“Na Yaloda Taucoko,” Me iSakisaki ni iTabagone, Me 2022.
Soqoni ena Yakavi ni Sigatabu
Na Yaloda Taucoko
Veitikina lavetaki
Ni da sa tisaipeli i Jisu Karisito e sega walega ni dua vei ira na veika e vuqa eda cakava. Na iVakabula sai koya na kaukauwa veivakauqeti ena veika kece eda cakava. …
Vakacava beka na levu ni cakacaka kei na itavi e dau osooso vakalevu kina na noda bula? …
“Raica sa kila na Tamamudou Vakalomalagi ni sa yaga vei kemudou na ka kecega oqo.
“Ia dou vakasaqara taumada na matanitu ni Kalou kei na nona yalododonu, ia ena soli me kena ikuri vei kemudou na ka kecega oqo” [3 Nifai 13:32–33; raica talega na Maciu 6:32–33].
Ia oya e sega ni kena ibalebale ni rawarawa. E gadrevi ruarua kina na solibula kei na vakatatabu.
E gadrevi kina eso na ka me biu ka laiva na veika tale eso mera tubu.
… Na solibula e kena ibalebale me da kauta tani eso na ka ka sosomitaki ena veika e yaga vakalevu cake. …
Na vakatatabu e duidui mai na solibula ena dua mada ga na sala bibi. Ni da vakatabuya e dua na ka, eda sega ni laiva me kama tu ena icabocabo ni soro. Ia, eda biuta me vakayagataki ena veiqaravi ni Turaga. Eda vakatabuya Vua kei na Nona inaki tabu. …
Ni da raica na noda bula ka raica e dua na drau na ka me caka, eda vakila ni da sa uabaleti. Ni da raica ga e dua na ka—na sala duidui ni nodra lomani kei na qaravi na Kalou kei ira na Luvena, ena drau na sala duidui—eda na qai rawa ni cakacakataka na veika oqori ena reki.
Oqo na ivakarau ni noda solia na yaloda taucoko—ena noda solia na veika kecega e tauri keda lesu mai ka vakatabuya na kena vo vua na Turaga kei na Nona inaki.