fuakava mo e ngaahi ouau ʻo e ongoongolelei kuo fakafoki maí, mo e (2) fakaʻaongaʻi maʻu pē ʻi he faʻa lotu mo fakamātoato ʻa e ngaahi folofola toputapú mo e ngaahi akonaki ʻo e kau palōfita mo e kau ʻaposetolo moʻuí, ko ha ngaahi maʻuʻanga tokoni pau ia ki he moʻoni kuo fakahā maí. …
Vilitaki atu. Piki maʻu. ʻOua ʻe tokanga ki ai.
ʻOku ou fakamoʻoniʻi ʻoku malava ʻe he fai pau ki he ngaahi fuakava mo e ngaahi ouau ʻo e ongoongolelei ʻo e Fakamoʻuí kuo fakafoki maí, te tau lava ʻo vilitaki atu ʻi he ngāue ʻa e ʻEikí, ke piki maʻu kiate Ia ko e Folofola ʻa e ʻOtuá, pea ʻoua ʻe tokanga ki he ngaahi fakatauele ʻa e filí.