“Gituboy diha sa Krus—Mubo nga mga Kinutlo,” Alang sa Kalig-on sa mga Kabatan-onan, Nob. 2022.
Gituboy diha sa Krus
Mubo nga mga Kinutlo
Usa ka rason nga wala nato hatagi og gibug-aton ang krus isip usa ka simbolo nagbase gikan sa atong biblikanhon nga mga tinubdan. Tungod kay ang paglansang sa krus maoy usa sa mga pinakasakit nga matang sa pagsilot didto sa Imperyo sa mga Romano, daghan sa nag-una nga mga sumusunod ni Jesus mipili nga dili hatagan og importansiya kanang bangis nga instrumento sa pag-antos. Ang kahulogan sa kamatayon ni Jesus piho nga mao ang pinakasentro sa ilang hugot nga pagtuo, apan sulod sa mga 300 ka tuig sila sa kasagaran naningkamot sa pagpadayag sa ilang ilhanan sa ebanghelyo sa ubang mga paagi. …
Lain pa nga rason sa dili paggamit sa gihatagan og interpretasyon nga mga krus mao ang atong paghatag og gibug-aton sa hingpit nga milagro sa misyon ni Kristo—ang Iyang mahimayaong Pagkabanhaw ingon man ang Iyang pangsakripisyo nga pag-antos ug kamatayon. …
… Sa matag dapit ug panahon, Siya nagsulti kanatong tanan, “Kon ang usa ka tawo [o babaye] buot mahimong akong tinun-an kinahanglang dili siya magtuman sa iyang kaugalingon, pas-anon niya ang iyang krus ug mosunod siya kanako.”[Mateo 16:24].
Kini naghisgot sa mga krus nga atong gipas-an kay sa nianang atong gisul-ob. Aron mahimong usa ka sumusunod ni Jesukristo, ang tawo usahay gikinahanglan nga mopas-an og palas-onon—imong kaugalingon o sa uban—ug moadto kon diin ang sakripisyo gikinahanglan ug ang pag-antos dili kalikayan. Ang tinuod nga Kristiyano dili makasunod sa Agalon ngadto lamang sa mga butang nga iyang ganahan. Dili. Kita mosunod Kaniya bisan asa, lakip na, kon gikinahanglan gayod, ngadto sa mga natad nga puno sa mga luha ug kasamok, diin usahay kita mahimong magbarog sa hilabihan nga pag-inusara.
… Hinaot nga kita mosunod Kaniya—sa walay pagkapakyas, dili gayod mapaling ug dili mopalayo, dili gayod moatras sa gimbuhaton, dili bisan kon ang atong mga krus tingali bug-at ug dili bisan pa, kon sa mubong panahon, ang agianan tingali mag-anam og kangitngit.