“Sunda si Jesukristo uban sa mga Lakang sa Hugot nga Pagtuo—Mubo nga mga Kinutlo,” Alang sa Kalig-on sa mga Kabatan-onan, Nob. 2022.
Sunda si Jesukristo uban sa mga Lakang sa Hugot nga Pagtuo
Mubo nga mga Kinutlo
Mga kaigsoonan, ako mopamatuod nga kon kita mosunod ni Jesukristo uban sa matag lakang sa hugot nga pagtuo, adunay paglaom. Adunay paglaom diha ni Ginoong Jesukristo. Adunay paglaom alang sa tanan niini nga kinabuhi. Adunay paglaom sa pagbuntog sa atong mga sayop, sa atong mga kasubo, sa atong mga pakigbisog, ug sa atong mga pagsulay ug mga kasamok. Adunay paglaom diha sa paghinulsol ug pagdawat og pasaylo ug sa pagpasaylo sa uban. Ako mopamatuod nga adunay paglaom ug kalinaw diha ni Kristo. Siya makasuporta kanato karon taliwala sa malisod nga mga panahon. Siya mihimo niini sa unang mga pioneer, ug Siya mohimo niini karon alang sa matag usa kanato. …
Samtang ako maghunahuna mahitungod sa mga pioneer kinsa miandam sa dalan alang sa uban, una nakong mahunahunaan si Propeta Joseph Smith. …
Ang atong mga misyonaryo karon mao ang moderno nga mga pioneer tungod kay sila mopaambit niining mahimayaon nga mensahe [sa Pagpahiuli] ngadto sa mga tawo sa tibuok kalibotan, sa ingon nag-abli sa dalan alang sa mga anak sa atong Langitnong Amahan nga makaila Kaniya ug sa Iyang Anak, si Jesukristo. …
Si Presidente Nelson usa ka pioneer sa Simbahan. …
Siya nagtudlo nato unsaon nga mahimong mas makabarog sa kinaugalingon nga paningkamot diha sa espirituhanong paagi. …
Ang atong Manluluwas, si Jesukristo, mao ang pinaka-pioneer sa pag-andam sa dalan. Sa pagkatinuod, Siya mao “ang dalan” [Juan 14:6] alang sa plano sa kaluwasan nga matuman aron nga kita makahinulsol ug, pinaagi sa hugot nga pagtuo diha Kaniya, makabalik ngadto sa atong Langitnong Amahan. …
Hinaot nga kita mosunod sa mga lakang ni Jesukristo ug, uban sa hugot nga pagtuo sa atong matag lakang, motutok diha Kaniya, mopalig-on sa atong mga tiil diha sa dalan sa pakigsaad.