“Ko e hā ʻoku mahuʻinga ai e ngaahi tuʻunga moʻui ʻo e Siasí? Te u maʻu fēfē ha fakamoʻoni ki aí?,” Ki Hono Fakamālohia ʻo e Toʻutupú, Tīsema 2022.
Ngaahi Fehuʻí mo e Talí
Ko e hā ʻoku mahuʻinga ai e ngaahi tuʻunga moʻui ko ʻení? Te u maʻu fēfē nai ha fakamoʻoni ki ai?
ʻOku Nau Hiki Hake mo Fakamāmaʻi Kitautolu
“ʻOku mahuʻinga e ngaahi tuʻunga moʻuí he ʻoku nau hiki hake mo fakamaama kitautolu. ʻOku nau tataki foki kitautolu ke tau fakahoko e ngaahi fili ʻoku totonú, ʻa ia ʻokú ne tokoniʻi kitautolu ke tau ofi ange kia Kalaisí. Te tau lava ʻo maʻu ha fakamoʻoni ʻo e ngaahi tuʻunga moʻuí ʻaki ʻetau lau mo ako e kiʻi tohi tufa Ki Hono Fakamālohia ʻo e Toʻutupú, ʻa ia ʻokú ne fakahaaʻi ha ngaahi tefitoʻi moʻoni mo ha ngaahi tuʻunga moʻui mahuʻinga ke tau muimui ki ai.”
Samuel C., 15, Brazil
ʻOku Tokangaʻi Kitautolu ʻe he ʻEikí
“ʻOku mahuʻinga ʻaupito e ngaahi tuʻunga moʻui ʻo e Siasí ki heʻetau moʻui lelei fakaesino mo fakaeʻatamaí. ʻOku finangalo ʻa e ʻEikí ke tau moʻui lelei mo fiefia, pea ʻokú Ne fokotuʻu ha ngaahi tuʻunga moʻui ke tokangaʻi ʻaki kitautolu! Ke maʻu ha fakamoʻoni ki he ngaahi moʻoni ko ʻení, kuo pau ke tau lotu ke ʻilo pe ʻoku moʻoni, lau e folofolá, mo tauhi e ngaahi fekaú. ʻOku finangalo e ʻEikí ke tau maʻu ha fakamoʻoni ki he ngaahi moʻoni ko ʻení.”
Dana S., 12, Argentina
Fekumi ki ha Ngaahi Tāpuaki
“ʻOku mahuʻinga e ngaahi tuʻunga moʻui ʻa e Siasí he ʻoku nau tokoniʻi kitautolu ke tau fakalakalaka pea hoko ʻo hangē ko e ʻEiki ko Sīsū Kalaisí. Kuó u maʻu ha fakamoʻoni ki heni ʻi heʻeku fekumi ki he ngaahi tāpuaki ʻoku maʻu mei he muimui ki he ngaahi tuʻunga moʻui ʻa e Siasí. ʻOku fakamanatu mai heni kiate au ʻa e taumuʻa fakalangi ʻo e tuʻunga moʻui takitaha pea ʻokú ne fakaʻaiʻai au ke u nofo maʻu ʻi he hala ʻo e fuakavá.”
Christian R., 18, Utah, USA
ʻOku ʻOmi ʻe he Ngaahi Tuʻunga Moʻuí ha Fiefia
“ʻOku ʻomi kitautolu ʻe he ngaahi tuʻunga moʻui ʻo e Siasí ke tau ofi ange kia Kalaisi. ʻOku nau tokoni ke fakafenāpasi kitautolu ki he palani ʻa e Tamai Hēvaní, ʻa ia ʻokú ne ʻomi kiate kitautolu ʻa e fiefia taʻengatá. ʻI heʻetau fili ke muimui ki he ngaahi tuʻunga moʻui ko ʻení, te tau lava ʻo fakamālohia ʻetau tui kia Kalaisí pea hoko ʻo hangē ko Iá.”
Kenison M., 17, Virginia, USA
Fakaʻaongaʻi e Tuí, pea Falala ki he Finangalo ʻo e ʻOtuá
“Kapau te u fili ke tauhi e ngaahi tuʻunga moʻui ʻo e Siasí, te u maʻu ha fakamoʻoni ki ai ʻo fakafou ʻi he Laumālie Māʻoniʻoní. ʻOku tau ʻilo mei he ʻEta 12:6 ʻoku ʻʻikai [ke] tau maʻu ha fakamoʻoni kae ʻoua kuo hili hono ʻahiʻahiʻi ʻo ʻetau tuí.’ Kapau te tau maʻu ha tui feʻunga ke falala ko e ngaahi tuʻunga moʻui ko ʻení ko e finangalo ia ʻo e ʻOtuá maʻatautolú, te tau maʻu ha fakamoʻoni ki ai ʻi he taimi ʻa e ʻOtuá.”
Camilla P., 17, Hawaii, USA
Talangofuá mo e Falalá
“ʻOku ʻai e ngaahi tuʻunga moʻui ʻo e Siasí ke tokoniʻi kitautolu ke tau nofo maʻu ʻi he hala ʻo e fuakavá. Neongo kapau ʻoku ʻikai mahino maʻu pē kiate kitautolu e ʻuhinga ʻoku mahuʻinga ai ha tuʻunga moʻui paú, te tau lava ʻo maʻu ha fakamoʻoni ki ai ʻaki ʻetau talangofua ki he tuʻunga moʻui ko iá mo falala ki heʻetau Tamai Hēvaní, Sīsū Kalaisi, mo hotau kau taki ʻi he Siasí.”
Anwyn T., 16, Florida, USA