“Fakamaama e Māmaní ʻaki ʻa e Ngāue Tokoni Faka-Kilisimasí,” Ki Hono Fakamālohia ʻo e Toʻutupú, Tīsema 2022.
Fakamaama ʻa Māmani ʻaki ʻa e Ngāue Tokoni Faka-Kilisimasi
Ko e vahevahe ʻe he toʻutupu mei he funga ʻo e māmaní ʻa e founga ʻoku fakatupu ai ʻe he tokoni ki he niʻihi kehé ha faʻahitaʻu Kilisimasi makehé.
ʻOku siʻi ha ngaahi founga lelei ange ke manatua ai e Fakamoʻuí lolotonga e taimi Kilisimasí ka ko e muimui ki Heʻene sīpingá mo hono tokoniʻi e niʻihi kehé. Te ke ongoʻi ʻa e nonga mo e ʻofa ʻa Kalaisí ʻi hoʻo foaki ho taimí mo e talēnití. Ko ha toʻutupu ʻeni ʻe niʻihi mei he funga ʻo e māmaní kuo faitāpuekina ʻe he ngāue tokoni kuo nau fai lolotonga e taimi Kilisimasí.
Kilisimasi ʻi ha Fonua Foʻou
Naʻe hiki ʻa Pelenitoni (16), Siaki (15), Melisa (12), mo Kuleisi (9) ki ʻUlukuai ʻi ha taʻu ʻe tolu ʻi hono ui ʻenau ongomātuʻá ko ha taki ʻo e Misiona Uruguay Montevideo. Naʻe vela mo ʻafu ʻa Tīsema ʻi ʻUlukuai, ʻo ʻikai tatau ha meʻa ai mo e Kilisimasi momoko mo sinou ne nau anga ki aí. Neongo naʻe faingataʻa ʻa e mavahe mei ʻapi mo e fāmilí ʻi ha Kilisimasi ʻe tolú, ka naʻa nau fiefia ʻi heʻenau tokoniʻi e kakai ne nau feohí. ʻI he faʻahitaʻu Kilisimasi kotoa pē, ʻe tui ʻe he fāmilí mo e kau faifekaú ha ngaahi sote kulokula “Fakamaama ʻa e Māmaní” ʻi heʻenau ngāue tokoni holo he fonuá.
ʻOku pehē ʻe Siaki, “Ne mau ō mo e kau faifekaú ki he ngaahi paʻake mo e matātahi ʻi Monitiviteó ʻo fakamaʻa e veve mo e toetoenga mei he ngaahi matangi ʻo e faʻahitaʻu māfaná.” ʻOku manatuʻi ʻe Pelenitoni, “Ko e fuofua Kilisimasi naʻa mau ʻi ʻUlukuai aí, naʻá ma fakapipiki ha ngaahi foʻi lole ki ha ʻū kaati ‘Fakamaama ʻa e Māmaní’ ke tufotufa. ʻI he tō ʻa e laʻaá, naʻe fakatahataha mai ha kakai tokolahi ki he matātahí, naʻe hoko ia ko e feituʻu lelei taha ke ʻoange ai ha lole mo ha kaati, neongo naʻe ʻikai ke fuʻu fēfē ʻemau lea faka-Sipeiní.
Faitaaʻi ʻe Julie Olsen
Naʻe hanga ʻe heʻenau ngāue tokoní ʻo ʻai ke nau ongoʻi hangē pē ʻoku nau ʻi ʻapí pea tokoniʻi kinautolu ke nau tokanga taha ki he Fakamoʻuí pea mo e ʻuhinga totonu ʻo e Kilisimasí.
ʻOku pehē ʻe Siaki, “Naʻe tokoni e ngāue tokoni Fakamaama e Māmaní ke ongo makehe ai ʻa e Kilisimasí. Neongo naʻa mau anga ki ha Kilisimasi ʻi he sinoú, ka naʻe ngaohi ʻe he ngāue tokoní e faʻahitaʻu māfana ʻo ʻUlukuaí ke mau maʻu e ongo ʻo e Kilisimasí.” ʻOku poupou ki ai ʻa Melisa. ʻOkú ne pehē, “Naʻe toʻo ʻe he ngāue tokoní ʻeku fakakaukaú mei he meʻa ne u manatu ki ai ʻi ʻapí. Naʻe ngaohi kimautolu ʻe heʻemau fakafiefiaʻi e niʻihi kehé ke mau fiefia mo tokoni ke mau ongoʻi lahi ange ai hangē pē ʻoku mau ʻi ʻapí.”
Ko Hono Fakamafola e Fiefia ʻa Kalaisí
ʻOku manako foki ʻa Sana B. mei Pēteni-Uētemipeiki, Siamané ki hono fakamafola e fiefia ʻo e Kilisimasí ʻo fakafou ʻi ha fanga kiʻi ngāue tokoni faingofua.
ʻOku pehē ʻe Sana, “ʻI he kamataʻangá, ne mau foaki ki homau kaungāʻapí ha ngaahi meʻaʻofa hangē ko ha koa, teʻelango, pe kūkisi. Pea māmālie pē ʻa e kamata ke foaki atu foki ʻe homau ngaahi kaungāʻapí mo ha ngaahi meʻaʻofa Kilisimasi. Kuo hoko ʻeni ko ha tukufakaholo. Ne mau taʻo he taʻú ni e kūkisí maʻa homau ngaahi kaungāʻapí mo e kau faifekaú pea mo talanoa mo homau kaungāʻapí ke ʻomi ha nonga mo ha fiefia kiate kinautolu. ʻOku ʻikai ke mau fai maʻu pē ha meʻa fakataha mo homau kaungāʻapí pea ngalo he taimi ʻe niʻihi ʻoku nau ʻi ai maʻu pē ke tokoniʻi kimautolu. ʻI heʻemau foaki kiate kinautolu ha ngaahi meʻaʻofa Kilisimasí, ʻoku hangē ia ha fakamālō ʻi heʻenau tokoniʻi kimautolu he taʻú kakato.”
ʻOku toe maʻu foki ʻe Sana ha taimi ke tokoni ai ki hono fāmilí.
ʻOkú ne pehē, “ʻOku taʻu 90 ʻeku kui fefiné pea ʻokú ne nofo toko taha pē. ʻOku faingataʻa ke ne ʻalu ki ha feituʻu. Ne mau fakahoko ha ngaahi meʻa lahi ʻi he Kilisimasi kuo ʻosí ke tokoni kiate ia, tautautefito ki heʻene fuofua Kilisimasi taʻe kau ai ʻeku Kuitangatá. ʻOku fiefia maʻu pē ʻeku kui fefiné ʻi heʻemau ʻalu atú. ʻOkú ne fakahaaʻi ange ʻoku mau ʻofa ʻiate ia.”
Kae mahuʻinga tahá, ʻoku ʻiloʻi ʻe Sana ʻe lava e ngāue tokoní ʻo tokoniʻi ia ke muimui he sīpinga ʻa e Fakamoʻuí mo manatuʻi e ʻuhinga totonu ʻo e Kilisimasí.
ʻOku pehē ʻe Sana, “ʻI hoʻo fakafiefiaʻi e Kilisimasí ʻaki hono ʻomi e fiefiá ki he kakaí, te ke manatuʻi ai ʻa Sīsū Kalaisi, pea te ke lava ʻo vahevahe e fiefia ʻo ʻEne pōpoakí mo e niʻihi kehé.”
Ko Ha Tokoni Faka-Kilisimasi Pē ʻAʻau
ʻI he Kilisimasi ko ʻení, fakakaukau ki ha kakai ʻoku mou feohi te nau ala fiemaʻu ha angaʻofa. Te ke lava ʻo feimeʻatokoni efiafi maʻa ho fāmilí pe fakaafeʻi ha kaungāmeʻa ki ha ʻekitivitī ʻa e toʻutupú. Te ke lava ʻo toʻotama maʻa ha kaungāʻapí, feohi mo ha kaungāmeʻa ʻokú ne fai ha taha ʻo e ngaahi meʻa ʻokú ne saiʻia taha aí, ʻave ha sipi kafu māfana ki he falemahaki ʻa e fānaú, pe foaki ha ngaahi meʻavaʻinga mo ha vala ki ha senitā tokoni ʻofa fakalotofonua.
ʻE vavé ni pē haʻo fakatokangaʻi ko hono fakafiefiaʻi e niʻihi kehé ʻa e meʻaʻofa lelei taha te ke lava ʻo foaki foki maʻaú! Kapau ʻoku ʻikai ke ke vāofi fakatuʻasino mo ha taha ʻokú ke ʻofa ai, manatuʻi ʻe lava ke tokoniʻi koe ʻe he tekinolosiá ke ke tokoniʻi tatau pē kinautolu. ʻAhiʻahi tohi fekauʻaki mo e ʻuhinga ʻokú ke ʻofa ai ʻiate kinautolú ʻi he mītia fakasōsialé, hiva maʻanautolu ʻi ha telefoni vitiō, pe ʻave ha ngaahi tohi fakafiefia mo ha sinoufeleiki pepa ʻi he meilí. ʻE lava ke fakamaama ʻe hoʻo ngāue tokoní ha moʻui ʻa ha taha.