“Si Jesukristo Mao ang Kalig-on sa Kabatan-onan—Mubo nga mga Kinutlo,” Alang sa Kalig-on sa mga Kabatan-onan, Nob. 2022.
Sabado sa Buntag nga Sesyon
Si Jesukristo Mao ang Kalig-on sa Kabatan-onan
Mubo nga mga Kinutlo
Kon kamo anaa sa mga pangedaron nga 11 ug 18, ako adunay mensahe alang kaninyo gikan sa atong Manluluwas, nga si Jesukristo.
Ang Mensahe sa Manluluwas nganha Kaninyo
Minahal nga batan-ong mga higala, kon ang Manluluwas ania karon, unsa kaha ang Iyang isulti kaninyo?
Ako nagtuo nga Siya mosugod sa pagpadayag sa Iyang dakong gugma alang kaninyo. …
Ug gani, tungod kay kitang tanan huyang ug dili perpekto, tingali kita mabalaka nga dili takos sa iyang gugma. Kamo tingali makahinumdom og mga sayop nga inyong nahimo, mga panahon nga kamo nagpadala sa tintasyon, mga butang nga kamo nanghinaot nga wala unta ninyo buhata—o nanghinaot nga kamo nakahimo unta og mas maayo. …
Ako nagtuo nga ang Manluluwas nga si Jesukristo gusto nga inyong makita, mabati, ug mahibaloan nga Siya mao ang inyong kalig-on. Nga uban sa Iyang tabang, walay kinutoban ang unsay inyong mahimo. …
Ang Manluluwas mopahayag, sa segurado gayod nga paagi, nga kamo usa ka anak nga babaye o anak nga lalaki sa Makagagahom nga Dios. Ang inyong Langitnong Amahan mao ang labing mahimayaon nga binuhat sa uniberso, puno sa gugma, hingpit nga kalipay, kaputli, kabalaan, kahayag, grasya, ug kamatuoran. Ug moabot ang adlaw nga Siya gusto nga kamo mopanunod sa tanan nga Iyang gipanag-iya. …
Aron mahimo kining posible, Siya mipadala ni Jesukristo aron mahimo ninyong Manluluwas. …
Kana mao ang inyong kapalaran. Kana mao ang inyong umaabot. Kana mao ang inyong pagpili!
Kamatuoran ug mga Pagpili
Ang labing importante sa plano sa Dios alang sa inyong kalipay mao ang inyong gahom sa pagpili. …
Kon kamo adunay importante nga mga pagpili nga himoon, si Jesukristo ug ang Iyang gipahiuli nga ebanghelyo mao ang labing maayong pagpili. Kon kamo adunay mga pangutana, si Jesukristo ug ang Iyang gipahiuli nga ebanghelyo mao ang labing maayong tubag. Kon kamo mobati nga naluya, si Jesukristo ang inyong kalig-on. …
Alang sa Kalig-on sa mga Kabatan-onan
Aron matabangan kamo nga makakaplag sa Dalan ug aron matabangan kamo nga mahimo ang doktrina ni Kristo nga giya nga impluwensiya sa inyong kinabuhi, Ang Simbahan ni Jesukristo sa mga Santos sa Ulahing mga Adlaw miandam og bag-ong kapanguhaan, giusab nga bersiyon sa Alang sa Kalig-on sa mga Kabatan-onan. …
Aron klaro kaayo, ang labing maayong giya nga posible ninyong maangkon sa paghimo og mga pagpili mao si Jesukristo. Si Jesukristo mao ang kalig-on sa kabatan-onan.
Mao nga ang katuyoan sa Alang sa Kalig-on sa mga Kabatan-onan mao ang pagtudlo ninyo ngadto Kaniya. …
Importante usab nga makahibalo unsa ang dili mahimo sa Alang sa Kalig-on sa mga Kabatan-onan. Kini dili mohimo og mga desisyon alang ninyo. Kini dili mohatag ninyo og “oo” o “dili” mahitungod sa matag pagpili nga mahimo ninyong atubangon. Ang Alang sa Kalig-on sa mga Kabatan-onan nagtutok sa pundasyon alang sa inyong mga pagpili. Kini nagtutok sa mga mithi, mga baroganan, ug doktrina imbis sa matag piho nga kinaiya. …
Sayop ba nga adunay mga lagda? Sa tinuod dili. Kita nagkinahanglan niini matag adlaw. Apan sayop nga motutok lamang sa mga lagda imbis nga motutok sa Manluluwas. …
Usa ka Mas Taas nga Sumbanan
Si Jesukristo adunay taas kaayo nga mga sumbanan alang sa Iyang mga sumusunod. Ug ang imbitasyon nga matinguha sa kinasingkasing sa Iyang kabubut-on ug magsunod sa Iyang mga kamatuoran mao ang posible nga labing taas nga sumbanan!
Importante nga temporal ug espirituwal nga mga pagpili kinahanglan nga dili lamang ibase sa personal nga kagustohan, o unsay sayon o inila. Ang Ginoo wala mag-ingon, “Buhata bisan unsay inyong gusto.”
Siya nag-ingon, “Ipatigbabaw ang Dios labaw sa tanan.”
Siya nag-ingon, “Dali, sunod kanako.”
Siya nag-ingon, “Pagpuyo og mas balaan, mas taas, mas hingkod nga paagi.”
Siya nag-ingon, “Paghupot sa akong mga sugo.”
Si Jesukristo mao ang atong hingpit nga ehemplo, ug kita maningkamot uban sa tibuok kusog sa atong kalag sa pagsunod Kaniya.
Minahal kong mga higala, tugoti ko nga mosubli, kon ang Manluluwas nagbarog karon dinhi, Siya mopadayag sa Iyang walay kinutoban nga gugma alang kaninyo, sa Iyang hingpit nga pagsalig kaninyo. Siya mosulti kaninyo nga kamo makahimo niini. Kamo makatukod og makalingaw, malipayon nga kinabuhi tungod kay si Jesukristo mao ang inyong kalig-on. Kamo makakaplag og pagsalig, kalinaw, kasegurohan, kalipay, ug pagkaapil karon ug sa kahangtoran, tungod kay kamo makakaplag niining tanan diha ni Jesukristo, sa Iyang ebanghelyo, sa Iyang Simbahan.