“‘Oua Te Ke Manavahē: Ka Ke Tui Pē!,” Ki Hono Fakamālohia ʻo e Toʻu Tupú, Mē 2022.
Fakataha ʻo e Hoʻatā Tokonakí
‘Oua Te Ke Manavahē: Ka Ke Tui Pē!
Ngaahi Konga Fakamatala
Koeʻuhí ko hotau tūkunga lolotonga ʻi he māmaní, ʻoku mahino pē ʻa e hōloa e tuʻunga vēkeveke ʻo e kakai kei talavoú. …
Ko ʻeku kole he ʻahó ni ki hotau toʻu tupú, mo kimoutolu mātuʻa mo e kakai lalahi ʻoku mou faleʻi kinautolú, ke mou kamata hoʻomou fekumi ki he fiefiá ʻaki haʻamou houngaʻia ʻi he ngaahi meʻa lelei ʻoku tau lolotonga maʻu mei he tokotaha ʻokú ne foaki ʻa e meʻa lelei kotoa pē. ʻI he taimi pē ʻoku fehuʻia ai ʻe he kakai tokolahi ʻi he māmaní ʻa e ngaahi fehuʻi faingataʻa fekauʻaki mo e natula ʻo e ngaahi meʻa fakalaumālié, ʻoku totonu ke tau tali ʻaki ʻa e “ongoongo fakafiefia” ʻa e ongoongolelei ʻo Sīsū Kalaisí. ʻOku ʻomi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa ia ʻokú ne fakamahuʻingaʻi ʻa e misiona mo e pōpoaki ʻa e Fakamoʻui ʻo e māmaní, ʻa e founga mahuʻinga taha mo taʻengata ki hono fakatou maʻu mo fakahoko ʻa ia ʻoku leleí lolotonga ha taimi faingataʻa pehē. …
Ki ha taha pē ʻi hotau toʻu tupú ʻoku faingataʻaʻia, ko e hā pē meʻa ʻokú ke hohaʻa pe faingataʻaʻia aí, ʻoku ʻikai ko e talí ʻa e mate taonakitá. He ʻikai mōlia ai e mamahi ʻokú ke ongoʻí pe ko ia ʻokú ke pehē ʻokú ke fakatupú. ʻI ha māmani ʻoku fuʻu fie maʻu ai ʻa e maama kotoa pē ʻe ala maʻú, ʻoua muʻa naʻá ke fakasiʻia e maama taʻengata naʻe foaki ʻe he ʻOtuá ki ho laumālié kimuʻa pea fakatupu e māmani ko ʻení. Talanoa ki ha taha. Kole ha tokoni. ʻOua muʻa naʻá ke fakaʻauha e moʻui naʻe foaki ʻe Kalaisi ʻEne moʻuí ke fakatolongá. Te ke lava ʻo kātekina e ngaahi faingataʻa ʻo e moʻui fakamatelié ni koeʻuhí te mau tokoniʻi koe ke ke kātekina kinautolu. ‘Okú ke mālohi ange ʻi he meʻa ʻokú ke mafakakaukauá. ʻOku maʻu e tokoni, mei he niʻihi kehé kae tautautefito mei he ʻOtuá. ‘Oku ʻofaʻi, fakamahuʻingaʻi mo fie maʻu koe! ʻOku mau fie maʻu koe! “‘Oua te ke manavahē: ka ke tui pē.” …
… ʻOku lahi fau e ngaahi meʻa ke tau nēkeneka aí. ʻOku tau maʻu e niʻihi kehé, pea ʻoku tau maʻu mo Ia. ʻOua naʻá ke fakaʻikaiʻi maʻamautolu ʻa e faingamālie ke maʻu koé.