“Ke Fakamoʻui ʻa e Māmaní,” Ki Hono Fakamālohia ʻo e Toʻu Tupú, Mē 2022.
Fakataha ʻo e Pongipongi Sāpaté
Ke Fakamoʻui ʻa e Māmaní
Ngaahi Konga Fakamatala
Ko e hā ʻa e tauʻatāina fakalotú?
Ko e tauʻatāina ke fai ha moihū ʻi ha faʻahinga tūkunga pē: tauʻatāina ke fakataha, tauʻatāina ke lea, tauʻatāina ke ngāue fakatatau mo e ngaahi tui fakatāutahá, mo e tauʻatāina ki he niʻihi kehé ke nau fai ʻa e meʻa tatau. ʻOku fakaʻatā kitautolu takitaha ʻe he tauʻatāina fakalotú ke tau fili maʻatautolu ʻa e meʻa ʻoku tau tui ki aí, anga ʻetau moʻui mo ngāue ʻo fakatatau ki heʻetau tuí, mo e meʻa ʻoku finangalo ʻe he ʻOtuá meiate kitautolú. …
Lolotonga ʻo e fuʻu moveuveu ʻi he 1842, ne pulusi ʻe Siosefa ha ngaahi tefitoʻi tui lalahi ʻe 13 ʻo e Siasi kuo kamata ke tupú, ʻo kau ai eni: “ʻOku mau ʻekea ʻa e faingamālie ke hū ki he ʻOtua Māfimafí ʻo fakatatau ki he ngaahi tuʻutuʻuni ʻa homau konisēnisi ʻomautolú pē, pea tuku ki he kakai kotoa pē ʻa e faingamālie tatau, ʻo tukuange ke nau lotu, pe ʻe founga fēfē, pe ʻe fai ʻi fē, pe ko e hā te nau lotu ki aí” [Ngaahi Tefito ʻo e Tuí 1:11].
Ko ʻene fakamatalá ʻoku tauʻatāina, fakaʻapaʻapa, mo fakakau ki ai ʻa e meʻa kotoa pē. Ko e ʻelito ia ʻo e tauʻatāina fakalotú. …
Tau vakai fakataha ki he founga ʻe fā ʻoku kau lelei ai ʻa e tauʻatāina fakalotú ki he sosaietí mo e niʻihi fakafoʻituituí.
ʻUluaki. ʻOku fakaʻapaʻapaʻi ʻe he tauʻatāina fakalotú ʻa e fekau lahi ʻuluaki mo e uá, ʻo fokotuʻu ʻa e ʻOtuá ko e uho ia ʻo ʻetau moʻuí. …
Ua. ʻOku fakaʻaiʻai ʻe he tauʻatāina fakalotú ʻa hono fakahaaʻi ʻo e tuí, ʻamanaki leleí, mo e melinó. …
Tolu. ʻOku ueʻi ʻe he tui fakalotú ʻa e kakaí ke nau tokoniʻi ʻa e niʻihi kehé. …
Pea ko hono faá. ʻOku hoko ʻa e tauʻatāina fakalotú ko ha mālohi ʻokú ne fakatahatahaʻi mo fālute ʻa e kakaí ke liliu ʻa e ngaahi ʻulungāngá mo e tuʻunga fakaeangamaʻá. …
ʻOku ou fakaafeʻi kimoutolu ke mou taukaveʻi ʻa e tauʻatāina fakalotú. Ko hano fakahaaʻi ia ʻo e tefitoʻi moʻoni faka-ʻOtua ʻo e tauʻatāiná.