“Ko Hotau Vā Fetuʻutaki Mo e ʻOtuá,” Ki Hono Fakamālohia ʻo e Toʻu Tupú, Mē 2022.
Fakataha ʻo e Pongipongi Sāpaté
Ko Hotau Vā Fetuʻutaki mo e ʻOtuá
Ngaahi Konga Fakamatala
ʻOku ʻikai totonu ke tau fakakaukau ʻoku hangē ʻa e palani ʻa e ʻOtuá ko ha mīsini fakatau ʻo e ʻunivēsí ke tau (i) fili atu pē ha tāpuaki ʻoku fie maʻu, (ii) fakahū atu e lahi ʻo e ngaahi ngāue leleí, pea (iii) maʻu taimi totonu leva ʻa e meʻa ne fie maʻú. …
ʻOku mahuʻinga ʻetau fakatomalá, talangofuá, ngaahi feilaulaú, mo ʻetau ngāue leleí. ʻOku tau fie maʻu ke tau hangē ko kinautolu ne fakamatalaʻi ʻe ʻEtá ke tau “fonu maʻu ai pē ʻi he ngaahi ngāue leleí” [ʻEta 12:4]. Ka ʻoku ʻikai ke fuʻu fakahoko ia koeʻuhí ko ha lekooti ʻoku tauhi ʻi ha ngaahi tohi fakamatala fakasilesitiale. ʻOku mahuʻinga ʻa e ngaahi meʻá ni koeʻuhí he ʻoku nau fakafemoʻuekinaʻi kitautolu ʻi he ngāue ʻa e ʻOtuá pea ko e founga ia ʻoku tau ngāue fakataha ai mo Ia ki hono liliu kitautolu mei he tangata fakaekakanó ki ha tokotaha māʻoniʻoní. Ko e meʻa ʻoku foaki mai ʻe he Tamai Hēvaní maʻatautolú ko Ia mo Hono ʻAló, ko ha vā fetuʻutaki vāofi mo tolonga mo Kinaua ʻo fakafou ʻi he ʻaloʻofa mo e fakalaloa ʻa Hono ʻAlo, ko Sīsū Kalaisi, ko hotau Huhuʻí.
… ʻOku finangalo ʻetau Tamaí ke tataki kotoa kitautolu ʻi Hono hala ʻo e fuakavá mo e ngaahi tuʻunga kuo faʻu ki heʻetau fiemaʻu fakafoʻituituí pea fakatatau ki Heʻene palani ki heʻetau fiefia taupotu mo Iá. …
Neongo ia, ʻoku ʻikai ke faingofua ʻa e halá ni kiate kitautolu. ʻOku lahi ʻa e ngaahi meʻa ke fakaleleiʻi kae toki lava ke faingofua ia. …
Ko ia, ʻi he lotolotonga ʻo e afi ʻa e tangata fakamaʻa ukamea ko ʻení, ʻunu ke ofi ki he ʻOtuá, kae ʻoua ʻe ʻita ki he ʻOtuá. Ui ki he Tamaí ʻi he huafa ʻo e ʻAló. ʻAʻeva mo Kinaua ʻi he Laumālié, ʻi he ʻaho kotoa pē. Fakaʻatā Kinaua ʻi ha vahaʻataimi feʻunga ke fakahā ʻEna faitōnunga kiate koé. Feinga ke ʻiloʻi moʻoni Kinaua peá ke ʻiloʻi moʻoni foki mo koe. Tuku ke Lāngilangiʻia ʻa e ʻOtuá.