“Muimui ʻia Sīsū: Hoko ko ha Tokotaha Faʻa Fakalelei,” Ki Hono Fakamālohia ʻo e Toʻu Tupú, Mē 2022.
Fakataha ʻo e Pongipongi Tokonakí
Muimui ʻia Sīsū: Hoko ko ha Tokotaha Faʻa Fakalelei
Ngaahi Konga Fakamatala
Naʻe akoʻi ʻe he ʻEikí e founga ke moʻui ai ʻi hono kuongá mo hotau kuongá, ʻi ha māmani fonu he tāufehiʻá mo e taʻefakaʻapaʻapá. Naʻá Ne folofola ʻo pehē, “ʻOku monūʻia ʻa e faʻa fakaleleí, ʻe ui ʻa kinautolu ko e fānau ʻa e ʻOtuá” [Mātiu 5:9]. …
ʻOku fakanonga mo fakafiemālieʻi fēfē ʻe he tokotaha faʻa fakaleleí e ngaahi ngahau velá? Ko hono moʻoní he ʻikai lava ia ʻi he mavahe pē meiate kinautolu ʻoku nau talanoa tukuhifoʻi kitautolu. Ka ʻoku tau tuʻu maʻu ʻi heʻetau tuí, vahevahe atu ʻetau tuí ʻi he loto-fakapapau, kae fakamamaʻo maʻu pē mei he ʻitá pe tāufehiʻá. …
Ko e hā ha mālohi ʻi loto ke ne fakafiemālieʻi, fakanonga, mo tamateʻi e ngaahi ngahau vela ʻoku fakataumuʻa mai ki he ngaahi moʻoni ʻoku tau ʻofa aí? ʻOku maʻu e mālohi ko iá mei heʻetau tui kia Sīsū Kalaisí mo ʻetau tui ki Heʻene ngaahi leá. …
Neongo ko ʻetau fakaʻamu angavaivaí ke tauhi ʻe he taha kotoa pē e ngaahi akonaki ʻa e Fakamoʻuí, ka ʻoku faʻa fehangahangai e ngaahi folofola ʻa e ʻEikí ʻoku fakafou mai ʻi Heʻene kau palōfitá mo e fakakaukau mo e ākenga ʻo e māmaní. Kuo pehē maʻu ai pē. …
ʻOku tau ʻofa moʻoni mo tokanga ki hotau ngaahi kaungāʻapí kotoa, neongo pe ʻoku tau tui tatau pe ʻikai. …
… ʻOku ʻi ai e ngaahi taimi ʻi heʻete hoko ko e tokotaha faʻa fakaleleí te tau kātakiʻi e loto ke fai ha talí ʻaki e fakalongolongo ʻi he loto fakangeingeia. …
… Ko e meʻa fakamamahí, he ʻikai ke tuʻu maʻu e taha kotoa pē ʻi heʻenau ʻofa ki he Fakamoʻuí mo ʻenau loto moʻoni ke tauhi ʻEne ngaahi fekaú. …
Te tau lava foki mo kitautolu ʻo mavahe mei he fakakikihí ʻo tāpuekina e moʻui ʻa e niʻihi kehé, ʻo ʻikai fakamavaheʻi kitautolu mei he kakaí. …
Fakatauange ke tau ʻofa ʻiate Ia pea tau feʻofaʻaki. ʻOfa ke tau hoko ko e kau faʻa fakalelei, ke lava ʻo ui kitautolu ko e “fānau ʻa e ʻOtuá.”