“Fakafehokotakí,” Ki Hono Fakamālohia ʻo e Toʻutupú, Tīsema 2022.
Fakafehokotakí
Svyataslava A.
15, Mosikou, Lūsia
Faitā ʻa Katerina Gracheva
Ko hoku hingoá ko Viatasilava, pea ko ʻeku haʻú mei Mosikou, Lūsia.
Kiate aú, ko e lotú ko ha fetalanoaʻaki ia mo e Tamai Hēvaní. ʻI he taimi ʻoku ou lotu aí, ʻoku ou lava ʻo fakamatala kiate Ia ʻeku ngaahi hohaʻá mo e fiefiá. ʻOku ou lava ʻo fakamālō mo fehuʻi kiate Ia fekauʻaki mo ha ngaahi meʻa.
ʻI ha ʻaho ʻe taha, hili haʻaku ngāue fakafofonga ʻi he temipalé, naʻá ku ʻalu ki he loki talitalí. Naʻe faʻa tokolahi e kakai aí, ka ʻi heʻeku hū atu ki he lokí, naʻe ʻikai ha taha ai. Naʻá ku fakaʻaongaʻi e mōmeniti fakataautaha mo fakalongolongo ko iá ke u lotu ai. Naʻá ku fakamālō ki he Tamai Hēvaní koeʻuhí ko e ngaahi aʻusia kuó u maʻú. Naʻá ku fehuʻi kiate Ia fekauʻaki mo e ngaahi meʻa naʻe mahuʻinga kiate aú. ʻI he fakaʻosinga ʻo ʻeku lotú, naʻá ku manatuʻi ʻeku kui fefine hono uá, ʻa ia ne u ʻofa lahi ki aí, peá u kole ki he ʻOtuá pe ʻe lava ke u ongoʻi ʻene fāʻofuá.
ʻI he ʻosi ʻeku lotú, naʻe hū mai hoku kaungāmeʻá ki he lokí ʻo fāʻofua mai kiate au. Naʻá ku fakakaukau leva ki heʻeku kui fefine hono uá peá u manatuʻi ʻene fāʻofua ʻofá. Ne ma tangi fakataha ʻi heʻema ongoʻi e Laumālie Māʻoniʻoní. Naʻe fakapapauʻi mai ʻe he meʻá ni kiate au ʻoku fanongo mo ʻafioʻi au ʻe he ʻEikí. ʻOku ou ʻiloʻi ʻokú Ne moʻui mo ʻofa ʻiate au.