“Tali e Finangalo ʻo e ʻOtuá,” Ki Hono Fakamālohia ʻo e Toʻu Tupú, Mē 2022.
Fakataha ʻo e Hoʻatā Tokonakí
Tali e Finangalo ʻo e ʻOtuá
Ngaahi Konga Fakamatala
Hili ha vahaʻataimi ʻo e ngāue tokoni mo e ngaahi aʻusia fakalaumālie ʻi heʻeku moʻuí, kuo mahino kiate au ko e ului moʻoní ko e ola ia ʻo hano tali ʻiloʻilo pau ʻa e finangalo ʻo e ʻOtuá, pea ʻe lava ke tataki kitautolu ʻe he Laumālie Māʻoniʻoní ʻi heʻetau ngaahi angafaí. …
Ko e hā e ngaahi tufakanga ʻoku tafe mai mei he uluí? …
… ʻOku fakaafeʻi kitautolu ʻe he Fakamoʻuí ʻi he manavaʻofa ke tau hoko ko Hono leʻo mo Hono toʻukupu. ʻE hoko ʻa e ʻofa ʻa e Fakamoʻuí ko hotau maama fakahinohino. Naʻe akonaki ʻa e Fakamoʻuí ki Heʻene kau ākongá ʻo pehē, “Ko ia ke ʻalu ʻa kimoutolu, ʻo fakalotuʻi ʻa e ngaahi puleʻanga kotoa pē.” [Mātiu 28:19]. Pea kia Siosefa Sāmitá, naʻá Ne folofola, “Malanga ʻaki ʻa ʻeku ongoongoleleí ki he kakai fulipē ʻa ia kuo teʻeki ai ke maʻu iá” [Tokāteline mo e Ngaahi Fuakava 112:28]. …
Koeʻuhí ke hoko e fekau ʻa e Fakamoʻuí ke vahevahe e ongoongoleleí ko ha konga ia ʻo kitautolú, ʻoku fie maʻu ke tau tali ʻa e finangalo ʻo e ʻOtuá; ʻoku fie maʻu ke tau ʻofa ki hotau kaungāʻapí, vahevahe e ongoongolelei ʻo Sīsū Kalaisi kuo fakafoki maí, pea fakaafeʻi ʻa e tokotaha kotoa pē ke haʻu ʻo mamata. …
ʻOku kau ʻi heʻetau ului fakatāutahá ʻa e tufakanga ke vahevahe ʻa e ongoongolelei ʻo Sīsū Kalaisí ki he māmaní.
Ko e ngaahi tāpuaki ʻo hono vahevahe ʻo e ongoongoleleí ʻoku kau ai ʻa hono fakatupulaki ʻo e ului ki he finangalo ʻo e ʻOtuá pea mo hono tuku ke lāngilangiʻia ʻa e ʻOtuá ʻi heʻetau moʻuí. ʻOku tau tāpuekina ʻa e niʻihi kehé ke nau aʻusia ha “fuʻu liliu lahi” ʻo e lotó” [ʻAlamā 5:14]. ʻOku ʻi ai moʻoni ha fiefia taʻengata ʻi he tokoni ke ʻomi e ngaahi laumālié kia Kalaisí. Ko e ngāue ko ia ke fakaului mai kita mo e niʻihi kehé ko engāue fakaʻeiʻeiki ia.