“ʻOfa Fakalangi ʻi he Palani ʻa e Tamaí,” Ki Hono Fakamālohia ʻo e Toʻu Tupú, Mē 2022.
Fakataha ʻo e Hoʻatā Sāpaté
ʻOfa Fakalangi ʻi he Palani ʻa e Tamaí
Ngaahi Konga Fakamatala
ʻI he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní kuo fakafoki maí, ʻoku makehe ʻetau mahino ki he palani ʻa ʻetau Tamai Hēvaní. ʻOku ʻomi heni kiate kitautolu ha founga kehe ʻo e vakai ki he taumuʻa ʻo e moʻui fakamatelié, ko e fakamaau fakalangi ʻoku hoko mai aí, mo e ikuʻanga nāunauʻia ʻo e fānau kotoa ʻa e ʻOtuá. …
… ʻOku akoʻi mai ʻe he tokāteline ne fakahā ʻo e Siasi ʻo Sīsū Kalaisi kuo fakafoki maí, ʻe iku e fānau kotoa pē ʻa e ʻOtuá—ʻoku siʻisiʻi fau e ngaahi fakaʻatā makehé ke fakakau heni—ki ha puleʻanga ʻo e nāunaú. …
… Ko e māʻolunga taha aí ko e hakeakiʻi ʻi he puleʻanga fakasilesitialé ʻa ia te tau lava ai ʻo hoko ʻo hangē ko ʻetau Tamaí pea mo Hono ʻAlo ko Sīsū Kalaisí. …
… Ko e misiona ʻo e Siasi kuo fakafoki maí ke tokoniʻi ʻa e fānau kotoa pē ʻa e ʻOtuá ke nau taau mo e meʻa ʻoku finangalo ki ai ʻa e ʻOtuá ko honau ikuʻanga taupotu tahá. …
ʻOku mahuʻinga kiate kitautolu e fakahā ʻa e ʻOtuá ʻe toki lava pē ʻo maʻu e hakeakiʻí ʻi he angatonu ki he ngaahi fuakava ʻo ha mali taʻengata ʻi he vā ʻo ha tangata mo ha fefiné. Ko e “tuʻunga tangata pe fefiné ko ha ʻulungaanga mahuʻinga ia ʻoku ʻiloʻi ai ʻa e tuʻunga mo e taumuʻa ʻo e tokotaha fakafoʻituituí, ʻi he maama fakalaumālié, mo e moʻui fakamatelié pea mo e taʻengatá” (“Ko e Fāmilí: Ko ha Fanongonongo ki Māmani,” ChurchofJesusChrist.org]. …
… ʻOku tau fakapapauʻi ʻoku fakaʻuhingaʻi ʻe he fanongonongo ki he fāmilí, ne fakavaʻe ʻi he tokāteline taʻetoe ueʻiá, ʻa e faʻahinga fetuʻutaki fakafāmili ʻoku lava ke hoko ai ʻa e konga mahuʻinga taha ʻo ʻetau fakalakalaka taʻengatá. …
… Kuo pau ke tau feinga ke vahevahe e ngaahi moʻoni ko ʻeni ʻo e nofo taʻengatá mo e niʻihi kehé. Ka ʻi heʻetau ʻofa ki he kotoa hotau kaungāʻapí, ʻoku tau tali maʻu pē ʻenau ngaahi filí. Hangē ko ia ne akoʻi mai ʻe ha palōfita he Tohi ʻa Molomoná, kuo pau ke tau vilitaki atu ki muʻa ʻi he “ʻofa ki he ʻOtuá mo e kakai fulipē.” [2 Nīfai 31:20].