“Isul-ob ang Imong Kusog, O Zion—Mubo nga mga Kinutlo,” Alang sa Kalig-on sa mga Kabatan-onan, Nob. 2022.
Isul-ob ang Imong Kusog, O Zion
Mubo nga mga Kinutlo
Kinasingkasing akong nag-ampo nga ang Espiritu Santo molamdag sa matag usa kanato samtang atong ikonsiderar karon ang kaimportante sa sambingay sa harianon nga kombira sa kasal. …
Samtang ang hari misulod sa hawanan sa kasal, iyang gitan-aw ang mga tumatambong ug dihadiha dayon nabantayan nga usa ka dayag nga bisita wala magsul-ob og bisti nga angay sa kasal. Ang tawo gidala sa atubangan, ug ang hari nangutana, “Higala, giunsa man nimo pagsulod dinhi nga wala ka man magsul-ob og bisti nga angay sa kasal? Apan wala makatingog ang tawo. [Mateo 22:12]. …
… Ang pagdumili sa tawo nga mosul-ob sa bisti nga angay sa kasal nagpakita og klaro kaayo nga kawalay pagtahod alang sa hari ug sa iyang anak nga lalaki. Siya wala lang nagkulang og bisti nga angay sa kasal; hinuon, siya mipili nga dili mosul-ob niini nga bisti. … Ang reaksiyon sa hari paspas ug lig-on: “Gaposa ninyo ang iyang mga kamot ug tiil ug ilabay siya ngadto sa kangitngit sa gawas; Didto maghilak siya ug magkagot ang iyang mga ngipon” [Mateo 22:13].
… Ang iyang kakulang sa tukma nga sinina nagpakita sa iyang kinahiladmang pagrebelde batok sa hari ug sa iyang mga instruksiyon.
Ang sambingay mitapos dayon uban niini nga maduloton nga kasulatan: “Kay daghan ang gidapit, apan diyutay ra ang gipili” [Mateo 22:14].
… Ang Dios walay listahan sa paborito nga mga tawo diin kinahanglan gayod nga maglaom kita nga ang atong mga ngalan sa umaabot nga adlaw madugang. Siya wala naglimita ‘sa mga pinili’ ngadto sa pipila lamang. Hinuon, ang atong mga kasingkasing, ang atong mga tinguha, ang atong pagtahod sa sagrado nga mga pakigsaad ug mga ordinansa sa ebanghelyo, ang atong pagkamasulundon ngadto sa mga sugo, ug labing importante, ang matubsanon nga grasya ug kaluoy sa Manluluwas maoy basehan kon kita maihap ba nga usa sa mga pinili sa Dios. …
Samtang kita tukmang magtinguha alang sa espirituhanon nga gasa sa mga mata nga makakita ug mga dalunggan nga makadungog, ako mosaad nga kita mapanalanginan sa kapasidad ug paghukom sa pagpalig-on sa atong pakigsaad nga koneksiyon ngadto sa buhi nga Ginoo. Kita usab makadawat sa gahom sa pagka-diosnon sa atong mga kinabuhi—ug sa kataposan matawag ug mapili alang sa kombira sa Ginoo.