“Fakahoko ʻa ia ʻOku Mahuʻinga Tahá,” Ki Hono Fakamālohia ʻo e Toʻu Tupú, Mē 2022.
Fakataha ʻa e Houʻeiki Fafiné
Fakahoko ʻa ia ʻOku Mahuʻinga Tahá
Ngaahi Konga Fakamatala
ʻI heʻete hoko ko ha ākonga ʻo Sīsū Kalaisí, ʻoku mahulu hake ia ʻi he fakaʻamu pe tui ʻataʻataá pē. ʻOku fie maʻu ki ai ʻa e feingá, ngāué, mo e tukupaá. ʻOku fie maʻu ke tau fai ha meʻa. …
ʻI heʻetau feinga ke fai ha meʻa pe fai ha faʻahinga meʻá, ʻe lava ke tau fehuʻi loto hifo, “Ko e hā ʻoku mahuʻinga tahá?” …
-
Ko e lahi ʻo e kakai ʻoku nau “saiʻia” ʻi he ngaahi meʻa ʻoku tau tohi ʻi he mītia fakasōsialé? Pe ko e lahi ʻo hono ʻofaʻi mo fakamahuʻingaʻi kitautolu ʻe heʻetau Tamai Hēvaní?
-
Ko hono tui e ākenga fakamuimuitaha ʻo e valá? Pe ko hono fakahaaʻi ha fakaʻapaʻapa ki hotau sinó ʻaki ʻa e teunga tāú?
-
Ko hono kumi ha ngaahi tali ʻi ha fekumi ʻi he ʻinitanetí? Pe ko hono maʻu ha ngaahi tali mei he ʻOtuá ʻo fakafou ʻi he Laumālie Māʻoniʻoní?
-
Ko ʻetau fie maʻu ha meʻa lahi angé? Pe fiemālie ʻi he meʻa pē kuo foaki maí? …
… Ko e ongoongolelei ʻo Sīsū Kalaisí ko ha ongoongolelei ia ʻo e ngāue mo ha ongoongolelei ʻo e fiefia! ʻOua muʻa naʻa tau fakasiʻia hotau tuʻunga malava ke fakahoko ʻa e ngaahi meʻa ko ia ʻoku mahuʻinga tahá. ʻOku ʻomi ʻe hotau tukufakaholo fakalangí ha loto-toʻa mo ha loto-falala ke fakahoko pea mo aʻusia ʻa e meʻa kotoa ʻoku ʻafioʻi ʻe heʻetau Tamai Hēvani ʻofá te tau lava ʻo aʻusiá. …
… Pea ʻoku ʻikai fekauʻaki ia mo hono fakahoko ha meʻa ʻoku lahi angé. ʻOku fekauʻaki ia mo hono fakahoko e meʻa ʻoku mahuʻingá. ʻOku fekauʻaki ia mo hono fakaʻaongaʻi e tokāteline ʻo Kalaisí ʻi heʻetau moʻuí, ʻi heʻetau feinga ke hoko ʻo hangē ko Iá. …
ʻI heʻetau fakatefito ʻetau moʻuí ʻia Sīsū Kalaisí, ʻe tākiekina kitautolu ke fakahoko ʻa ia ʻoku mahuʻinga tahá. Pea ʻe tāpuekina ai kitautolu ʻaki ha mālohi fakalaumālie, fiemālie, pea mo e fiefia!